Enero 1-15, 2013

MMFF 2012 – Pukyutan ng mga kuwestionableng desisyon

	Nora Aunor
	Kris Aquino
	Piolo Pascual
	Sharon Cuneta
	Jed Madela
	Kathryn Bernardo

Naiinis ang ating mga kababayan kung bakit tinalo ni Dingdong Dantes si Governor ER Ejercito. Ano at bakit daw nagkaganoon ang resulta. May kinalaman na naman daw ba doon ang mahabang kamay ni Kris Aquino?

Naging best picture ang pelikula nina Dindong at Angel Locsin. Pinag-iwanan nito ang El Presidente at Thy Womb kung saan nanalong pinakamahusay na direktor si Brillante Mendoza. Hindi maunawaan ng mga kababayan natin kung paano nangyari ang ganoon.

Pero MMFF ang tinatalakay natin. Pukyutan ng mga kakuwestiyon-kuwestiyong desisyon sa gabi ng parang nila ang samahang ito, kaya hindi na bago ang mga nanalo noong Huwebes ng gabi sa MMFF.

Walang kuwestiyon sa pananalo ni Nora Aunor. Mga bingi at bulag na lang siguro ang kokontra sa pagiging best actress ng Superstar. Hiling ng ating mga kababayan na sana’y makatulong nang malaki iyon para panoorin ang pelikula para hindi matanggal sa mga sinehan.

Pero markado ang sinabi ng Superstar na kahit tatatlo na lang ang nanonood ng kaniyang pelikula ay hindi pa rin siya titigil sa pagganap. Ito na ang kaniyang buhay. Ito ang nagbigay sa kaniya ng magandang pangalan at kapalaran, kaya patuloy pa rin siyang aarte.

Ang dami-daming tinanghal na panalo na hindi sinasang-ayunan ng mga may malalim na kaalaman sa paggawa ng pelikula. Pero nandiyan na iyan. Ano pa nga ba ang kanilang magagawa ngayon kundi ang magbigay na lang ng kanilang mga opinyon?

Nora Aunor – Best Actress, walang dudang mahusay talaga!

Totoo, para ngang pusa ang Superstar na si Nora Aunor. Mayroon siyang siyam na buhay, ayon na rin sa isang kapaniwalaan, dahil pagkatapos niyang mawala nang mahabang panahon ay nakabalik pa rin siya sa gitna ng labanan nang magdesisyon siyang umuwi na.

Una ay nabigyan siya ng magandang proyekto ng TV5, ang Sa Ngalan ng Ina. Pagkatapos noon ay dalawang pelikula agad ang kaniyang ginawa, ang El Presidente at ang nakasungkit ng maraming parangalan sa MMFF na Thy Womb.

Marami ngang parangal ang kaniyang pelikula, pero hindi sinuwerte sa takilya ang Thy Womb. Sadya nga bang matatanda na ang mga Noranians ngayon at hindi na makabiyahe para manood sa mga sinehan?

Hindi na bago ang pananalo ni Nora Aunor bilang best actress. Kahit sino naman sa mga artistang gumaganap ngayon sa iba’t ibang pelikula sa MMFF ay walang binatbat sa kaniya. Noong una pa man siguro ay handa na ang mga ito na matatalo sila ng Superstar.

Sana ay magkaroon ng ideya ang mga kababayan natin na silipin ang mga makabuluhang kalahok ngayon sa MMFF, tulad ng Thy Womb, saka ng El Presidente na maituturing nang epiko sa mga darating na panahon.

Noranians – Bakit parang natulog sa pansitan ang fans ng supertar?

Ngayon mas naging malinaw sa amin ang malaking pagkakaiba ng mga tagasuporta nina Nora Aunor at Governor Vilma Santos. Matinding sumuporta ang mga Vilmanian. Basta may proyekto ang kanilang idolo ay naghahawak-kamay sila, kahit hindi sila sabihan ng Star For All Seasons ay nakahanda ang kanilang grupo.

Nanghihinayang kami sa markadong pelikula ni Nora Aunor, ang Thy Womb, umani ng tagumpay sa gabi ng parangal ng MMFF ang proyekto at tinanghal pa siyang Best Actress pero hindi tinao ang pelikula.

Ngayon mas kailangan ng Superstar ang suporta ng kaniyang mga tagahanga pero mukhang hindi man lang sila nagparamdam. Parang natutulog sila sa pansitan, kaya tuloy ay nasasabihan sila na magagaling lang sila sa pakikipag-away pero kulang na kulang naman sa aksiyon na kailangan ng kanilang idolo.

Sabi’y nandiyan pa rin sila hanggang ngayon. Sabi’y sabik na sabik na sila sa kanilang idolo. Bakit kung kailan nila dapat ipinakita ang kanilang pagkasabik ay saka naman sila nakalimot?

Nakapanghihinayang talaga.

Kris Aquino – “Boobs” ang inilaban sa MMFF Awards Night

Maigsi lang ang komentong ito na itinext ng isang balikbayan naming kaibigan na kinukuwestiyon ang mga nanalo sa nakaraang gabi ng parangal ng MMFF. Maikli, pero maanghang at nagmamaasim dahil ang kaniyang sabi, “May chef sa kusina ng MMFF, kaya lang, hindi magaling – buking na buking na lutong-Macau.”

Sabi naman ng isang male personality na nag-text din sa amin, pero ayaw namang magpabanggit ng pangalan, “Nakakatawa ang mga comments sa Twitter noong Thursday (Dec. 27) ng gabi. Ang isa pa raw sa mga anomalya sa MMFF awards night, eh, ang boobs ni Kris Aquino. It’s a fake!”

Tanong naman sa amin ni anak-anakang Richard Pinlac, ano raw kaya ang ibinulong ni Nora Aunor habang nakayakap nang patingkiyad kay dating Pangulong Erap Estrada, I love you raw kaya?

At mayroon namang nagkomento ng ganito, “Si Ai-Ai delas Alas ang saving grace ng Sisterchaka (sic). Baklang acting na nga si Vice Ganda, pero kinabog pa siya ng bakla at trying hard acting ni Kris Aquino. Sisterchaka dapat ang title ng movie nila.”

Piolo Pascual – Maging buwenas kaya ngayong 2013?

Bagong Taon na. Isang panibagong taon na naman ang ating makakaengkuwentro. 2013 na may kakambal na suwerte, mga paghamon at kung anu-ano pang pangyayari, depende na lang sa atin kung paano iyon tatanggapin at lalabanan.

Sa isang umpukan ng mga taga-showbiz ay napagtuunan ng kuwentuhan si Piolo Pascual. Hindi nga naman kasi naging masyadong mabait sa guwapong aktor ang taong 2012. Napakaraming kuwento at pangyayaring nakaapekto nang negatibo sa kaniyang career at personal na buhay.

Sana nga naman ay makabawi si Piolo sa papasok na taon para hindi siya napag-iiwanan ng kaniyang mga kapuwa aktor. Para rin hindi lumulutang ang mga kuwentong matindi ang nararamdaman niyang insekuridad kina Coco Martin at John Lloyd Cruz at inis naman sa kanilang network na parang nakalilimot nang nandiyan pa siya.

Sana’y mabigyan siya ng mga proyektong nababagay sa kaniya. Iyong muling palulutangin ang kaniyang talento sa pagganap, tulad noong magkatambal pa sila ni Judy Ann Santos.

At harinawang makatagpo na siya ng babaeng mamahalin niya at magmamahal sa kaniya, iyong kaparehang hindi niya kabaro, para matigil na ang mga pagkuwestiyon sa kaniyang kasarian at mga kuwentong kabaklaan.

Nabawasan ng ningning ang pangalan ni Piolo Pascual noong 2012. Sa tatanggapin niya at sa hindi ay bigla siyang nawala sa gitna ng labanan. Iyon ang kailangan niyang mabawi sa taong 2013.

Sharon Cuneta – Hindi nakakalimot tuwing Pasko

Taun-taon, mula pa noong bata siya, ay hindi nakalilimot si Sharon Cuneta sa pag-alala at pagpapahalaga sa mga taong nakasabay niya sa pag-akyat sa tagumpay.

At hindi lang tuwing Pasko. Kapag dumarating ang Valentine’s Day ay nakakaalala rin siya. Nagpapadala ang Megastar ng mga hugis-pusong tsokolate at iba’t ibang klase ng kending matatamis para iparamdam ang kaniyang pagmamahal.

Nilalahat na namin ang mga artista, bukod-tanging si Sharon Cuneta lang ang taun-taong nagpapadala ng regalo ng pasasalamat sa mga kasamahan niya sa trabaho – sa mga reporters at kahit sa maliliit na manggagawa ng pelikula at telebisyon.

Kuwento ng isang malapit sa Megastar, July pa lang ay iniaayos na niya ang kaniyang mga pangregalo. Nakatago sa kaniya ang listahan ng mga taun-taon niyang pinadadalhan ng sorpresa. Walang natatanggal pero siguradong nadadagdagan ang mga pangalan.

Mahilig siyang magsulat. Si Sharon mismo ang matiyagang nagsusulat ng dedication sa mga cards na ipinadadala niya. Kahit sa taping ng Megastar ay hindi maaaring maiwanan ang isang maleta niya na punumpuno ng mga stationery at stickers.

Sa aspektong iyon, pinag-iiwanan ni Sharon nang milya-milya ang maraming artista. Pagdating sa pag-alala at pagpapahalaga ay nangunguna siya sa listahan, wala siyang ipinupuwera. Basta nakasama ka niya ay siguradong nakalista ka na sa kaniyang puso.

Jed Madela – Nag-Tweet, nag-taray, nagsisisi kaya ngayon?

Think before you click. Iyon ang gasgas nang kasabihang alay sa mga mahihilig sa pagtu-Tweet, pagpe-Facebook at pag-i-Instagram. Mag-isip muna nang maraming beses bago mag-post ng anuman dahil mula doon ay maaari kang husgahan.

Ilang sikat na personalidad na ba ang nalagay sa alanganin dahil sa pagpatol nila sa Twitter? Hindi ba’t sa halip na unawain sila ng marami ay sila pa ang naiipit sa bandang huli dahil sa maaanghang nilang pananalita?

Hindi kaya alam iyon ni Jed Madela, ang singer na pinupupog ngayon ng mga tagahanga nina Daniel Padilla at Kathryn Bernardo, dahil sa pakikialam niya sa kapribaduhan ng magka-love team?

Sa mga hindi pa nakakaalam sa kuwento, kinunan ng retrato ni Jed ang mga iniwanang pagkain nina Daniel at Kathryn sa mesa, saka ipinost sa Instagram.

Ang nagmamahadera at nagmamalditang komento ni Jed, sana raw ay hindi ganoon sina Daniel at Kathryn, hindi raw ngayon at sikat na ang mga ito ay basta na lang nila iiwanan ang kanilang mga basura.

Dahil sa ginawang pagpo-post ni Jed ng itsura ng lugar na kinakainan ng dalawa na may bonus pang pagtataray ay nalalagay ngayon sa alanganin si Jed Madela.

Kaliwa’t kanang bira mula sa mga tagasuporta ng sikat na tambalan ang tinatanggap niya ngayon. Kung anu-anong salita ang ipinakakain sa kaniya, dahil ipinahiya niya ang mga ito.

“Ipagpalagay nang medyo makalat nga ang kinakainan nina Daniel at Kathryn, ano naman ang pakialam niya? Bakit hindi ang sarili niya ang pakialaman niya, e, hindi naman siya inaano nina Daniel at Kathryn?” Inis na kuwento ng isang taga-production ng ABS-CBN.

Binura na ng singer ang ipinost niyang retrato ng mga iniwanang pagkain ng dalawang young stars. Nakialam na ang mga tagapamuno nila sa network. Balita nami’y nakatikim ng mga hindi kagandahang salita si Jed mula sa mga ito.

Dapat lang, dahil hindi naman hinihingi ng pagkakataon ang ginawa niyang pagtataray sa magka-loveteam. Lalong wala siyang karapatang manghimasok sa buhay ng may buhay.

Isang leksiyon ang natutuhan ni Jed nang dahil sa nangyari. Sa susunod siguro ay hindi na siya manghihimasok sa buhay ng may buhay. Hindi na siya makikialam kahit pa nasa tungki na ng ilong niya ang tinutukoy niyang basura. Mananahimik na lang siya nang bonggang-bongga.

Malayo na ang narating ng kuwento ng pagtataray ni Jed. May kani-kaniyang bersiyon na ng istorya ng katarayan ang mga kababayan natin kung saan sangkot si Jed. Matagal na raw ganiyan kabastos ang singer.

May isang source namang nag-text sa amin na ito ang sinasabi, “Ang favorite song dapat ngayon ni Jed, eh, Kung Maibabalik Ko Lang. Dahil kung alam lang niya na lalala pala nang ganito ang pakikialam niya sa buhay nina Daniel at Kathryn, eh, hindi na siguro niya ginawa iyon!

“Ano ang gusto niyang mangyari ngayon? Ang purihin pa siya ng mga fans ng mga bagets? Eh, siya itong nagmahadera, siya ang nag-post ng pagtawag ng basura sa kinakain ng mga bata, kaya iyon ang napala niya!” sabi ng text message.

May isa pa kaming impormanteng nagkuwento na noong minsan daw ay tinarayan din ni Jed ang isang deejay nang magkamali siya sa pagli-lipsynch sa mismong kanta niya.

“Siya na nga ang nagkamali, eh, siya pa ang may ganang magalit?” pag-alala pa ng aming source na nanood kay Jed sa nasabing event.

Isang malaking leksiyon ng buhay ang natutuhan ni Jed sa karanasang ito. Uli-uli, kapag nakakita siya ng isang insidenteng para sa kaniya ay hindi pasable ay manahimik na lang siya. Huwag na siyang mag-tweet at mag-Instagram, para hindi siya nalalagay sa dalisdis ng intriga at kontrobersiya.

Hinihingi niya ito, at ibinigay naman sa kaniya. Wala siyang masisisi ngayon kundi ang sarili lang niya. Huwag makikialam sa buhay ng may buhay. Huwag magtataray kung hindi naman hinihingi ng panahon. Huwag na huwag papatol sa mga bata dahil siya ang mas nakatatanda na dapat umunawa.

“At huwag ding iirap! Huwag tatalikod kapag kinakausap siya! Gawain ba ng isang tunay na lalaki ang pang-iirap?” nagmamaasim namang sundot ng isang nakausap naming tagahanga nina Daniel at Kathryn.

Have a comment on this article? Send us your feedback

	Heart Evangelista
	Senator Chiz Escudero
	Kris Aquino, Vice Ganda & reigning comedy queen, Ai Ai Delas Alas
	Pilita Corrales
	Christine Reyes
	Rayver Cruz

Enero 16 – 31, 2013

Heart Evangelista – Bagay na bagay kay Sen. Chiz

Sa isang isla sa lalawigan ng Quezon magkasamang nagbakasyon kamakailan sina Senator Chiz Escudero at Heart Evangelista. Natural lang na naging aktibo ang mga usisero sa pagtutok sa magkarelasyon. Kinikilig pa nga ang iba sa kanila, bagay na bagay raw kasi sina Heart at Senator Chiz.

Dati nang nakikita ng aming mga impormante si Heart, pero sa mga pagkakataong iyon ay hindi namamansin ang dalaga. Kaya bagong Heart ang nakita nila nitong huli habang kasama ang senador na sinasabing kahawig ni Bamboo.

“Marunong na siyang bumati, saka maaliwalas na rin ang mukha niya. Hindi na siya simangutera. Malaki ang ipinagbago ni Heart ngayon. Makarelasyon ba naman niya ang isang senador na grabe ang PR, talagang sasabay siya!” komento ng aming kaibigan.

Marami nang pinagdaanang biyahe si Heart, pero walang nangyayari. Hindi gaanong tumatagal ang kaniyang pakikipagrelasyon. Sana nga, sa pagkakataong ito ay natagpuan na niya ang kalebel ng kaniyang utak at panlasa. Hindi na masasabi ngayon na ayaw ng kaniyang pamilya sa isang sikat at matalinong senador na magiging magandang impluwensiya kay Heart.

Ai Ai Delas Alas – Comedy queen talaga

Halos lahat ng nakakausap namin ay aliw na aliw sa Comedy Concert Queen sa Sisterakas. Nagkakaisa ang mga nakakausap namin na si Ai-Ai delas Alas talaga ang nagdala ng pelikula. Kinasabikan nila ang uri ng komedyang mayroon si Ai-Ai.

Siguro naman ay ramdam nina Kris Aquino at Vice Ganda ang sinasabi ng manonood. Oo, totoong mayroon din silang mga tagasuporta. Totoong may makapagsasabi rin na sila ang pinanood ng mga ito pero ang porsiyento noon ay maliit lang kumpara sa laki at lawak ng naaabot ni Ai-Ai.

Iyon ang marka ng magaling na komedyana na wala pang nakapaplakado hanggang ngayon. Nakalilimot ng problema ang kaniyang pagpapatawa. Isang tunay na katatawanan iyon at hindi pagkainis na tulad ng ipinakikita ng ibang komedyante.

Si Ai-Ai delas Alas pa rin ang may hawak ng korona. Sa ayaw at sa gusto ng iba diyan, siya pa rin ang minamahal at hinahangaan ng madlang pipol sa totoo lang.

Pilita Corrales – Ayos na ang relasyon kay Lotlot

Pagkatapos ng mahabang panahon ay nagkita na pala at nagkasundo ang dating magbiyenang Ms Pilita Corrales at Lotlot de Leon. Nag-ugat ang hindi nila pagkakaunawaan dahil sa mga isyung kinasangkutan nina Lotlot at Ramon Christopher Gutierrez dahil sa kanilang paghihiwalay.

Natural, ina ni Monching si Tita Pilita, alangan namang si Lotlot pa ang kaniyang kampihan. Humaba ang kontrobersiya na humantong pa sa pagpapalitan nila ng mga hindi kagandahang salita.

Naiwan sa poder ni Monching ang kanilang mga anak ni Lotlot. Ang mag-ina ang nagpaaral sa mga bata, pero hindi naman ipinagdamot ni Monching ang pagkakataong makita ni Lotlot ang kanilang mga anak.

Diretsong magsalita si Tita Pilita, kapag tinatanong ito tungkol kay Lotlot ay natural lang na emosyonal ang kaniyang sagot. Nagbibigay rin naman ng kaniyang panig si Lotlot tungkol sa isyu.

Pero may paraan ang panahon para gumamot kahit ng malalalim na sugat. Noong nakaraang Pasko ay pinadalhan ng Christmas card ni Tita Pilita si Lotlot. Ginantihan naman iyon ng respeto ng aktres.

Nagpunta siya sa bahay ng kaniyang dating biyenan. Nagkasama-sama sila noong Pasko. Kumustahan lang ang namagitan sa kanila at kusa na nilang binura sa kanilang mga puso ang mga hindi kagandahang alaala ng nakaraan.

Ngayong nagkasundo na si Lotlot at ang ina ni Monching ay may kasunod pang katanungan iyon. Kailan naman daw kaya sila magkakasundo ng kaniyang ina. Idenay man ng aktres ang katotohanan ay maraming nakakaalam na may problema sa pagitan nila ng kaniyang inang Superstar. Susunod na raw kaya ang pangyayaring iyon?

Isang source ang nakapagsabi sa amin na hanggang ngayo’y may matinding tampo pa rin si Lotlot sa kaniyang ina. Si Matet daw ang malapit sa Superstar. Hiling nila na sana’y maging maayos na rin ang relasyon nina Lotlot de Leon at Nora Aunor.

Cristine Reyes – Break na sila ni Rayver, hanggang kailan daw?

Isa lang ang alam naming maligaya sa pakikipaghiwalay ni Rayver Cruz sa kaniyang may kabarubalang karelasyon na si Cristine Reyes, ang kaniyang pamilya mismo at wala nang iba pa.

Matagal nang kontra ang pamilya ng aktor sa kaniyang girlfriend, kaya lang ay hindi agad nagtagumpay ang mga ito na mabaklas siya kay Cristine, pag-ibig daw ang maitatawag doon.

Sabi ng aming source, “Nakararating kasi sa pamilya ni Rayver ang mga ginagawang pambabastos sa kaniya ni Cristine kahit sa harap ng maraming tao. Mabait lang talaga si Rayver kaya napalalampas niya iyon.”

At iyong tungkol naman sa kanila ni Derek Ramsay, matagal nang tugtugin iyon. Ilang beses na nilang pinag-awayan ni Rayver ang pagkabuking sa pakikipagkita nito nang palihim sa aktor nang ilang beses.

Pero mahirap tayaan ang kuwento ng paghihiwalay nina Rayver at Cristine. Para kasi silang panahon na pabagu-bago ang direksiyon, lalabas pa lang ang sinulat mo ay bati na naman sila.

Sa pansamantala nilang paghihiwalay (inuulit namin, pansamantala lang) ay siguradong masaya na ang ilang tao sa kampo ni Rayver dahil talagang ayaw ng mga ito kay Cristine.

Sabi ng ang aming impormante, “Sino ba naman kasi ang magkakagusto sa babaeng ganoon na pati ang mommy at mga kapatid niya, eh, inaaway at sinusumbatan? Kung kaya niyang gawin iyon sa mismong mga kadugo niya, di lalo na sa ibang tao?”

Ano kaya ang masasabi ngayon ni Ara Mina tungkol sa kuwento ng pakikipagrelasyon ng kaniyang kapatid? Kung kilala nga namin ang aktres ay isa lang ang gagawin nito. Titingala si Ara sa langit, kasunod ang matinding hugot ng buntong-hininga.

Have a comment on this article? Send us your feedback

Pebrero 1 – 15, 2013

	Camille Villar
	Jennylyn Mercado
	Patrick Garcia
	Sarah Geronimo
	Kris Aquino, kasama ang mga anak na sina Josh & Baby James
	Cesar Montano & Sunshine Cruz
	Krista Miller
	Ramon Tulfo
	Claudine Barretto & Raymart Santiago

COMELEC – binabantayan ang kulay ng damit ng mga artista, bakit?

Malapit na naman ang eleksiyon kaya lahat ng anggulo ngayon ay binubusisi na – kasama sa mga nakakalokang tinututukan ngayon ay ang kulay ng mga isinusuot na damit ng mga artista.

Pati iyon ay pakikialaman na ng COMELEC. Bawal na sa mga artista ang pagsusuot ng mga damit na ang kulay ay markado at kunektado sa isang pulitiko o grupo.

Reaksiyon ng mga artista, pati ba naman ang kalayaan nila sa pamimili ng isusuot ay pakikialaman na ng gobyerno? Paano nga naman kung paborito lang talaga nilang kulay ang yellow, orange, tangerine, pula, green at blue?

Gamit na gamit sa showbiz ang mga kulay na nabanggit. Una, maganda ang rehistro ng matitingkad na kulay sa telebisyon, nang-aagaw ng pansin, buhay na buhay ang kanilang dating.

Kapag nagsuot ba ng tangerine ang isang artista ay maikokonekta na siya agad kay dating Pangulong Joseph Estrada? At kapag naka-orange na gown ang isang aktres, iyon ba ay agad nang ikokonek kay Senator Manny Villar, dahil iyon ang kulay ng partido ng pulitiko?

Paano na si Kris Aquino? Mahilig siyang magsuot ng dilaw, bawal na rin bang magsuot ng ganoong kulay ngayon ang aktres-TV host, dahil iyon ang sikat na sikat na kulay ng partido ng kaniyang pamilya?

Si Camille Villar, bawal na rin bang magsuot ng orange ang co-host ni Willie Revillame, dahil lang sa iyon ang kulay ng kaniyang mga magulang?

At si Willie Revillame, kahit noong hindi pa siya malapit sa mga Villar ay paborito na niyang kulay ang orange. Pati ba ang personal na pagkagusto ng aktor-TV host sa kulay na iyon ay pagbabawalan na ng COMELEC?

Pakialaman ba pati ang colour wheel? Isang napakalinaw na paninikil na iyon sa kalayaang idinidikta ng Konstitusyon.

Ang dami-daming bawal. Kung anu-anong kundisyon ang kanilang pinaiiral, samantalang sangkatutak ang problemang bayan ngayon na hindi natutugunan.

Kaliwa’t kanan ang patayan, araw-araw ay may ina-ambush, nag-uupakan pa ngayon ang mga senador sa harap ng publiko. Bakit hindi iyon ang solusyunan? Bakit pati ang mga artistang nananahimik ay bubulabugin, bakit pati ang kanilang kalayaan sa pamimili ng kulay ng kanilang isusuot ay sasakupin na rin ngayon ng COMELEC? Dyusko naman!

Jennylyn Mercado – Hindi ipapakita kay Patrick ang anak kung walang sustento

Sa takbo ng kontrobersiya sa pagitan nina Patrick Garcia at Jennylyn Mercado ngayon tungkol sa sustento ng kanilang anak na si Alex Jazz ay parang lumalabas na paninda ang anak na pinag-aawayan nila.

Si Jenylyn ang unang nagsalita na hindi nakapagbibigay ng sustento si Patrick. Inamin naman ng aktor na dalawang buwan siyang hindi nakapagbigay ng sustento sa kaniyang anak dahil wala siyang trabaho, pero bumawi naman si Patrick sa ikatlong buwan.

Pero nakalulungkot malaman na nakikita lang ni Patrick ang bata kapag may ibinibigay siyang sustento. Kapag nakadeposito na ang halagang buwan-buwan niyang ibinibigay para kay Alex Jazz, kapag walang deposito ay wala ring bata siyang makikita.

Tuloy ay kung ano-ano nang kuwento ang lumalabas. Mismong mommy ni Patrick ang nagsasabi na hindi naman pala kasama ni Jennylyn si Alex Jazz, si Mommy Lydia pala ang nag-aalaga at sumusubaybay sa kaniyang anak, dahil magkasama na sila ngayon ni Luis Manzano sa ipinagawang bahay ng aktor sa Greenmeadows Subdivision.

Kung sustento ang ikinabuburibot ng kampo ni Jennylyn Mercado, mas marami palang puwedeng sabihin ang kampo ni Patrick laban sa aktres, pero ang bata lang ang kanilang inaalala at binibigyan ng pagpapahalaga kaya hindi na sila nagsasalita.

Sarah Geronimo – Nasa kaniya ang huling halakhak

Siguro’y lihim na lang na napapangiti ngayon si Sarah Geronimo tungkol sa nangyari sa relasyon nina Rayver Cruz at Cristine Reyes.

Hindi naman natin maaasahang maglulundag pa sa tuwa si Sarah tungkol sa paghihiwalay ng dalawa. Pero magpakatotoo na tayo, matinding sakit ang natikman niya noon dahil pakiramdam ng dalaga ay hindi man lang siya pinroteksiyunan ni Rayver nang pagsalitaan siya ng kung ano-ano noon ni Cristine.

Iyon ang mahirap kapag masyadong bumibigay ang isang babae sa pakikipagrelasyon. Inaway ni Cristine noon si Sarah, ipinagtanggol nito si Rayver sa pag-aakalang magiging sila na habambuhay.

Hindi nagsasalita noon ang binata tungkol sa mga akusasyon laban sa kaniya ng kampo ni Sarah. Si Cristine ang sagot nang sagot, palaban noon ang seksing aktres.

Naka-move on na si Sarah. Pareho na lang silang loveless ngayon ni Cristine. Ang pagkakaiba lang nila ay wala talagang karelasyon si Sarah, samantalang si Cristine, wala mang karelasyon ay may kakaibang paraan para maging masaya sa piling ng kung sinumang mataypan nito.

Ganoon iyon.

Kris Aquino – Totoong dakilang ina kay Josh at Baby James

Kahit ayaw namin sa kaniyang kataklesan at kamalditahan, sa pagkakataong ito ay kailangan naming kampihan si Kris Aquino sa kaniyang pinagdadaanan.

Bintang ng mga nangangalampag ngayon kay Kris sa Twitter ay hindi raw siya responsableng ina. Pabayang ina raw ang aktres-TV host, kung makapanghusga ang mga umaatakeng aso ngayon kay Kris ay para bang kilalang-kilala nila ang babaeng inaakusahan nila.

Totoong pakialamera at taklesa si Kris. Totoo ring maaaring pagdudahan ang kaniyang kakayahan bilang isang aktres. May nagsasabing kung umarte siya ay nakakaumay at iisa lang daw ang kaniyang emosyon.

Pero pagdating sa pagiging ina ay dalawang kamay naming sasaluduhan ang isang Kris Aquino. Kung pag-aaruga sa anak ang magiging diskurso ay makikipagputulan kami ng daliri sa kamay at paa.

Ang nagkukuwento ngayon tungkol sa kaniyang pagiging iresponsableng ina ay isang kakontra niya sa maraming bagay at isang taong matagal na niyang hindi kasundo-kakibuan. Pero naninindigan kami na walang karapatan ang kahit sino na baligtarin ang katotohanan tungkol sa pagiging ina ni Kris.

Nasubaybayan namin iyon. Naging saksi kami sa kaniyang mga sakripisyo at kung paano niya mahalin sina Joshua at Baby James.

Hindi simple ang magpalaki ng isang batang espesyal. Kailangan natin ng milya-milyang pisi ng pasensiya para dumisiplina sa isang tulad ni Josh, pero ilang taon naming nakita at napatunayan na dakilang ina si Kris.

Mapusong ina si Kris; responsable, hindi maramot at dakila siyang ina. Para sa amin, maling anggulo ang napiling ibato ng mga umaatakeng aso ngayon sa kaniya.

Kaya sa mga nang-aakusa na iresponsableng ina si Kris Aquino, mali ang bombang pinasabog ninyo. Sa inyo bubuwelta dahil kabaligtaran ng katotohanan ang pinalutang n’yo laban sa kaniya.

Nora Aunor – Magpapa-opera na para makapag-concert

Matagal din naming nakakuwentuhan ang Superstar habang naghihintay kami para sa grand finale ng trade launch. Personal naming ipinaabot sa kaniya ang malaking pagbabago ng kaniyang hitsura sa Never Say Goodbye.

Bumagay kay Nora Aunor ang wig na ipinasuot ng produksiyon. Bumata siya nang maraming taon sa bago niyang pakete. Pati ang kaniyang make-up ay nahuli na rin ng nag-aayos sa kaniya sa taping.

Tatapusin lang niya ang kaniyang mga eksena sa Never Say Goodbye ng TV5 na malapit nang mapanood. Pagkatapos noon ay aalis na siya para makipagkita sa kaniyang doktor sa New York. Kakaririn na raw talaga niya ang pagko-concert ngayong 2013.

“Kahit ano’ng mangyari, magpapaopera na talaga ako. Sabik na sabik na akong kumanta. Gusto ko nang mag-concert. Miss na miss ko na talaga ang unang pag-ibig ko,” sinserong sabi ng Superstar.

Sunshine Cruz – Nag-alsa balutan dahil sa pambababae ni Cesar

Napuno na ang salop, kaya kinalos na. Ganoon kung ilarawan ng marami nating kababayan ang nangyari kay Sunshine Cruz na naglabas ng kaniyang mga sama ng loob sa Twitter dahil sa diumano’y ginawang pambababae ni Cesar Montano.

Galit na galit ang aktres. Matitinding salita ang ipinakain niya sa isang starlet na nagngangalang Krista Miller, na nag-post pa sa Instagram ng mga diumano’y iniregalo dito ng action star.

Nauunawaan si Sunshine ng kaniyang mga kapuwa babae. Napakasakit nga namang malaman na kinaliwa na siya ng kaniyang mister ay pinasasakitan pa siya ng babae. Parang iniinis pa siya nito sa pamamagitan ng pagpo-post ng kung ano-ano sa Twitter at Instagram.

At ang pinakamasakit pa, pati ang mga iniregalo niya kay Cesar noong Pasko, ang makasaysayang T-shirt at iPhone5, pati na ang tsokolateng bigay naman ng kapatid ng aktor, ay nasa babae pala ngayon.

Napakasakit nga naman noon, naisahan na siya ay ipinamigay pa ng kaniyang mister ang mga iniregalo niya. Wala nang mas masakit pa kaysa doon para sa isang misis.

Ewan kung paano sasagutin ngayon ni Cesar ang mga rebelasyon ni Sunshine. Hindi na bago kung tutuusin ang ganitong senaryo, pero kakaiba ang pangyayari ngayon, dahil nabuko ng aktres pati ang mga ebidensiya ng pambababae ng kaniyang asawa.

Balitang tuluyan nang umalis sa kanilang bahay si Sunshine Cruz na kasama ang kanilang mga anak ni Cesar Montano. Nakakalungkot.

Tinawagan naman kami ng isang kaibigang nakakakilala kay Krista Miller. Ayon sa aming kausap ay kabaligtaran daw si Krista ng gustong palabasin ni Sunshine.

“Mabait si Krista, marunong makisama, walang kayabang-yabang. Baka iyon ang nagustuhan sa kaniya ni Cesar. Mabait kasi ang taong iyon, saka hindi siya ganoon ka-flirt na gustong palabasin ni Sunshine Cruz,” simula ng aming source.

Idinagdag din ng aming impormante na ayaw raw tantanan ni Sunshine si Krista. Kung anu-anong masasakit na paratang pa rin daw ang ibinabato ng aktres sa starlet. Napupunta na raw tuloy ang simpatya ngayon ng publiko kay Krista Miller. It takes two to tango, di ba? Bakit si Krista lang ang inuupakan niya?

“Matutuloy ba ang isang relasyon, kung totoong mayroon nga, kung umiiwas ang isa sa kanila? Sige, sabihin na niyang malandi nga si Krista, pero mauuwi ba iyon sa relasyon kung ayaw ng asawa niya?

“Unang-una, kung totoo ngang nahuhumaling ang asawa niya ngayon kay Krista, eh, siya ang dapat manalamin. Tanungin niya ang sarili niya, bakit nga ba niya nahuhuling nambababae si Cesar?”

Kung minsan ay may mga katanungang mahirap sagutin at tanggapin pero kailangan. Maraming salamat, source.

Mon Tulfo – Ibinasura ng korte ang demanda laban kay Raymart at Claudine

Pagkatapos ng walong buwan ay naglabas na ng resolusyon ang piskalya ng Pasay City tungkol sa kasong isinampa ng matapang na kolumnistang si Ramon Tulfo laban sa mag-asawang Raymart Santiago at Claudine Barretto na nag-ugat sa kaguluhan sa airport noong Mayo ng nakaraang taon.

Ibinasura ng piskalya ang kasong pambubugbog na ginawa ng mag-asawa at ng kanilang mga kasamahan sa kolumnista-komentarista. Kapos sa ebidensiya ang ibinigay na dahilan ng nagrepaso sa kaso, isang bagay na ikinagulantang ng ating mga kababayan.

Napanood kasi ng ating mga kababayan ang naganap sa airport. Nagmistulang butangera si Claudine sa pakikisuntok at pakikisipa sa kolumnista, pati ang pananakit ni Raymart sa mamamahayag.

Reaksiyon ng isang nakausap namin, “Ano? Hindi pa ba sapat na ebidensiya ang nasa You Tube? Hindi pa ba ebidensiya iyong kitang-kita na ng buong mundo na pinagtutulungan si Mon Tulfo ng tropa ng mag-asawang Raymart at Claudine?

“Kundi pa matatawag na ebidensiya ang ganoon, ano na? Si Mon Tulfo na iyon, ha? Nakakaloka naman. Binugbog na’t lahat iyong tao, kapos pa pala sa evidence ang tawag doon?” manghang-manghang reaksiyon ng aming kausap.

Hindi lang malungkot ang matapang na kolumnista-komentarista sa kinalabasan ng kaniyang reklamo, depresyon ang umaatake sa kaniya. Paano raw nangyaring depensa lang ni Claudine ang pagsugod-pananakit sa kaniya?

Isa lang ang tanging nasabi ni Kuya Ramon, “Maka-karma rin sila. Bahala na sa kanila ang karma. Lagi namang may balik ang lahat ng mga ginagawa natin, kaya maka-karma rin sila.”

Ang kasong grave coercion naman na isinampa niya laban kay Raymart ay pinababa ng piskalya. Naging slight physical injury na lang ang reklamo, na minsan pang pinagtakahan ng mga sumubaybay sa pangyayari.

Have a comment on this article? Send us your feedback

Pebrero 16 – 28, 2013

	John Lloyd Cruz & Angelica Panganiban
	Sarah Geronimo
	Mariel Rodriguez
	Cesar Montano & Sunshine Cruz
	Jolo Revilla
	Daniel Padilla

John Lloyd at Angelica – Tapos na ba ang nilalanggam na relasyon?

May problema ba ngayon sina John Lloyd Cruz at Angelica Panganiban? Tapos na ba ang kanilang dating nilalanggam na relasyon? Kung totoo ang mga kuwentong naglalabasan ngayon na wala na sila ay paano na ang mga papuring binitiwan nang napakaaga ng young actress tungkol kay Lloydie?

May source na nagkuwento, may nakakita sa magaling na aktor sa isang hindi gaanong pansining bar sa Makati na may kasamang ibang babae. Sa tingin ng mga impormante ay mukhang hindi lang basta magkaibigan si JLC at ang ka-date niyang non-showbiz.

Sabi pa ng source, “Hindi puntahan ng mga tao ang bar na pinuntahan nila. Maliit lang iyon, medyo nakatago pa, hindi mo nga aakalaing pupunta doon si John Lloyd, e!

“Baka naman nagsawa na si John Lloyd kay Angelica? Baka nagising na siya sa katotohanan na hindi sila bagay, dahil masyadong palengkera ang karelasyon niya?”

Kung totoo ngang tapos na ang lahat sa kanila ngayon ay napakarami nilang kailangang ipaliwanag sa publiko, lalo na’t napakarami nang binitiwang pahayag ng aktres noong kainitan pa ng relasyon nila ni Lloydie. Kung ano-anong pagkukumpara sa aktor at kay Derek Ramsay ang ginawa noon ni Angelica Panganiban.

Puwede rin namang nagkalabuan lang sila, nagkatampuhan, pero tanong ng mga miron ay sapat na bang dahilan iyon para makipag-date si JLC sa iba?

“Kaya pala may mga tweet na hindi kagandahan si Angelica, kaya pala mayroon siyang pinariringgan na kung sino, mayroon palang nangyayari sa relasyon nila ni Lloydie!” reaksiyon naman ng isang Twitter follower ng aktres na palaban.

Iyon ang latest tungkol sa kanilang dalawa.

Sarah Geronimo – Drama anthology naman ang susunod na project sa Dos

Iniintriga ngayon ng kampo ng kaniyang mga kalaban si Sarah Geronimo. Dahil sa pagtatapos na ng kaniyang show sa Dos ay sinasabi ng mga ito na pabagsak na raw ang career ng magaling na singer-actress. Hindi na raw maningning ang kinang ng kaniyang bituin. Kinakabog na raw siya ng mga mas bata at mas punumpuno ng talentong female personality ngayon.

Ganoon ang palaging iniisip ng iba kapag nawawala ang show sa ere ng mga artista at singer, nababawasan na ang kanilang kasikatan kapag ganoon, hindi raw kasi nagre-rate at kumikita ang show dahil tapos na ang pagsuporta sa kanila ng publiko.

Ang hindi nila alam, ang pagtatapos ng show ng mga personalidad ay parang tao rin na nagbibihis lang. Kailangang magbago ng atake at istilo para may bago na naman silang maihain sa manonood.

Sabi ng isang kaibigan naming taga-Winnipeg, Canada, “Sa lahat ng performers na Pinoy na nag-show sa Canada, e, si Sarah lang ang nakapuno ng iba’t ibang venue doon. Nagkasunod-sunod pa nga ang concert niya doon, pero panalo pa rin!

“Siya lang ang Pinoy celebrity na kahit anong panahon mo dalhin sa Canada, kahit winter pa iyon, e, kumikita pa rin. Marami siyang fans, magaling siyang mag-show, kaya nakakaulit siya,” papuri ng aming kaibigan sa magaling na singer-actress.

Sa halip na variety show ay isang drama anthology pala ang ihinahanda ng Viva Entertainment at ng Dos para sa dalaga. Kailangang baguhin ang kaniyang pakete, kailangan niyang sumubok naman sa pag-arte ngayon, dahil mayroon na siyang napatunayan sa pagho-host at pagkanta.

“Si Sarah pa? Ang dami-dami na nilang dumating at nangawala, pero nandiyan pa rin siya. Sa TV at pelikula, e, napakaganda ng iniiwanan niyang marka!” pagtatanggol pa sa magaling na singer-actress ng isang nakausap namin.

Sa totoo lang!

Mariel Rodriguez – Walang katwiran ang pagseselos sa love scenes ni Binoe

Hanggang ngayon, kahit pa matagal na rin siya sa showbiz, ay hindi pa rin sanay sa kultura at kalakaran ng mundong pinasok niya si Mariel Rodriguez. Naaapektuhan pa rin siya ng mga ginagawa ng kaniyang mister na noong makilala niya ay sikat nang artista at wala namang ginawang pagpapanggap tungkol sa kaniyang nakaraan.

Natural lang para kay Mariel ang magselos, pero para sa mas nakararami, ang pagseselos ay dapat niyang inilalagay sa tamang lugar. Artista si Robin Padilla, sikat at guwapo. Hindi talaga maiiwasan na dahil sa tawag ng pangangailangan para sa papel ng gagampanan nito sa pelikula o sa telebisyon man ay magkaroon ng ma eksena ng lambingan sa pagitan ng action star at ng kaniyang leading lady.

Pero may kakitiran ang isip ni Mariel pagdating sa ganoon. Talagang kontra siya sa mga love scenes, ayaw niyang gumagawa ng maiinit na eksena si Robin sa pinagbibidahan nitong proyekto. Doon sumasablay si Mariel para sa ating mga kababayan.

Pero marunong manuyo ng minamahal si Robin Padilla. Para sa kaniya ay ayos lang ang ganoon, tanda lang iyon nang labis-labis na pagmamahal sa kaniya ng babae, pero sumusumpa si Robin na wala itong ginagawang masama.

Nakakaaliw ang mga mensaheng tinatanggap namin ngayon tungkol sa inasal ni Mariel. Malinaw na malinaw ang mga insinwasyon na sa kanilang relasyon ni Robin Padilla ay mas maraming nakikisimpatya sa actor. Kokonti lang ang nakukyutan sa ginawa ni Mariel, heto ang mga mensahe bilang payo sa aktres-TV host.

Unang texter, “Naiinis ako kay Mariel! Mayroon pa siyang pa-baby-baby talk noong humihingi ng sorry sa kaniya si Robin sa Wowowillie. Nakakainis! May pa-babe-babe pa siya, feeling sixteen years old, may pa-bangs-bangs pa siya, hindi na bagay sa kaniya ang mga ganyang drama!’

Isa pang mensahe ang kumakagat naman, pero sa ayaw at gusto ni Mariel ay siguradong kapupulutan niya ng aral, heto ang mensahe.

“Natural lang para sa isang babae ang magselos, lalo na’t isang Robin Padilla ang husband niya. Pero hindi puwedeng gawin ni Mariel ang ganyan sa lahat ng pagkakataon. Baka siya ang makasira sa career ni Robin.

“Imagine, isang eksena lang iyon na ikinaselos niya, ibinalik na niya ang wedding ring niya, umalis na siya, ano iyon? Kitang-kitang masyado ang pagiging selfish niya, makasarili ‘yang si Mariel, intindihin sana niya na artista ang asawa niya na talagang sasalang sa mga ganoong eksena kahit ayaw pa niya.

“Hindi sa lahat ng panahon, eh, puwede siyang suyuin ni Robin. Walang itinago sa kaniya ang asawa niya. Playboy si Robin, Muslim pa, kaya tantanan na ni Mariel ang pagiging childish niya!”

May katotohanan ang opinyon ng aming source, kailangang mas lawakan nga naman ni Mariel ang kaniyang pang-unawa sa propesyong pinili ng kaniyang asawa, hindi sapat ang selos lang para maharangan niya ang pagiging propesyonal ni Robin.

Ibig bang sabihin, dahil kontrang-kontra siya sa mga eksenang sensuwal ay makukulong na sa kung ano ang gusto lang niya ang pagkaaktor ni Robin? Hindi na puwedeng tumanggap ng mga ganoong proyekto ang kaniyang asawa?

Anong klase ng pag-ibig ang puwede niyang ipagsigawan sa buong mundo kung wala naman pala siyang tiwala sa kaniyang mister? Noong makilala niya, makarelasyon at pakasalan si Robin Padilla ay artista na ito, walang mga barahang nakataob sa mesa ang aktor nang maging magkarelasyon sila hanggang sa maging mag-asawa na, kaya kailangang hindi umaarte ng ganyan si Mariel.

Cesar Montano at Sunshine Cruz – Tuluyan nang naghiwalay

Akala ng mas nakararami ay naayos pa ang personal na problema ng mag-asawang Cesar Montano at Sunshine Cruz, pero hindi na pala iyon naisalba. Tuluyan na silang naghiwalay at naghahanap na ng malilipatang bahay ngayon ang aktres para matirahan nilang mag-iina.

Mismong si Mama Alfie Lorenzo, manager ni Sunshine, ang kumumpirma sa balita. Tututok na lang daw ngayon ang aktres sa kaniyang career para mabilis niyang makalimutan ang sakit ng damdamin na ibinigay sa kaniya ng action star.

Ang itinuturong dahilan ng kanilang paghihiwalay ay ang starlet na si Krista Miller. Ayon sa mga kuwento-kuwento ay ilang ulit na raw na nahuhuli ni Sunshine ang pambababae ng kaniyang mister, pero itong huli ang talagang hindi na kinaya pang sikmurain ng aktres.

Nag-usap na pala sila nitong nakaraang linggo, pero labas sa paksa ang kanilang pagbabalikan. Ang sustento lang ng kanilang mga anak ang dahilan ng kanilang komunikasyon.

Naghahanap na ngayon ng matitirahan si Sunshine at ang kanilang mga anak, nakikipag-usap na rin si Mama Alfie Lorenzo sa ABS-CBN. Kailangan nga namang magtrabaho-malibang ng aktres para sa mabilisang paglimot sa naganap sa kanilang relasyon ni Cesar Montano.

Hanggang ngayon ay maganda pa rin si Sunshine, hindi niya rin napabayaan ang kaniyang katawan, may maganda pang hinaharap sa showbiz si Sunshine Cruz.

Jolo Revilla – Nasaktan ang pamilya Revilla sa pasaring ni P-Noy

May kalayuan pa ang mid-election, pero ngayon pa lang ay napakainit na ng takbo ng pulitika ng ating bayan, mararamdaman na ang mga parinigan-pasaringan at pagpapalutang ng kulay ng mga kilalang lingkod-bayan.

Noong Huwebes nang hapon ay nabulabog ang marami sa ginawang pagdalaw ni Pangulong Noynoy Aquino sa Imus, Cavite, nakakita ng kakampi sa kaniya ang partidong kalaban ng kampo ni Jolo Revilla, pero hindi naman naging kagandahan ang reaksiyon ng ating mga kababayan sa mga salitang binitiwan ni P-Noy.

Naging napakasakit para sa pamilya Revilla ang mga pinakawalang patambis ng pinakamataas na pinuno ng ating bayan, lalo na nang banggitin nito ang mga salitang anting-anting at agimat, kung saan nakilala ang pamilya Revilla.

Bahagi ng talumpati ni Pangulong Noynoy, “Paalala lamang po. Asahan na po ninyong may mga nagpapanggap at may mga nakikisakay sa ating krusada.

“May mga nakikisuot ng kulay dilaw pero hindi tiyak kung ano ang kulay ang nasa saloobin.

“Huwag na po tayong umasa sa tsamba o agimat o anting-anting.

“Matuto na po tayong kumilatis ng mga susunod na lider ng bansa upang matiyak na aarangkada tayo sa katuparan ng ating mga pangarap at hindi na lumihis pa.

“Magtiwala po tayo sa tapat na paglilingkod at serbisyong nag-aalab, may prinsipyo at siyempre, may liksi,” bahagi ng talumpati ni P-Noy.

Napakaaga pa para sa mga ganoong klase ng pasaring, ni hindi pa nga nagsisimula ang pormal na entablado de kampanya, pero nakapananakit na ang mga ganoong akusasyon para sa mga tumatakbong pulitiko.

Pero sa halip na masaktan ay dapat pa ngang magbigay-inspirasyon kay Chairman Jolo Revilla at sa kaniyang mga kasamahan ang mga ganoong pasaring, senyal lamang iyon ng matitindi silang kalaban na kailangang wasakin para hindi na nila makopo ang mahahalagang upuan sa lalawigan ng Cavite.

Hindi maganda sa panlasa ang ganitong klase ng hirit. Kailangan pa munang atakihin ang kalaban para makakopo ng silya sa gobyerno. Onli in da Pilipins naman talaga!

Daniel Padilla – Makakapuno kaya ng Araneta ang bagets?

Inuupuan na ngayon ng mga prodyuser ang gagawing first major concert ng tinitiliang bagets ngayon na si Daniel Padilla. Tama, magkakaroon na nga ng ganoon katinding concert ang guwapong bagets young actor, sa April iyon mapapanood sa Smart Araneta Coliseum.

Ayon sa aming source ay makakasama ni Daniel sa kaniyang unang major concert ang kaniyang mga magulang na sina Rommel Padilla at Karla Estrada, inaayos na rin ang page-guest ng kaniyang uncle na si Robin. Siyempre’y kasama rin sa line-up ang kaniyang ka-loveteam na si Kathryn Bernardo.

Ang tanong ng marami, hindi raw kaya napakabilis na paglundag para kay Daniel Padilla ang pagkakaroon ng concert sa Smart Araneta Coliseum? Makakaya kaya niyang punuin ang Big Dome? Sapat na bang garantiya ng concert ang nakabibinging tilian kapag nakikita ng mga kabataang fans ang young singer-actor?

Matapang ang kaniyang mga prodyuser, positibo ang kanilang pananaw na makakayang punuin ng guwapong bagets ang Smart Araneta Coliseum, dahil bukod sa siya ang pinakatinitiliang bagets actor ngayon ay bakasyon na sa mga panahong iyon ang mga estudyante.

“Iyon ang market ni Daniel, kaya itinaon talaga ang concert niya sa pagbabakasyon ng klase,” madiing komento ng aming source na may partisipasyon sa first major concert ng sikat na bagets actor.

Isa pang tanong. Makakasama rin kaya sa kaniyang concert ang tiyuhin niyang si Rustom Padilla, este, BB Gandanghari pala? Ano naman kaya ang gagawin nito kung sakali man?

Akala nami’y nagbibiro lang ang aming source, pero seryoso pala ito, “Si Piolo Pascual ang isa pang pinaplanong maging guest ni Daniel sa first major concert niya.”

Have a comment on this article? Send us your feedback

Marso 1 - 15, 2013

	Ai Ai delas Alas
	Angelica Panganiban
	Ogie Alcasid
	Pauleen Luna
	Baron Geisler
	James Yap
	Kris Aquino
	Iwa Moto
	Isko Moreno
	John Regala

Ai Ai Delas Alas – Eto na naman! Bakit ba laging bigo sa pag-ibig?

Kinumpirma sa amin ng isang impormanteng hindi pa kami kinuryente at sinunog kahit minsan na totoong may problema ngayon ang Comedy Concert Queen tungkol sa kaniyang lovelife.

“Ano pa ang masasabi ko, eh, alam mo na pala pati ang mga nangyari sa ibang bansa? May mga sources ka doon, totoo naman ang mga kuwento. Naaawa lang ako kay Ai Ai delas Alas, ang akala niya kasi, eh, ito na talaga, pero hindi pa pala,” madiing kuwento ng aming source.

Sumusugal sa pakikipagrelasyon si Ai Ai. Wala sa kaniyang bokabularyo ang pagsuko, malay nga naman natin kung sa kasusugal niya ay matagpuan na niya ang lalaking makakasama niya sa habambuhay?

“Pero dahil sugal nga, palagi siyang talo. Panalo lang siya sa umpisa dahil masaya siya, pero sa bandang huli, talo pa rin siya. Minsan nga, eh, tinatanong na rin ni Ai Ai ang sarili niya kung saan siya nagkakamali.

“Sobrang luwag ba siya? Spoiled ba ang boyfriend niya? Nagsasawa ba sila sa isa’t isa dahil palagi silang magkasama? Maraming bagay-bagay ang ikino-consider niya kung bakit hindi nagiging successful ang pakikipagrelasyon niya,” kuwento ng aming kausap.

Kung ang mga nagmamalasakit na kaibigan ng Comedy Concert Queen ang hihingan ng opinyon ay mas gusto ng mga ito na tapusin na niya ang pakikipagrelasyon kay Jed Salang habang maaga pa.

“Hindi na kasi healthy ang relasyon nila, eh. Mas marami na silang hindi pinagkakasunduan kesa sa nagba-bond sa kanila. Mag-iwan sana si Ai Ai nang kahit konti para sa sarili niya, huwag na niyang ipaagaw pa iyon sa kaniya,” makahulugang reaksiyon ng aming source.

Pero ibang klaseng magmahal si Ai Ai, mauntog man siya nang ilang beses ay ayos lang sa kaniya, hinihintay pa muna niyang magkabukul-bukol siya bago isuko ang kaniyang pagmamahal.

Ilang beses na kaming naging saksi sa pakikipag-ibigan ni Ai Ai. Walang natitira sa kaniyang kaban kapag nagmahal siya. Todo-bigay ang Comedy Concert Queen, hindi bale nang siya ang mawalan, basta mayroon lang ang kaniyang mahal.

“Iyon nga ang mahirap sa kaniya, eh. Ibinibigay niya ang lahat-lahat, masyadong spoiled ang lalaki, kaya ang ending, eh, nababalewala na ang emotion at ang nakalalamang na, iyong material.

“Hindi naman niya binibili ang love, pero ganoon siyang magmahal, super-spoiled sa material things ang lalaki sa kaniya. Tama, pero mali rin, di ba?” panghihingi pa ng opinyon ng aming kausap.

Puso ng Comedy Concert Queen ang nakataya sa usaping ito. Kung maligaya pa siya sa piling ni Jed Salang ay sino naman ang kahit sino diyan para humarang sa kaniyang kaligayahan?

Marami lang kasing nagmamahal at nagmamalasakit kay Ai Ai delas Alas. At kapag mahal mo ang isang tao, natural lang na ayaw mo siyang makitang nasasaktan, hindi mo ituturing na musika ang kaniyang pag-iyak.

Matigas ang ulo ng taong nagmamahal, ang mali sa pananaw ng buong mundo ay tama pa rin para sa kaniya. Ganoon katarantado ang puso ng isang nagmamahal. Walang nakikitang mali, walang naririnig na palso, rosas na rosas ang kaniyang paligid.

Dahil mabuting tao naman si Ai Ai delas Alas ay umasa na lang tayo na sana’y dumating na ang natatanging araw na iyon para makilala niya ang wastong lalaking magmamahal sa kaniya bilang siya.

Sabi nga, ang mabubuting tao ay pinepremyuhan, ang mga salbahe ay pinarurusahan. Di ba?

Angelica Panganiban – OA na! Tigilan na ang pagdakila kay JLC!

OA kung ilarawan ng marami si Angelica Panganiban. Wala raw namang problema kung dakilain man niya si John Lloyd Cruz, natural lang naman ang ganoon sa isang nagmamahal, pero ang iangat ang kaniyang karelasyon para lang ibagsak ang ibang tao ay hindi na tama.

Komento ng aming kausap, “She’s OA! Napaka-OA niya talaga! Gusto ko siya dati, eh, pero dahil sa mga pinaggagagawa niya at itinu-tweet ngayon, ayoko na sa kaniya!

“Sino naman ang mapapaniwala niya na sa six-seven years nilang relasyon ni Derek Ramsay, eh, hindi man lang siya naalalang bigyan ng flowers noong tao? Di ba naman, sobrang pagiging OA na ang mga emo-emo niya sa Twitter ngayon?

“Purihin niya to high heavens si John Lloyd, walang problema doon, but she’s doing it to ruin Derek! Flowers lang, gaganoonin na niya ang ex niya? Ganoon pala’t iresponsable ang boyfriend niya, eh, di hiniwalayan na sana niya agad?

“Sa unang taon siguro ng kanilang relasyon, eh, puwede pa siyang napaniwala lang ni Derek, bulag siguro siya sa pagmamahal, kaya napalalampas lang niya ang mga shortcomings noong tao!

“Pero sa second, third, fourth, fifth, sixth at seventh year ng relationship nila, hindi pa rin niya kilala ang boyfriend niya? Huwag nga niyang gawing bobo ang publiko? Huwag nga siyang OA!

“Purihin na lang niya si John Lloyd hanggang gusto niya, pero huwag niya namang masyadong ibinabagsak at sinisiraan ang ex niya! Bakit sila tumagal nang seven years kung puro pangit lang naman pala ang ipinakikita sa kaniya ni Derek?

“Hay, naku! Tamaan na sana ng kidlat ang nagsisinungaling sa kanilang dalawa!” naiinis pang komento ng aming source.

Oo nga naman. May katwiran ang katwiran.

Ogie Alcasid – Siguradong lilipat na sa Kapatid Network

Ayon sa aming source ay sigurado na ang pagkabilang-bakod ng singer-composer-comedian na si Ogie Alcasid sa TV5. Konting-konting panahon na lang ang kailangang hintayin at isang araw ay magiging kumpirmado nang kapatid si Ogie.

Ang tanong ng marami ngayon ay kung makakasama ba niya sa paglipat sa TV5 si Regine Velasquez. Totoo rin bang mayroon nang unang pag-uusap na hihintayin lang muna ng kaniyang misis ang isang magandang tiyempo, at lilipat na rin ang Asia’s Songbird sa Kapatid Network?

Iyon ang kailangan nating abangan. Iyon ang latest.

Pauleen Luna – Hindi gold-digger! Hindi nanggaling sa pobreng pamilya

Nakakaawa naman si Pauleen Luna. Kumaliwa siya’t kumanan ay hagip pa rin siya ng paghusga na pera lang ang habol niya kay Vic Sotto. Kahit pa siguro magpakamatay sa pagtatrabaho ang dalaga ngayon ay ganoon pa rin ang mangyayari, malisyoso pa ring ipipilit ng iba na wala siyang habol sa sikat na aktor-TV host kundi ang kayamaman nito, nakakaawang babae.

Bago pa man naging magkarelasyon sina Pauleen at Bossing Vic ay masagana na ang buhay ng pamilya ng young actress, malawak ang lupain ng pamilya ng kaniyang ama sa Valenzuela, taga-Greenhills na noon ang mga Luna.

At bilang matagal nang naninirahan sa lunsod na pinag-ugatan ni Pauleen ay alam namin kung gaano kaayos ang pamilyang kinabibilangan niya. Hindi kailangan ng batang aktres ng isang masasandalang lalaki para sa kaniyang kabuhayan, nagkataon lang talagang mahal niya si Vic Sotto at iyon lang iyon.

Sa totoo lang, hanggang ngayon ay kontrang-kontra ang pamilya ng kaniyang ama sa relasyon nila ni Vic Sotto, edukado lang talaga ang mga ito kaya ang respeto nila sa aktor-TV host ay nandoon pa rin.

Sabi ng isang source na malapit sa pamilya ni Pauleen, ‘Nakakaawa naman siya, nagmahal lang naman iyong tao, pero sa pakikipagrelasyon niya, e, wala naman siyang ibang motive kundi ang maging masaya lang.”

Ganoon yata talaga. Hindi ibinibigay sa isang tao lang ang lahat ng porma ng tagumpay. Masaya nga ngayon si Pauleen Luna, pero nandiyan naman ang mga usap-usapan na pera lang ang habol niya kay Vic Sotto, nakalulungkot naman talaga.

Baron Geisler – Mahusay na actor pero lulong sa masamang bisyo

Ano pa kaya ang dapat gawin ng mga taong nagmamalasakit para magbago na talaga si Baron Geisler? Ipinasok na siya sa rehab, nangako naman siyang magbabago na, pero ang lahat ng mga iyon ay puro pangako na napako lang.

Hindi pa rin niya iniiwasan ang sobrang paglalasing, patuloy pa rin ang kaniyang bisyo, at kapag nasa ilalim na siya ng ispiritu ng alak ay nanggugulo na siya.

Naghahanap siya ng away, ng gulo, kahit sino ay hinahamon niya ng suntukan. Hindi na maganda ang mga ipinakikita ni Baron, hindi na gawain ng isang taong nasa wasto pang pag-iisip ang nakikita sa kaniya, panahon na talaga para sumailalim siya sa mahabang proseso ng gamutan.

Noong nakaraang Miyerkoles nang gabi ay nanggulo na naman si Baron sa taping ng seryeng Kidlat na pinagbibidahan ni Derek Ramsay. Kontrabida siya sa nasabing matagumpay na palabas ng TV5, magaling kung sa magaling si Baron kung pag-arte ang pag-uusapan, pero bilang tao ay laglag siya dahil sa kaniyang nakauumay nang pagbibisyo.

Dumating siya sa Boys Town nang langong-lango, maingay, naghahanap ng makakaaway. Nakita niya ang isang kaibigan ni Derek, hinamon niya ito ng suntukan, pasalamat si Baron dahil alam ng taong iyon na matapang lang siya kapag nasasayaran na ng aguda de pataranta ang kaniyang lalamunan.

“Natural, nahinto nang matagal ang taping, malaking abala ang ginawa ni Baron. Alam n’yo naman na kapag nade-delay ang taping, e, malaking gastos ang ibig sabihin noon para sa production, di ba?

“Noong inaawat na siya ng mga nandoon, e, mas nagpupumiglas pa siya, nagwawala siya, hanggang sa pinalabas na siya ng mga guwardiya. Noong nasa labas na siya ng gate, e, ang mga guards naman ang hinahamon niya ng away!

“Kinakalampag niya ang gate ng Boys Town, sigaw siya nang sigaw, mura siya nang mura, ano ba talaga ang problema ng hinayupak na taong iyon?” naiinis na kuwento ng aming source.

Bilang aktor ay nakapanghihinayang si Baron Geisler dahil hindi lahat ng artista ay mayroon ng talentong hawak niya sa pag-arte. Bilang tao naman ay nakakabuwisit na siya, masarap siyang kutusan dahil hanggang ngayon ay nagpapailalim pa rin siya sa bisyo, wala siyang paninindigan.

James Yap – May karelasyon na! Opposite ng itsura ni Kris

May nakakita noong minsan kay James Yap na may kasamang matangkad at morenang mukhang modelong babae sa isang mall. Natural, mapang-agaw pa rin ng pansin ang dating mister ni Kris Aquino, hindi siya maitatago sa kahon dahil bukod sa pagkakaugnay sa aktres-TV host ay mayroon din siyang mga tagahanga sa mundo ng basketball.

“May dumating pang isang basketball player, pero hindi kilala iyon ng mga miron, basta siguradong kasamahan iyon ni James dahil magkasingtangkad din sila, may kasama ring magandang girl ang lalaki.

“Halatadong ka-date nila ang mga babae, hindi man nagbibigay ng mga signs si James na sila na noong girl, madali nang malaman iyon. Morena ang girl, matangkad, kabaligtaran ni Kris Aquino.

“Nagbago na nga ng taste ngayon si James, ayaw na niya sa maputi, ayaw na rin niya sa hindi katangkaran na tulad ni Kris, nagbago na ang panlasa niya ngayon sa girl,” kuwento ng aming source.

Madaling makakita ng karelasyon si James Yap. Marami siyang katangiang magugustuhan agad ng babae, sikat na sikat pa siya, kalat na kalat na rin ang balita kung gaano kalaki ang halagang nakahati niya nang magpawalang-bisa na sila ng kasal ni Kris Aquino.

“Kung noong hindi pa nga siya ganyan kadatung, e, ang dami-dami na niyang nakakarelasyon, ngayon pa kayang makapal na makapal na ang bulsa niya?

“May karapatan na siyang makipagrelasyon uli ngayon, tapos na sila ni Kris, kaya wala na sana silang pakialaman ngayon,” makahulugan pang komento ng aming kausap.

Kung mayroon nang karelasyon ngayon si James Yap ay wala pang balita kung sino naman ang nagpapaligaya ngayon kay Kris Aquino. May pangalang iniuugnay sa kaniya pero wala pang kumpirmasyon mula sa aktres-TV host kung ang lalaking iyon na nga ang kapalit ni James Yap sa kaniyang buhay.

Kris Aquino – Hindi manloloko! Hindi kasali sa Aman Futures scam

Maraming kapangalan si Kris Aquino. Sobrang dami kung tutuusin, nagkakaiba lang ang kanilang pangalan sa spelling, K ang sa aktres at C naman ang sa ibang mga kapangalan niya.

Ang deka-dekada nang karelasyon ng sikat na salon owner na si Ricky Reyes ay kapangalan ni Kris. Cris Aquino nga lang ito, sa unang letra lang nagkakaiba ang kanilang pangalan, pero sa dinig at bigkas ay pareho lang.

Ang palaging nagwawagayway ng bandila ng Pilipinas kapag umaakyat na sa ring si Congressman Manny Pacquiao ay kapangalan din ng aktres-TV host, Cris Aquino rin ito, lalaking Cris.

May kaibigan kami na Cris Aquino rin ang pangalan, may kakilala kaming Kris Aquino mismo ang dinadalang pangalan, pero hindi sila magkadugo kahit isang patak lang.

Ang boy ng isa naming kaibigan ay kapangalan din ni Kris, kaya kapag pumapalpak ito ay napakataginting ng boses ng aming kaibigan, “Ang syunga-syunga mo talaga, Cris Aquino!”

Noong minsan ay may ipinakilala sa amin ang isang katrabaho, kapangalan din ng aktres-TV host pero mayroon agad itong disclaimer, “Pero hindi ako tactless, ha?” Nakakaaliw.

Daang libo ang kapangalan ni Kris Aquino, kumbaga sa gamot ay napaka-generic ng kaniyang pangalan, sinumang kapangalan niya ang masangkot sa gulo at kalokohan ay magkakaroon talaga ng kalembang ng kampana dahil nga sa siya na sikat na sikat ang kapangalan.

Malaking kalokohan ang pagdadamay sa kaniyang pangalan sa Aman Futures scam, matalino si Kris Aquino at may ekstensiyon iyon ng katalinuhan sa paghawak niya ng pananalapi, puwedeng gastador siya pero hindi naloloko dahil una ay hindi naman siya suwitik.

Ang mga taong hindi mapaghangad sa pera ay hindi naloloko sa mga scam, ang mga taong hindi naniniwala sa lumolobong interes ay hindi nagsisisi sa bandang huli, mas totoo ang maliliit na halagang pinaghihirapan kesa sa milyun-milyong nakadrowing lang.

Iwa Moto – Kumpirmadong nagdadalang-tao na

Kumpirmado! Tatlong buwan nang nagdadalantao ngayon si Iwa Moto sa kaniyang karelasyong si Pampi Lacson. Noong unang mabalitaan namin ang istorya ay wala kaming natanggap na pagtanggi mula sa palabang aktres, maging sa kaniyang nanay-nanayan at tumatawong manager niyang si EP Omar Sortijas, kaya lang ay mayroon silang pakiusap.

Huwag daw muna naming susulatin ang pagdadalantao ni Iwa, marami pa kasi silang inaayos ni Pampi, pero kapag puwede nang magsalita ang aktres ay sa kaniya mismo iyon manggagaling.

Hindi namin iyon inunahan, nanindigan kami sa aming pangako kina Iwa at Omar na sasarilinin lang muna namin ang katotohanan, hanggang sa isang araw ay may nakakita sa aktres sa Alabang Town Center na malaki na ang tiyan.

Tinanong siya ng aming kasamahan-anak-anakang si Rommel Gonzales kung nagdadalantao siya. Hindi niya sinagot ang tanong na may halong showbiz, nagpakatotoo siya, si Pampi Lacson ang ama ng kaniyang dinadala.

Nitong nakaraang Biyernes nang hapon habang nakasalang kami sa radyo ay nakatanggap kami ng mensahe ng panghihingi ng paumanhin mula kay Iwa. Sorry raw dahil lumabas ang balita nang hindi sinasadya, hiyang-hiya ang aktres sa amin, dahil ang kaniyang pangako ay sa Ang Latest siya unang aamin tungkol sa kaniyang sitwasyon.

Pero ayon sa aktres ay babawi siya kapag puwede na siyang lumabas para sa isang seryosong panayam, wala siyang planong umalis ng bansa para itago ang kaniyang pagdadalantao, paninindigan niya ang pinasok niyang sitwasyon.

At ang kaniyang pagtatapos sa mahaba niyang text message ay positibo, “Haping-happy po ako ngayon, Nanay.” Maligaya siya dahil sa wakas ay natupad na ang kaniyang pangarap na magkaroon ng sariling anak. Mas maligaya siya dahil pinaninindigan ni Pampi Lacson ang sanggol at tanggap ng magkabilang pamilya ang kaniyang pagdadalantao.

Vice Mayor Isko Moreno – Pinag-iinitan ni “Dirty Harry”

Napakaagang lumutang ng salpukan ng politika sa lunsod ng Maynila. Hindi pa man pormal na nagsisimula ang entablado de kampanya ng mga tatakbong politiko doon ay heto at ramdam na ramdam na ang kanilang pagpepersonalan.

Napanood namin ang ginawang panghuhuli ng mga pulis sa mga konsehal ng Maynila, patulak silang isinasakay sa nakaabang na mobile, ilegal daw kasi ang pa-bingong ginawang proyekto ng mga konsehales.

Sa isang bahagi ng video ay kitang-kita ring itinutulak ang kanilang vice-mayor, totoo, kasama ring hinuli ng mga pulis si Vice-Mayor Isko Moreno.

Panglimang taon na ngayon ang ginagawang pa-bingo ng grupo ni VM Isko, pero ngayon lang hinusgahang ilegal ang kanilang pa-bingo, kasi nga ay hindi na sila magkatiket ngayong darating na eleksiyon ni Mayor Fred Lim.

Nakakalungkot ang mga ganitong pangyayari. Nang dahil lang sa politika ay maraming personalidad ang napapahiya at lantarang hinihiya, ang hinuhusgahan at pinarurusahan, kahit pa pilipit naman ang dahilan.

Matapang na nagpahayag si VM Isko na politika lang ang dahilan ng panghuhuli sa kanila, walang katotohanan na ilegal ang kanilang pa-bingo, dahil may basbas iyon ng kanilang mayor sa loob nang nakaraang apat na taon.

Natural lang na nagalit ang dating Pangulong Joseph Estrada sa nangyari, sinabi nito at ipinarating sa mga pulis-Maynila na hindi ito natatakot kay Dirty Harry (bansag kay Mayor Lim), darating din daw ang takdang panahon na huhusgahan ng mga mamamayan ng Maynila ang ginawa ng kanilang mayor.

Nakakalungkot na nakakagalit ang mga ganitong senaryo. Nananawagan ang mga politiko para sa isang maayos, tahimik at parehas na proseso ng botohan, pero sila-sila rin mismo ang sumisira sa kanilang mga ipinananawagan, ganoon ba ang mga sinasabing magandang ehemplo para sa kanilang mga nasasakupan?

Aysus naman!

John Regala – Hindi totoong may cancer

Naintriga kami sa mga pagmamarakulyo ngayon ni John Regala. Mayroon daw kasing aktor na nagpapakalat ng balita na mayroon siyang cancer, malala na raw ang kaniyang sakit, samantalang wala naman siyang karamdaman.

“Cancer sa bulsa, mayroon ako, wala akong pera sa bulsa kapag dumudukot ako! Iyon ang klase ng cancer na mayroon ako!” madiin at sarkastikong pahayag ng magaling na character actor sa Ang Latest Updated.

May motibo raw ang aktor na nagkakalat ng ganoon kasensitibong balita, gusto raw kasing masolo ng nasabing personalidad ang trabaho, kaya sinisiraan siya nito.

Galit si John Regala dahil paano raw siya magkakaroon ng trabahong pambuhay sa kaniyang pamilya kung ganoon na ipinagkakalat ng kaniyang kapwa aktor na may malala na siyang sakit?

“May mga anak ako, kailangan ko silang buhayin. Ang nanay ko, eh, matanda na, kailangan na niyang magpahinga, pero kumakayod pa rin siya. Gusto ko silang buhayin at tulungan, pero may naninira sa akin!” madiin pang pahayag ni John.

Ayon kay John Regala ay maramot daw ang aktor na naninira sa kaniya, hindi raw parehas kung lumaban, sa letter I daw nagsisimula ang pangalan ng kapwa niya aktor na nagpapakalat ng mga paninira tungkol sa kaniya.

Have a comment on this article? Send us your feedback

Marso 16 - 31, 2013

	Maja Salvador & Kim Chiu
	Nora Aunor
	Marion Aunor
	Jovic Monsod & BB Gandanghari
	Heart Evangelista & Sen. Chiz Escudero
	Ai Ai delas Alas
	Piolo Pacual & Angelica Panganiban

Maja Salvador – proud na boyfriend niya si Gerald Anderson

Sobra pala ang pagka-proud ni Maja Salvador sa kaniyang boyfriend na si Gerald Anderson. Sa lahat kuno ng kagamitan niya ay nandoon ang picture ni Gerald. Lalo na sa kaniyang phone, puro retrato ng mestisong aktor ang makikita doon.

Totoo kaya ang kuwento ng mga becki na kahit nagpapa-make-up lang si Maja ay kailangan pa niyang idispley ang picture frame ni Gerald sa tabi niya?

Si Maja raw ang talagang nagpapakita ng sobra-sobrang pagmamahal kay Gerald, mukhang tinamaan siya nang todo ng pana ni Kupido sa guwapong young actor. Wala siyang bukambibig kundi ang kaniyang boyfriend.

Komento ng isang kausap namin, “Siyempre, gagawin niya talaga ang ganoon para pasakitan niya ang dati niyang BFF na si Kim Chiu. May gusto siyang patunayan kaya ginagawa niya ang ganiyan.

“Nag-iinisan kasi sila, kaya ayun ang Maja, talagang iniinis niya ang dating kaibigan niya. Pero hindi kaya niya naiisip na hindi naman siya nakakasigurado kay Gerald? Paano kapag nag-break na sila?” bitin pang opinyon ng aming kausap.

Hindi ngayon lang nakipagrelasyon si Maja. Mayroon ngang mga kuwento sa kanilang network na para lang siyang nagbibihis kung magpalit ng karelasyon, pero siguro nga ay ngayon lang siya tinamaan nang husto kay Gerald Anderson.

“Marespeto kasi si Gerald, mabait iyong bata, saka hindi siya iyong tipong madaldal. Wala kang maririnig na kahit ano sa kaniya. Nakita ninyo naman noong inuupakan siya ng kampo ni Sarah Geronimo, may sinabi ba siya?

“Sana nga, magtagal sila ni Maja,” komento naman ng isang malapit sa binatang aktor na nakakuwentuhan namin noong minsan.

Nora Aunor – Balik PH, nagpa-opera na ba o hindi?

Nakabalik na pala sa bansa si Nora Aunor. Halos tatlong linggo siyang namalagi sa Amerika para sa kaniyang pagpapaopera sa lalamunan, pero hanggang sa sinusulat namin ang kolum na ito ay hindi pa kumpirmado, nakapagpaopera ba siya o hindi?

Ang latest ay magsisimula na uli siyang mag-taping para sa Never Say Goodbye. Kaya kung may mga tagahanga man ang Superstar na nainis sa maaga niyang pagkawala sa kuwento ng serye ng TV5, muling magbubunyi ang mga ito sa pagbabalik ng kanilang idolo sa takbo ng istorya.

Alam naman natin ang kalakaran tungkol sa mga teleserye, kapag pasaway ang artista at nagkakaroon na ng problema sa kaniya ang produksiyon ay napakabilis pumatay ng karakter ng mga sumusulat ng kuwento. Pero kung talagang kailangan ay mayroon din silang kakayahang bumuhay uli ng karakter bitbit ang kung anu-anong dahilan.

Patay na si Nora Aunor sa Never Say Goodbye, binaril siya at nahulog sa tulay, ganoon ang insinwasyon sa takbo ng teleserye. Pero dahil nandito na siya uli ay madaling gawan iyon ng paraan. Ano ba namang palabasin ng sumusulat ng istorya na noong bumagsak si Nora ay may nakakitang basurero sa kaniya at tinulungan siya, di buhay na uli si Nora Aunor!

At maganda naman kung magiging bahagi pa rin siya ng kuwento. Baligtarin man natin ang mundo at muling itaob, si Nora Aunor ay si Nora Aunor pa rin sa anumang lengguwahe.

Makadadagdag pa rin siya sa istorya at hindi makababawas. Interesante pa ring tutukan ang teleserye dahil may isang Nora Aunor doon. Ang tanong na lang nina Phillip Villanueva at Bradly Guevarra ay kung may suot pa rin kayang bonnet na puti ang Superstar sa kaniyang pagbabalik?

Kung hindi pa rin nakapagpaopera ng lalamunan si Nora sa kaniyang pag-alis ay mabibigo ang kaniyang mga tagasuporta na muli siyang makita sa gitna ng entablado pagkatapos nang mahabang panahon na kumakanta.

Hindi pa rin maririnig ang gintong tinig ng Superstar.

Marion Aunor – Isa pang Aunor ang sumisikat ngayon

Bukod sa Superstar ay may isa pang Aunor na nagiging sentro ng mga kuwentuhan ngayon, si Marion Aunor, ang singer-composer na panganay ni Maribel Aunor ng dating Apat Na Sikat.

Si Marion ang nanalong 3rd placer sa katatapos lang na Himig Handog. Pumangatlo lang siya mula sa labingdalawang naglaban-laban, pero ang piyesa niyang If You Ever Change Your Mind ang pinagpipistahan ngayon.

Kung masang-masa ang timbre ni Lala ay tunog-banyaga naman ang boses ni Marion. Maraming nagsasabi sa unang pagkarinig pa lang sa kaniyang boses na pinagbiyak iyon sa boses nina Nora Jones at Adelle.

Wala ni sa hinagap ni Lala na papasok sa ganoong labanan ang kaniyang panganay, mahilig siyang kumanta, pero nasorpresa si Lala nang magpasok si Marion ng lahok sa Himig Handog.

“Libo-libo ang entries, huli na noong malaman ko na sumali pala siya. Imagine, napakahaba ng process na pinagdaanan niya. Tuwang-tuwa siyempre ako dahil singing din ang passion ko,” sabi ni Lala.

At ang kasalu-saludo sa dalagang ito ay pinagsabay niya ang kaniyang pangarap at ang kaniyang pag-aaral. Sa March 23 ay magmamartsa na siya sa Ateneo de Manila University kipkip ang diploma para sa kursong Communications Technology Management.

Sabi ng kaniyang ina, “Hindi ko nga alam kung paano niya nagawa ang lyrics ng kanta, eh, hindi pa naman siya nagkakaroon ng boyfriend. Oo naman, we’re so proud of Marion, lahat kami sa pamilya, sobrang proud sa kaniya.

“At ang ikinatutuwa ko pa, nakaya niyang pagsabayin ang dream niya sa pag-aaral niya. May magmamartsa na akong anak sa March 23, parang kailan lang iyon,” sumisilip ang luha sa mga mata na pahayag ni Maribel Aunor.

Kapagma-pagmalaki nga naman ang talento ni Marion Aunor.

Bb Gandanghari – Mommy Eva lang ang nanood ng Halik ng Tarantula

Walang pinamilian si Mommy Eva Cariño kundi ang tanggapin na lang ang kasalukuyang situwasyon ng kaniyang anak na si Rustom Padilla na si BB Gandanghari na ngayon.

Ang hiling ni BB sa kaniyang mga interbyu, sana raw ay makapanood ng stage play, Halik ng Tarantula, na pinagbibidahan niya ang kaniyang buong pamilya pero ang dumating lang ay ang kaniyang ina. Hindi nakayang tiisin ni Mommy Eva ang kaniyang anak.

Hanggang ngayon ay hindi pa rin tanggap ng magkakapatid na Padilla ang piniling buhay ni Rustom. Para sa kanila ay walang BB Gandanghari, si Rustom pa rin ang kanilang kapatid.

Si Robin Padilla kapag iniinterbyu ay hindi naman nagsasalita nang sobrang laban sa kaniyang kapatid. Pero bukas ang bibig ng sikat na action star sa pagsasabi na bibilang pa siguro nang mahabang panahon, bago nila tuluyang matanggap si BB Gandanghari.

“Kung doon siya maligaya, dumoon siya. Pero kapag kaming magkakapatid ang tatanungin, hindi pa siguro namin kayang makita ang kapatid namin sa ganiyang sitwasyon,” marespetong komento ni Robin.

Pero iba nga ang pusong-ina, walang nagawa si Mommy Eva kundi ang suportahan si BB Gandanghari. Wala man ang iba pa nitong mga anak ay dumating ang ina para panoorin ang kaniyang anak.

“Nagugulat lang ako sa mga nakita kong eksena kanina. Hindi ako sanay na makita ang anak ko na ganiyan ang mga ginagawa. Pero nagulat lang naman ako. Noong kalaunan, naintindihan ko nang palabas nga lang pala ang pinanonood ko,” banayad na komento ni Mommy Eva.

Bibilang pa nga siguro nang mahaba-habang panahon bago matanggap ng kaniyang mga mahal sa buhay ang kasalukuyang sitwasyon ni BB Gandanghari. Ayon sa dating mister ni Carmina Villaroel ay naiinip na rin siya sa paghihintay. Pero naiintindihan niya naman ang kaniyang mga kapatid, kaya nakalulungkot man ay handa pa rin siyang maghintay.

Chiz-Heart romance – Pinagdududahan kung election gimik o hindi

Maraming kababayan natin ang kinikilig kapag nakiktia nilang magkasama sina Senador Chiz Escudero at Heart Evangelista. Maraming ganoon, tulad na lang ng mga nakakuwentuhan namin noong makita nila sa isang isla sa Quezon na magkasama ang magkarelasyon, hitsura raw kasi ng mga love birds sa dalawa.

Pero bakit ganoon? Kapag mga kababayan naman nating may koneksiyon sa mundo ng politika ang narinig mong nag-uusap ay parang kuwestiyonable para sa kanila ang relasyong Senator Chiz-Heart?

Bakit parang ayaw nilang maniwala na totoo ngang nagmamahalan ang dalawa? Bakit nga ba ganoon ang pananaw ng mga politiko sa pakikipagrelasyon ng bagets pang mambabatas?

May isa pang nagsabi noon sa amin, “Ang galing-galing talagang tumayming ni Senator Chiz! Malapit na kasi ang election, kailangan na niyang may makarelasyon!”

Kung bakit parang nagkataon naman na ilang linggo lang pagkatapos ay lumutang na agad ang kuwentong nililigawan nga ng senador ang aktres, hanggang sa maging magkarelasyon na nga sila, tiyempo lang ba iyon o sinadya talaga?

May karapatang lumigaya sina Senador Chiz at Heart, tutal naman ay pareho silang malaya. Pero wala rin silang magagawa sa mga taong nagdududa sa kanilang relasyon.

Iyon ang malaking presyong kailangan nilang pagbayaran sa pagiging sikat, sa pagiging magandang paksa, dahil sa magkaiba nilang mundo na parehong gustong-gustong pinanghihimasukan ng maraming tao.

Lantad ang sobrang suporta at pagmamahal ni Heart sa senador, ganoon din ang politiko sa aktres, pero sa kabila nga noon ay marami pa ring kumukuwestiyon sa kanilang pagmamahalan.

Ano nga ang sabi? Kapag magkasama pa ay pilit na pinaghihiwalay, pero kapag hiwalay na, pilit namang pinagbabalikan.

Simpleng wan plus wan ng relasyong showbiz.

Ai Ai Delas Alas – Balik-BF, kulay rosas na naman ang paligid

Kulay rosas na uli ang kapaligiran para kay Ai-Ai delas Alas. Aminado naman ang Comedy Concert Queen na nitong mga huling lingo ay naging magulo ang kanilang relasyon ni Jed Salang. Nagkaroon sila ng hindi pagkakaunawaan, nagpalipas ng sama ng loob sa Amerika ang sikat na komedyana.

Pero tapos na ang kuwento, nagkabalikan uli sina Jed at Ai-Ai, ang pagsisimba agad sa Baclaran ang kanilang ginawa nang magkausap na sila nang masinsinan at magdesisyong muling buuin ang kanilang relasyon.

Matinding magmahal si Ai-Ai, kilalang-kilala siya ng kaniyang mga kaibigan pagdating sa aspeto ng pakikipagrelasyon. Walang itinitira ang Comedy Concert Queen para sa kaniyang sarili.

Todo-todo siyang magmahal, pinaiikot ng pagmamahal ang kaniyang mundo. Kaya kapag nawala iyon sa kaniya ay para siyang namatayan. Maraming beses nang nagmahal at nabigo si Ai-Ai, pero sumusugal pa rin siya. Gusto niyang patunayan sa kaniyang sarili na isang araw ay makikilala rin niya ang lalaking makakasama niya sa habambuhay.

At bakit nga naman ang hindi? May karapatan siyang lumigaya, siguradong isang araw nga ay may ibibigay na tamang tao para sa kaniya ang kapalaran, gusto nga sana ni Ai-Ai na si Jed Salang na iyon.

Okey na uli si Ai-Ai delas Alas ngayon. Kulay rosas na ang kaniyang paligid. Makapagtatrabaho na naman siya nang maayos ngayon dahil para sa komedyana ay madilim ang isang mundo kapag wala siyang minamahal.

Piolo Pascual – Ayaw tantanan, hari ba o reyna?

Nakakaawa rin si Piolo Pascual. Lahat na lang ng paraan para palutangin ang matagal nang pinagdidiskusyunang kasarian niya ay lumulutang sa lahat ng pagkakataon. Paano nga ba niya haharangin ang ganoon?

Nakapusod siya sa bago niyang serye. Ano’ng komento ng ating mga kababayan? Sa wakas, natupad na rin ang kaniyang pangarap na magpusod, tirintas na lang ang kulang sa kaniya.

Noong gabi ng parangal ng PMPC ay inabutan siya ng bouquet of flowers. Kung ibang aktor ang hinandugan noon ay wala naman sanang isyu, pero si Piolo Pascual nga ang binigyan, kaya kumawag na naman ang sanga-sangang dila ng mga nakasaksi.

Kung si Derek Ramsay ba ang inabutan ng bouquet ay may alingasngas na lalabas? Kung si John Lloyd ba ang tumanggap ng pumpon ng bulaklak ay magkakaroon ng isyu?

Pero dahil si Piolo Pascual nga ang inabutan ng bouquet ay nagsalimbayan agad ang mga komento, feeling daw ni Papa Piolo ay beauty queen siya, pakiramdam daw ng aktor ay siya ang tinanghal na reyna sa isang gay beauty contest.

Napakahirap ng kalagayan ni Piolo Pascual. Kahit saan siya sumuling ay talo siya. Kumanan siya’t kumaliwa o gumitna ay siya pa rin talaga ang pinagtutuunan ng pansin pagdating na sa isyu ng pagiging bakla.

Sabi nga ng isang kaibigan namin, “Iyong nakatago lang naman at iyong wala ang hinahanap, di ba? Kung nandiyan na sa harapan mo, kung nakikita mo na, hahanapin mo pa ba naman iyon?”

Parang naririnig uli namin ang nagsusumbong na boses ng isang aktor sa kaniyang kaibigan noong malagay ang kaniyang kasarian sa indulto, “Ano ba ang gusto nilang gawin ko. Ang magpakamatay na lang?”

Nakakalungkot.

Gawad Tanglaw – Best columnist in Filipino para kay Nay Cristy

Ginanap na ang taunang pamamahagi ng parangal ng Gawad Tanglaw, isang grupong binubuo ng mga propesor at guro mula sa iba’t ibang unibersidad na masusing nagmamasid sa mundo ng lokal na aliwan, ang pagpapahalaga ay gaganapin sa Colegio de San Juan de Letran sa Calamba, Laguna.

Mula sa TV5 ay pinarangalan sina Paolo Bediones bilang Best News Program Anchor, Best Public Affairs Program naman ang Public Atorni, Best Game Show ang One Million Peso Money Drop ni Bossing Vic Sotto at Best Drama Anthology ang Untold Stories ni Amy Perez.

Mula sa puso ay nais naming pasalamatan sina Dr. Romeo Flaviano Lirio, Dr. Jaime Ang, Ms. Teresita Bagalso, Ms. Maria Consuelo Rivera, Dr. Merlina Oreta at ang kanilang pangulo, si teacher Norman Mauro Llaguno.

Ang inyong kolumnista po, sa ikalawang taon, ay nakatanggap naman ng parangal sa larangan ng panulat bilang Best Columnist in Filipino.

Ang pagsusulat sa sarili nating wika ang una naming pag-ibig. Mabubuhay at mamamatay kaming nagmamahal sa aming propesyon. Napakayaman ng ating wika, sumasayaw-gumagalaw ang ating mga salita, musika ito sa ating pandinig na walang kakupas-kupas at napakasarap tutukan nang walang kasawa-sawa.

Ang mga magulang naming guro ang tunay na naglinang sa amin ng pagmamahal sa lokal nating dila. Umiindayog kung magsalita ang aming ama. Si Nanay naman ay punumpuno ng lalim at lohika ang mga binibitiwang salita. Hindi krimen sa aming bahay ang magsalita ng Ingles pero laganap sa kabahayan ang pagbibigay-importansiya sa sarili nating wika.

Batambata pa kami noon, nasa unang grado pa lang, kapag isinasama kami ni Nanay sa pamimili ng buwanan naming kagamitan sa San Jose City ay tatlong tula ang nabubuo namin mula sa Sicsican habang sakay kami ng Baliwag Transit.

Umiikot ang paksa sa mga nakikita naming nagtatanim ng palay, pero pinakamasarap ibuo ng tula ang masaganang ani, lalo na kapag kulay ginto na ang iyong kapaligiran dahil sa mga gapasin nang palay.

Kung minsan ay mababaw ang atake, kapos sa paglalarawan sabi ng aming ina, pero ang napakaaga pala naming pagkahilig sa pagsulat ng mga tula ang naging ugat ng isang pangarap na ngayon ay isang katotohanan na.

Maraming-maraming salamat sa lahat ng mga bumubuo ng Gawad Tanglaw sa napakasarap nilang pagtatangi at pagtitiwala.

Mabuhay kayo!

Have a comment on this article? Send us your feedback

Abril 1 - 15, 2013

	Sen. Chiz Escudero & Heart Evangelista
	Kris Aquino
	James Yap
	James Yap, Bimby at Kris Aquino – noong masaya pa ang pamilya
	Nora Aunor
	Angel Locsin
	John Prats
	Jayson Francisco & Melai Cantiveros

Sen. Chiz at Heart Evangelista – May kulay ba ng politika ang intriga?

Ang mundo ng showbiz ay walang iniwan sa palengke. Minsang matumal ang benta, minsan namang kinakapos ang mga produkto sa dami ng mamimili, sabay-sabay silang humuhugos at dumarating.

Tulad ngayon. Pagkatapos nang maraming buwan ng kawalan ng mga isyu ay sabay-sabay namang naganap ang mga kontrobersiyang hindi mo malaman kung saan-saan nanggaling at kung alin sa kanila ang iyong uunahin.

Unang pumutok ang kuwento tungkol sa mga disgusto ng mga magulang ni Heart Evangelista laban kay Senador Chiz Escudero. Maraming nagtatanong, itinayming ba iyon ng pamilya ni Heart, kung kailan panahon ng kampanya at malapit na ang eleksiyon?

At sa maraming panahon ng pakikipagrelasyon ni Heart ay bakit ngayon lang lumabas sa kanilang kapribaduhan ang kaniyang mga magulang para maglabas ng kanilang mga hinaing laban sa karelasyon ng dalaga?

Dalawang bagay ang naglalaro ngayon sa isip ng marami nating kababayan. Una, may kulay ba ng politika ang kaganapang ito? Mayroon bang mga tao sa likod ng pamilya ni Heart na ang layunin lang ay ang ilaglag si Senador Chiz sa darating na halalan?

Ikalawa, totoo bang nagpapakita ng kagaspangan ng ugali ang senador kapag nakakainom na? Totoo kayang parang robot ngayon si Heart sa katatango-kasusunod lang sa gustong mangyari ng senador?

Nagkakapalitan sila ng mga patutsada ngayon, ipinaglalaban ni Heart ang kaniyang pag-ibig, na lalo namang ikinagigigil ng kaniyang mga magulang.

Ang buong akala ng ating mga kababayan ay botong-boto kay Senador Chiz Escudero ang pamilya ni Heart Evangelista. Sa biglang paghusga ay sinong mga magulang ba naman ang hindi makatatanggap sa nakaposisyong magiting na lalaki, matalino na siya ay minamanok pa ng publiko, guwapo pa at kamukha raw ni Bamboo?

Pero may mga nakausap ang matapang na kolumistang si Kuya Ramon Tulfo sa isang okasyon, mga kaibigan ng pamilya ni Heart ang mga ito. Nawindang si Kuya Ramon sa kaniyang mga narinig na kuwento tungkol sa mambabatas.

Una, bastos diumano si Senador Chiz. Kapag nagkikita raw ang mga magulang ni Heart at si Senador Chiz sa kaniyang condo unit ay hindi man lang daw tumatayo ang senador para magbigay-pugay sa mga magulang ni Heart. Palagi rin daw lasing ang senador.

Sabi pa raw ng Mommy Baby ni Heart sa kaniyang kaibigan, “Bastos siya, binabastos niya kami, para siyang walang pinag-aralan,” impormasyong ikinagulat ni Kuya Ramon dahil kabaligtaran iyon ng gustong isipin ng kolumnista tungkol kay Senador Chiz.

Reklamo pa ng mga magulang ni Heart, pati raw sila ay hindi na iginagalang ng dalaga. Si Senador Chiz ang itinuturo nilang nagsusulsol sa aktres para gawin sa kanila ang ganoon.

Kontrang-kontra nga raw ang pamilya ni Heart kay Senador Chiz. Nag-aalala ang kampo ng aktres dahil iresponsableng boyfriend daw ang senador, kaya sa ngalan ng pagiging balanse ay kinuha ni Kuya Ramon ang panig ng mambabatas.

Ayon kay Senador Chiz ay wala raw katotohanan ang mga kuwentong nakarating kay Kuya Ramon. May matinding hindi pagkakaunawaan daw na namamagitan kay Heart at sa kaniyang mga magulang, kaya naiipit sa gitna ng mga nag-uumpugang bato si Senador Chiz Escudero ngayon.

Matagal-tagal din naming nakasama si Senador Chiz Escudero. Kongresista pa lang siya noon, tatakbo pa lang na senador, halos linggu-linggo ay regular kaming nagkikita-nagkukuwentuhan.

Wala kaming pakialam sa kaniyang hitsura. Ang mas binigyan namin noon ng timbang at pagpapahagala ay ang kaniyang katalinuhan. Kapag nakausap mo kasi siya nang matagalan ay maiisip mo na lang na noong maghulog yata ng katalinuhan ng utak ang langit ay napakarami niyang nasambot.

Hindi namin kinokontra ang mga pahayag ng mga magulang ni Heart tungkol sa diumano’y kagaspangan ng ugali ng boyfriend ng kanilang anak, iba ang kanilang sitwasyon ngayon sa noon. Pero parang sobra-sobra naman ang negatibong pagkakalarawan ng mag-asawang Evangelista sa senador.

Ang pagbibigay-pugay kahit kanino ay isang katangiang kipkip ni Senador Chiz. Hindi namin lubos na maintindihan kung bakit gagawin niya pa ang kawalan ng respeto sa mismong mga magulang ni Heart.

Pero mahirap pa ring paniwalaan na si Heart Evangelista pa mismo ang magpapabastos kay Senador Chiz sa kaniyang mga magulang. Bababa ang respeto at libido ng lalaki sa ganoong klase ng babae at anak.

Anuman ang totoo sa kuwentong ito ay sila-sila lang ang nakakaalam. Malabo pa sa amin ang kuwento, masalimuot pa ang mga impormasyon. Ang tanging malinaw pa lang sa amin ngayon ay hindi nagsisinungaling si Kuya Ramon Tulfo sa kaniyang istorya.

Kris vs. James – Kanino kayo kumakampi sa labanang ito?

Halos kasunod namang pumutok ng isyu tungkol sa pamilya ni Heart at ni Senador Chiz ang matinding gulo sa pagitan nina James Yap at Kris Aquino. Proteksiyon para sa kanilang anak na si Baby James ang isinangkalang dahilan ni Kris para manghingi siya ng TPO (Temporary Protection Order) mula sa husgado.

Natural, ipinaglaban ni James Yap ang kaniyang karapatan sa bata. Nagpainterbyu ito, naglabas ng kaniyang saloobin tungkol sa mga akusasyon laban sa kaniya ni Kris, na nauwi na sa demandahan.

Nagulantang ang manonood nang sabihin ni James ang may kayabangang sultada ni Kris, ayon sa basketbolista, “Baka hindi mo alam, may three years pa ang kapatid ko?”

Walang nagawa ang petisyon ni James Yap na huwag payagang makaalis ng bansa si Kris Aquino na kasama ang kaniyang anak na si Bimby. Ibinasura lang ng korte ang kaniyang hiling, nakaalis pa rin ang mag-ina papuntang London, nakapuntos doon ang aktres-TV host.

Nanghihinayang naman ang ibang mga nakakausap namin sa pagkasira ng relasyon nina James at Kris dahil ang akala pa raw naman ng mga ito ay nakatagpo na ang TV host ng lalaking tototoo sa kaniya.

Ang kanilang punto ay binata si James, samantalang may anak na kay Phillip Salvador si Kris, pero hindi naging hadlang iyon sa kanilang pagmamahalan.

Naaalala pa nila ang personal na pagpunta ni Kris sa Escalante, Negros Occidental. Sa kaniyang panayam ay sinabi pa ni Kris sa mga magulang ni James na hinding-hindi niya paiiyakin ang basketball player, kaya huwag daw mag-alala ang mga biyenan niya.

“Pero ano ang nangyari? Parang siya pa nga ang namanhikan noon kina James, instead na si James ang mamanhikan sa pamilya niya, di ba? Hindi raw niya paiiyakin si James, pero ano’ng nangyari ngayon?

Tanong naman ng isang ususero, “Bakit noong wala namang napapabalitang girlfriend si James, eh, wala namang mga ganyan? Pero noong mabulgar nang masaya si James sa karelasyon niya, eh, biglang nagkaroon ng ganitong kuwento?

“Ganoon ba talaga si Kris? Kahit tapos na ang relasyon nila ni James, eh, wala pa ring karapatang lumigaya ang ex niya? Ano iyon, insecure na insecure ba siya? O KSP lang talaga?”

Kung totoo ngang sinabi ni Kris kay James na nawawalan ng career ang lahat ng lalaking nakakarelasyon niya nang dahil lang sa minsan niyang pag-iyak ay totoo naman iyon. Pero hindi dapat ipinagmamalaki ang ganoon.

Hindi man lang ba naisip ni Kris na baka matakot na ang mga kalalakihan sa kaniya? Mahirap iyon, ah? Makakarelasyon mo nga si Kris Aquino nang ilang taon, pero pagkatapos naman noon ay maglalaho na ang career ng lalaki, parang may sumpa ang ganoong kalakaran.

Sa lahat ng mga kaganapang ito ay tahimik lang sina Phillip Salvador at Mayor Joey Marquez, bakit pa nga ba naman sila makikisali sa karnabal, samantalang sa magkaibang pagkakataon ay sila ang nasa pinakagitna ng kontrobersiya nang magdadaldal sa himpapawid si Kris?

Mas nanaisin na lang siyempre nilang manood nang malayuan sa teleseryeng ito. Siguradong napapailing ang dalawang dating karelasyon ni Kris, kasabay ang piping komento kay James Yap ng “Welcome to the club, dude!”

Puro pagpalatak ang reaksiyong nakikita namin ngayon sa ating mga kababayang umasang magbibitiw na talaga sa lahat ng kaniyang trabaho si Kris Aquino para tahimik nang manirahan sa ibang bansa kasama ang kaniyang mga anak.

Puro “I told you!” naman ang patambis ng mga nakakausap namin na kailanman ay hindi naniwala sa pahayag ni Kris na nagbibitiw na siya sa lahat ng kaniyang mga programa sa ABS-CBN para mapaglaanan niya nang sapat na panahon ang kaniyang mga anak na sina Josh at Bimby sa ibang bansa.

Hindi pa man kasi nakakadalawang paligo ang mga tumutok sa kaniyang pagbibitiw ay heto, nag-isyu na agad ng opisyal na pahayag ang network ni Kris, na ganito ang kabuuang sinasabi.

“Ms. Kris Aquino and her kids are going on an earlier planned vacation starting today, March 23. Upon her return, Kris will fulfill her commitments to her soap Kailangan Ko’y Ikaw, which is nearing its end. She will also have to stay as a judge in Pilipinas Got Talent till its end on June. Being a foreign franchise, there are commitments we have to fulfill and rules we need to abide by.

Kris TV had taped advanced episodes in anticipation of her long planned vacation with her sons.

Ms. Kris Aquino and ABS-CBN management are also scheduled to meet upon her return to Manila. Meanwhile, we wish Kris and her sons a peaceful and restful vacation. We respect her need for privacy at this difficult time. – Bong R. Osorio, Head of ABS-CBN Integrated Corporate Communications.”

Sarah Geronimo – Nagwala si Mommy Divine dahil sa kissing scene

Nagkaroon pala ng problema sa set ng pelikulang It Takes a Man and a Woman nina John Lloyd Cruz at Sarah Geronimo na malapit nang ipalabas. Hindi sila ang naging problema, kundi ang Mommy Divine ni Sarah, nakialam pala ito sa isang eksenang kailangang-kailangan sa kabuuan ng kuwento.

Pagkatapos ipahayag ng pari na husband and wife na ang mga nakaharap sa altar, natural lang na ang kasunod na noon ay ang linyang, “You may now kiss the bride,” sa mga bagong kasal, pero sinira ng ina ni Sarah ang ating nakagisnan na.

Ayon sa aming source, “Talagang umeksena ang mommy ni Sarah, ayaw niyang ipagawa sa anak niya iyong pag-kiss ng groom sa bride, dayain na lang daw. Hindi siya napakiusapan ng mga producers at director, talagang ipinilit niya ang sa kaniya, dayain na lang daw ang eksenang iyon para wala na silang problema,” ayon sa impormante.

Dahil doon ay maraming reaksiyon mula sa ating mga kababayan ang nag-alsahan, kung ayaw raw ni Mommy Divine na mahalikan man lang ng kaniyang anak sa pelikula, di sana’y huwag na lang nitong pag-artistahin ang dalaga?

“Pero parang kalabaw na nakasuga sa bukid si Sarah, nag-aakyat nang limpak-limpak na salapi sa kanila, siya lang ang tanging inaasahan ng family niya.

“Kung ganoon na ang laki-laki ng nagagawa ni Sarah sa pamilya niya nang dahil sa kaniyang pag-aartista, bakit ganyan pa ang mommy niya? Bakit kailangang dayain pa ang mga scenes na puwede niya namang gawin?

“Tama bang makialam siya sa mga eksena? Hindi naman papapakin ang anak niya, kailangan lang maging professional dahil iyon ang hinihingi sa eksena! Nakakaloka talaga iyong ganoong drama!” naiinis pang kuwento ng aming source.

Noranians – Matinding manglait, palpak naman ang suporta sa superstar

Isa kami sa maraming nakatanggap ng mga mensahe ng pangmamaliit at panlalait ng mga tagahanga ni Nora Aunor kay Angel Locsin. Bakit daw tinalo ni Angel ang kanilang idolo sa pagiging Best Actress? Magkano raw ba ang halagang sangkot sa desisyong ginawa ng PMPC… at kung anu-ano pang mga salita ng pangmemenos kay Angel Locsin.

Sa umpisa ay okey lang, madaling unawain ang sentimyento ng mga tagasuporta ng Superstar, pero kapag sumosobra na ang mga panlalait ay nakakaumay na rin iyon at nang-iimbita ng opinyon.

Huwag naman sanang balewalain ang mga ginagawang pagsisikap ni Angel para mapaghusay ang kaniyang pagiging aktres. Hindi naman basta naupo lang sa isang sulok ang dalaga at saka humarap sa mga camera sa ikinapanalo niyang pelikula (One More Try). Ibinigay naman ni Angel ang lahat-lahat sa papel na ginampanan niya, kaya kung tinanghal man siyang pinakamahusay na aktres ay hindi imposible iyon.

Kailangang marunong tumanggap ng pagkatalo paminsan-minsan ang mga tagahanga ng Superstar. Hindi sa kanila ang lahat ng panahon, at hindi ngayon at tinalo ni Angel si Nora ay itatapon na lang sa basurahan nang basta-basta ang lahat ng magagandang nagawa ng Superstar sa kasaysayan ng industriya ng pelikulang Pilipino.

Manalo man ngayon ng isa pang truck na award si Angel Locsin ay hindi pa rin mapapantayan man lang ng dalaga ang mga markang nagawa ng Superstar sa mundo ng pelikula.

Nagkataon lang na sa panlasa ng mga hurado ay mas magaling si Angel kesa kay Nora (Thy Womb) sa mga pelikulang nirebyu nila. Kani-kaniyang paninindigan at panahon lang iyan, kaya tantanan na sana ang pangmamaliit ng ibang Noranian sa mga artistang tumatalo sa kanilang manok.

Diretsong reaksiyon ng mga nakakabasa ng mensahe ng mga Noranian, “Tantanan na nga nila ang pagrereklamo! Sa halip na magngangawngaw sila, dahil natalo ang idolo niya, eh, bigyan na lang nila ng suporta si Nora.

“Iyon ang dapat nilang gawin para hindi napu-pull-out sa mga sinehan ang pelikula ng idolo nila! Puro reklamo sila, pero kapag mayroon namang pelikula si Nora, eh, hindi sila nanonood!

“Bago sila magreklamo sa Best Actress award na hindi nakuha ng idol nila, eh, burahin muna nila ang bagong title na ibinibigay kay Nora, ang pagiging Pullout Queen!” nagmamaasim pang komento ng aming kausap.

John Prats – Dapat turuan ng leksyon ang traydor na si Jayson Franscisco

Dapat lang bigyan ng leksiyon ni John Prats ang patraydor na umupak sa kaniya, si Jayson Francisco, ang dakilang mangingibig ng komedyanang si Melai Cantiveros.

Kung matapang ang damuhong ito ay napakadali namang harapin ni John. Pero bakit patalikod nitong inupakan ang actor? Hindi ba’t malinaw pa sa sikat ng araw sa tanghaling-tapat na katrayduran lang ang maitatawag doon?

Mayroon pang sinabi ang mokong na ito na pasensiya na raw si John dahil sa kaniyang pagiging probinsiyano. Aba, at mukhang gusto pang palabasin ng Jayson na ito na ganoon ang mga probinsiyano, padaskul-daskol kung umaksiyon, na traydor ang mga probinsiyano?

Pagso-sorry lang ba ang makakatapat ng suntok at batok at sapok? Huwag sanang lumambot ang puso ni John Prats para sa luku-lukong lalaking ito na hindi marunong lumaban nang parehas. Parusa ang dapat ibigay sa mga taong hindi nag-iisip nang maraming beses bago kumilos nang patagilid.

Sa totoo lang, mula sa kaniyang mga magulang hanggang sa kaniyang mga kapatid ay mabuting pamilya ang kinabibilangan ni John Prats. Wala siyang marka ng anumang kalokohan sa showbiz, napakahusay makisama ng kaniyang pamilya. Mabuti ang puso ng young actor na ito.

Have a comment on this article? Send us your feedback

Abril 16 – 30, 2013

	Gerald Anderson & Maja Salvador
	Kim Chiu
	Richard Yap & Jodi-Sta. Maria
	Janice de Belen
	Ai Ai de las Alas & Jed Salang
	Kris Aquino

Maja Salvador – Ipinangangalandakan kay Kim Chiu na kaniya na si Gerald ngayon

Wala nang itinatago pa si Maja Salvador. Kahit saan sila makita ngayon ni Gerald Anderson ay parang ipinagsisigawan na nila sa buong mundo na nagmamahalan sila.

Wala namang masama sa ganoon. Kung iyon nga ang kanilang nararamdaman ay ano naman ang magagawa ng kahit sino? Mas maganda na ang kanilang ginagawa kesa naman sa pagdedenay nang pagdedenay.

Noong minsang makipag-basketball sa kaniyang mga kaibigan si Gerald na napakagaling maglaro ay nandoon din si Maja. Hindi naman siya umaaktong alalay ng guwapong aktor, nandoon lang siya para bumantay. Ano rin ang magagawa natin kung ayaw nilang mawalay ang isa’t isa sa kanilang paningin?

Iyon ang hindi nagawa noon nina Gerald at Kim Chiu, palagi silang patago-tago. Para silang mga paniki sa paglilihim ng kanilang relasyon, samantalang pareho naman silang libre at walang pananagutan.

“Doon siguro masyadong nasabik si Gerald, kaya ngayon, e, tumotodo siya kay Maja. Natural lang namang gusto ring ipakita ng lalaki ang pagmamahal niya sa girlfriend niya, di ba?

Ayon naman sa isang source ay umo-OA na kung minsan si Maja sa pagpaparamdam ng kaniyang pagmamahal kay Gerald.

Parang mayroon siyang gustong ipamukha kay Kim Chiu na dating kaibigan niya. Kaya pati sa rehearsal nila sa isang variety show ay ipinakikita niya sa young actress na suot niya ang t-shirt ni Gerald. Hindi pa rin bumabalik sa dati ang kanilang pagkakaibigan ni Kim dahil sa pakikipagrelasyon niya kay Gerald.

Richard Yap – Pinalitan na ni Papa Chen si Piolo bilang “Papa ng bayan”

Isang malakas na mag-asawang sampal siguro ang naramdaman ni Piolo Pascual sa isang nagsusumigaw na katotohanan noong minsan silang nagkasama sa isang provincial show ni Richard Yap.

OA ang kuwentong lumabas na walang pumapansin kay Piolo. Siyempre’y marami pa rin tayong mga kababayan na kinikilig sa guwapong hunk actor. Pero kung ikukumpara iyon sa napakainit na pagtanggap sa Papa Chen o Sir Chief ng bayan ay malayo ang kanilang agwat.

Kung sampu ang sabay-sabay na lumalapit kay Piolo para magparetrato at magpapirma ng autograph, kay Richard Yap naman ay sangkatutak. Hindi na mabilang iyon kaya hirap na hirap ang mga miyembro ng security force ng nasabing siyudad.

Sa kaniyang isip siguro ay tanggap na rin ni Piolo ang katotohanan na may bago nang kinikilalang Papa Ng Bayan ang publiko. Hindi lang dahil sa naririnig –nababalitaan niya ang pagkahumaling ng ating mga kababayan ngayon kay Richard Yap, kundi dahil nasaksihan niya ang init ng pagmamahal na ibinibigay ng mga tagahanga kay Papa Chen, nakasisilaw na liwanag iyon para kay Piolo.

Ang ganoong senaryo ay paulit-ulit nang nagaganap. Isang ehemplo lamang iyon ng gasgas nang linyang ngayon ay nakaupo ka sa trono pero bukas ay kailangan mo nang tumayo dahil may bago nang uupo at papalit sa iyo.

Kapag umalpas na ang suwerte at popularidad ay saka lang maiisip ng mga artista ang mga nakaraang reklamo ng mga kababayan natin tungkol sa kanila. Hindi namamansin, may magpaparetrato lang sa tabi nila ay sasagutin nila agad iyon ng pagkakamot ng ulo na para bang naiinis sila, pagbaba pa lang ng sasakyan ay nangakasimangot na.

Ang masarap lang ay naranasan nang lahat ni Piolo ang ngayon pa lang ninanamnam ni Richard Yap.

Pana-panahon lang ang kasikatan. Sinusulat namin ngayon ang kuwento ng pagkukumpara sa popularidad nina Piolo Pascual at Richard Yap, pero ilang panahon lang mula ngayon ay ganitong tema rin ang aming tutukan. Nasa kuwento pa rin si Papa Chen pero siya na ang Piolo Pascual sa kuwento dahil may bago nang itinuturing na Papa Ng Bayan na papalit sa kaniya.

Heart at Sen. Chiz – Patuloy pa rin ang pagsubok sa relasyon

Sa pananaw ng ating mga kababayan ngayon ay isang suwail na anak si Heart Evangelista dahil sa matinding pagtatanggol na ginagawa niya sa kanilang relasyon ni Senator Chiz Escudero.

Ikaw at ako laban sa mundo ang situwasyon nila ngayon, pero si Heart na rin ang nagsabi na sana naman, ang mga taong hindi nakakaramdam sa kaniyang kaligayahan ngayon ay magising na lang isang araw na maligaya na rin sa kaniyang pakikipagrelasyon sa mambabatas.

Ngayon lang lumantad ang mga magulang ng aktres sa kanilang mga hinaing, marami na ring nakarelasyon si Heart pero nanatiling tahimik lang ang kaniyang pamilya, ano nga kaya ang dahilan at naging bukas ang mga bibig ng mag-asawang Evangelista tungkol sa mga reklamo nila kay Senator Chiz?

Madalas daw na lasing ang magiting na lalaki kapag nakakaharap nila. Sa kuwento ng mag-asawa ay para bang hindi man lang nila nakausap nang hindi lasing ang senador.

Hindi naging maganda ang pagtanggap ng ating mga kababayan sa kuwento ng mga magulang ni Heart. Ibinabantayog pa naman nila ang pangalan ng senador. Pero parang biglang bumagsak iyon sa kanilang isip ngayon.

At matindi ang naging epekto noon sa kandidatura ng mambabatas. Huwag sabihing nagkataon lang ang pagbagsak ng kaniyang numero sa survey. Kailangang tanggapin ni Senator Chiz ang katotohanan na ginawa man ang survey bago pa nagsalita ang mga magulang ni Heart ay tumatak na sa isip ng mga kababayan natin ngayon na naging negatibo ang kaniyang dating sa publiko.

Pero hindi naman siguro makapapayag ang senador na para lang pagbigyan ang gustong mangyari ng mga magulang ni Heart ay makikipaghiwalay siya, napakalaking sampal naman noon sa dalaga, dahil sobra-sobrang pakikipaglaban ang ginagawa nito ngayon sa kanilang relasyon.

Paninindigan na ang nakataya sa usaping ito.

Pero tanong ng isang taga-showbiz sa amin na may malalim na impormasyon tungkol sa relasyon ng pamilya Evangelista, kay Heart pala nakatira ang kaniyang mga magulang?

Ang mommy pa rin pala niya ang manager ni Heart at kumukuha ng porsiyento ang kaniyang ina mula sa lahat ng kaniyang kinikita? Ang tanong, may kinalaman kaya si Senator Chiz sa mga pinakahuling desisyon na gusto sanang mangyari ngayon ni Heart, na kinokontra ng kaniyang mga magulang?

“Dati kasi, eh, parang robot lang si Heart, sunud-sunuran lang sa parents niya. Pero mula noong maging sila na ni Senator Chiz, mayroon na siyang ibang gustong mangyari.

“Iyon, sa pagkakaalam namin, ang naging dahilan ng lahat ng gulo sa pagitan nila ngayon,” nangungumbinse pang impormasyon ng aming source.

Janice de Belen – May katwirang ireklamo si John dahil kulang lagi ang sustento

Sa husgado ng bayan ay naging mapakla si Janice de Belen nang muli siyang magsalita tungkol sa mga pagkukulang ni John Estrada sa pagtupad sa mga obligasyon nito sa kanilang mga anak.

Maraming nakisimpatya kay John. Sa tagal na raw ba naman ng panahon ng kanilang paghihiwalay at pagkapawalang-bisa sa kanilang kasal ay ganyan pa rin ang mga litanya ni Janice, ang pambabagsak sa imahe ng ama ng kanilang mga supling na matagal na panahon din naman niyang minahal?

Maraming nagkomento na hindi pa rin nakauusad si Janice mula sa kanilang paghihiwalay ni John. Nabubuhay pa rin daw ang aktres sa nakaraan, kaya paano gagaan ang kaniyang kalooban?

Naging ganoon kapakla ang panlasa ng ating mga kababayan kay Janice de Belen dahil sa muli niyang pagbubukas sa paksa ng kairesponsablehan ni John Estrada na tinutulan naman ng aktor.

Isang impormante naman ang nagkuwento sa amin na mayroon palang pinanggagalingan si Janice sa kaniyang mga sinabi. Ilang buwan na ang nakararaan ay nagpadala pala ng sulat ang abogado ni John Estrada sa aktres. Nagtatanong ito kung hanggang kailan pa ba magsusustento ang aktor sa kanilang mga anak. Siyempre’y galing kay John Estrada ang ideyang iyon.

Napakasakit nga naman para kay Janice ang makatanggap ng ganoong uri ng tanong. Siguro’y naisip ng aktres, kailan pa nagkaroon ng batas na nagsasabing mayroong hangganan ang pagsusustento ng ama ng kaniyang mga anak kapag nagkahiwalay na sila ng ina ng mga bata?

Ang batas ay batas na kailangang sundin. Hindi kinayang unawain ni Janice ang sulat ng abogado ni John na alam naman nating kliyente ang nagpapatanong.

Nag-aaral pa ang mga anak nina John at Janice, kumakain araw-araw, maraming pangangailangan sa kanilang edukasyon. Sa tanong ni John kung hanggang kailan pa ito magsusustento sa kanilang mga anak ay hindi naman ang kalooban ng aktres ang sinuntok ng aktor.

Napakasakit noon para sa mga bata, walang kasalanan ang kanilang mga anak sa kinahinatnan ng relasyon nila ni Janice, dahil hindi nakapamimili ng mga magulang ang mga anak.

“Saka hindi naman nakukumpleto ni John ang pinagkasunduan nilang sustento sa mga bata, kulang at kulang, palaging kapos, mabuti na lang at may trabaho rin si Janice ngayon na pumupuno sa mga pagkukulang ni John,” klaro at madiing komento ng aming source.

Iyon ang pinanggalingan ni Janice de Belen nang tanungin siya tungkol sa sustento ni John Estrada sa kanilang mga anak. Nagpakatotoo ang aktres sa pagsasabing palaging kulang ang ipinadadalang sustento ng aktor sa mga bata at naipon na iyon nang naipon pero hindi naman pinupunan ng aktor.

Ai Ai Delas Alas – Nagpakasal na sa Las Vegas kay Jed Salang

Ayaw naming paniwalaan noong una ang kuwentong nagpakasal na salas Vegas ang Comedy Concert Queen na si Ai Ai delas Alas at ang kaniyang karelasyong si Jed Salang. Naniwala na lang kami nang ang magkuwento na sa amin ay isang impormanteng hindi nanununog at nangunguryente sa amin kahit kailan.

Totoo ngang nagpakasal na sina Jed at Ai Ai noong April 3, mula sa Los Angeles ay bumiyahe ang dalawa kasama ang mga anak ni Ai Ai salas Vegas, isang pribado at eleganteng salu-salo ang ginanap pagkatapos ng kasal.

Anuman ang mga kuwentong naglalabasan tungkol sa kanilang relasyon ni Jed Salang ay panahon na para magbuo ng isang pamilya ang Comedy Concert Queen.

Magaling man siyang komedyana at concert artist at pinipilahan man ngayon ang kaniyang mga pelikula ay darating at darating pa rin sa kaniyang buhay ang pag-iisa.

Magkakaroon ng kani-kaniyang pamilya ang tatlo niyang anak, nandiyan pa rin ang showbiz at magkakaroon pa rin siya ng mga proyekto, pero hindi niya mahaharangan ang pagkakaedad.

Sa pagdating ng panahong iyon at kung magiging matatag ang pundasyon ng kanilang pagmamahalan ni Jed ay mayroon siyang uuwian at masasandalan.

Walang kasingligaya ngayon si Ai Ai delas Alas, kung magmahal pa naman ang taong ito ay itinataya niya ang lahat-lahat kasama na ang pamato, harinawang si Jed Salang na nga ang makasama niya hanggang sa kaniyang pagtanda.

Kris Aquino – Bumalik na! Mukhang may bago nang karelasyon

Tawa kami nang tawa sa naging reaksiyon ng aming mga kaibigan nang lumabas ang balita na nandito (Philippines) na uli si Kris Aquino mula sa dalawang linggong bakasyon nila ng kaniyang mga anak.

Text ng isang kaibigan namin, “Naku, magugulo na naman ang showbiz, nandito na ang de primerang pasaway na babae! Ano na naman kaya ang bago niyang kuwento?

“Mayroon siyang nakilalang guy sa bakasyon niya? Na mukhang makikipagrelasyon na siya this time? Ano na naman kaya? Pagdating pa lang ni Tetay, siguradong may bago na namang pagpipistahan ang mga kababayan natin dahil kung ano-anong kuwento ang bitbit niya!” humahalakhak na komento ng aming kausap.

Panahon na para magkaroon na rin ng karelasyon si Kris. Masaya na ngayon si James Yap sa karelasyon nito. Tahimik na ang buhay ng basketbolista. Nagulo lang naman uli iyon nang mangalampag si Kris tungkol sa katsipang kuwentong inaakit siya ng ama ni Baby James.

Kapag mayroon nang karelasyon ang aktres-TV host ay mayroon na siyang pagkakaabalahan. Hindi puwedeng mabuhay siya nang walang karelasyon. Hindi totoo ang sinasabi niya na masaya na siya ngayon sa piling ng kaniyang mga anak. Ibang kaligayahan ang maibibigay sa kaniya ng isang lalaking magmamahal sa kaniya bilang siya at mamahalin din niya.

Pero siyempre, ang tanong ay kung mayroon bang maglalakas-loob na manligaw kay Kris, samantalang bukod sa malaking personalidad na siya ay may kataklesan at kadaldalan pa?

“Naku, natatakot na ang mga lalaki sa kaniya, sa totoo lang! Sino pa ang makikipagrelasyon sa kaniya, e, pagkatapos ng relasyon, kung ano-ano na ang pinagsasasabi niya.

“Hello, Mayor Joey Marquez. Hello, James Yap! Nakakaloka naman kasi siya, walang itinatago, kung ano-ano ang sinasabi! Ngayon, sinong lalaki ang magkakagustong matulad sa mga ex niya?” naiinis pang sabi ng aming source.

May nakausap kaming katrabaho ni James Yap. Kung tutuusin ay kalaban niya ang personalidad na nakakuwentuhan namin, kaya ang aming inaasahan ay may tulis ang kaniyang mga komento, pero nagulat kami.

Ayon sa aming kausap ay walang kahit sinong nakaaway si James mula nang pasukin na niya ang PBA. Wala rin siyang inggit sa katawan, basta tahimik lang siya, ang trabaho niya ang pinakikialaman ng basketbolista.

“Iyon ang malaking advantage ni James sa nangyari sa kanila ni Kris (Aquino). Marami siyang kakampi kahit mula sa PBA, kasi nga, e, wala siyang itinanim na masama sa mga katrabaho niya.

“Kung naging mayabang lang siya, kung naging inggitero man lang sana siya, kahit paano, e, may mga taong magiging masaya sa mga nangyayari sa kanila ni Kris.

“Kaso, e, wala nga, kaya maraming nakakaintindi sa kaniya ngayon. Maraming naiinis sa ex niya, dahil parang masyado naman siyang kinakawawa. Mabait kasi si James. Sa hardcourt lang siya kalaban, pero paglabas na doon, e, wala kang masasabi sa kaniya,” kuwento pa ng aming kausap.

JLC at Sarah – Patok na patok sa takilya ang pelikula

Nag-text sa amin si Tito Reli de Leon, kaibigan namin ng aming idolong si Senador Robert Jaworski, “Grabe ang pila sa movie nina John Lloyd Cruz at Sarah Geronimo, punumpuno ang Robinson’s –Magnolia. Lumipat kami ng family ko sa Rockwell, pero ganoon din, puno!

“High-end pa ang mga sinehang pinuntahan namin, pero parehong punuan, kaya paano pa ang mga sinehan sa malls? Grabe, Mare, tagumpay sina John Lloyd at Sarah!” impormasyon ng aming kumpare-kaibigang si Tito Reli.

Pagkatapos ng mensaheng iyon ay sunud-sunod nang nag-text sa amin ang iba pang mga kaibigang nakapanood na ng It Takes a Man and a Woman. Gandang-ganda at kilig na kilig daw silang lumabas ng sinehan. At punumpuno sila sa loob. Minsan pang pinatunayan nina JLC at Sarah kung gaano kalakas ang pundasyon ng kanilang tambalan.

At winasak din nila ang kapaniwalaan na hindi maganda ang playdate na dikit sa Mahal Na Araw dahil nasa bakasyon ang mga kababayan natin. Walang pangit na petsa para sa isang pelikulang inaabangan, dadayo at dadayo sa mga sinehan ang manonood para masunod ang kanilang gusto.

Walang relasyon sina JLC at Sarah. Kahit pahimakas lang ng pagkagusto sa singer-actress ay walang ipinararamdam ang magaling na aktor, pero ito ang resulta ng kanilang tambalan.

Pinatunayan lang nila na hindi garantiya ang relasyon sa tunay na buhay sa paggawa ng pelikula. Hindi kailangan ang anggulo ng pagkakagustuhan ng mga bida para lang kumita ang kanilang proyekto.

“Si John Lloyd kasi, eh, hindi madalas makita sa TV. Wala siyang teleserye, hindi siya napapanood gabi-gabi, kaya kapag gumagawa siya ng pelikula, eh, panalung-panalo!” makatotohanang komento ng isang kaibigan namin.

Nagbabasa kaya si Coco Martin sa reaksiyon ng aming kaibigan? Dalawang magkasunod na proyekto ni Coco ang hindi kagandahan ang ipinakita sa takilya. Naturingang sikat ngayon ang aktor, pero hanggang sa telebisyon lang pala iyon at hindi sa pelikula.

“Ibang klase kasi si John Lloyd. Wala siyang mga ipinagmamalaking abs, hindi siya nagpapaka-macho, pero ang acting niya ang bibilhin mo. Magaling siyang umarte, aktor talaga siya, hindi basta nag-aaktur-aktoran lang!” komento naman ng isa pang nakakuwentuhan namin.

Nagbabasa rin kaya ngayon si Piolo Pascual?

Have a comment on this article? Send us your feedback

Mayo 1 – 15, 2013

Marian Rivera – Mabuti naman at tinapos na ang relasyon sa dating manager

	Marian Rivera
	Richard Yap
	Kris Aquino
	Charice Pempengco
	German Moreno
	John Lloyd Cruz
	Raymart, Sabina, Claudine at Santino
	Gretchen, Claudine & Inday Barretto

Pagkatapos nang pitong taon ay nagpaalam na nga si Marian Rivera sa kaniyang manager na si Popoy Caritativo. Ayon sa kuwento ay maayos naman ang naging paghihiwalay nila.

Pero hindi madaling paniwalaan iyon. Mas iiral pa rin ang katotohanan na kaya nga sila naghiwalay ay dahil hindi na maayos ang kanilang samahan, hindi na sila maligayang makatrabaho ang isa’t isa.

Isang pagpansin lang sa paraan ng pamamahala ni Popoy sa karera ni Marian. Ang alam kasi namin sa isang manager ay may malawak na pakpak para ayusin ang mga kontrobersiyang kinapapalooban ng kaniyang alaga.

Siya dapat ang nagtatatayo ng tulay sa pagitan ng pinamamahalaan niyang talent at ng kung sinumang nakakahidwaan nito, sadya man o hindi, pero wala kaming nakikitang ganoon.

Sa kaso ni Popoy Caritativo ay hindi ganoon ang nangyayari. Pakiramdam namin ay balewala sa kaniya kung manega man nang husto ang kaniyang mga alaga. Parang utang na loob pa ng mga manunulat sa kaniya ang suportahan ang kaniyang mga produkto.

Ngayong wala na sa kaniyang poder si Marian Rivera, siguro nama’y mas magkakaroon na ng pagkakataon ang mga manunulat na maabot ang aktres. Wala na sigurong magiging harang dahil siguradong iyon ang magiging prayoridad ng bagong hahawak sa kaniyang career.

Sir Chief Richard Yap – Mas sikat na ngayon kaysa kay Piolo Pascual

Kinumpirma ng isang nakaengkuwentro namin ang kuwentong mas pinagkaguluhan sa airport noong minsan si Richard Yap (ang Papa Chen at Sir Chief ng bayan) kesa kay Piolo Pascual.

“Actually, mayroon di namang mga kinilig kay Piolo, pero napag-iwanan talaga siya ni Richard Yap. Una, magiliw kasi si Richard sa mga fans, malakas ang show nila ni Jodi Sta. Maria ngayon, kaya panahon talaga niya!

“Si Piolo naman kasi, pagdating niya sa airport, eh, balot na balot siya palagi. Naka-shades siya, nakasumbrero, naka-jacket. Natural, iisipin agad ng mga nakakakita sa kaniya na umiiwas siya sa mga tao.

“Saka totoo naman, may pagka-aloof si Piolo, pag-iwas na parang kasupladuhan na rin kung tutuusin, parang ayaw niyang may mga nagpapa-picture taking sa kaniya.

“Eh, si Papa Chen, palibhasa nga, eh, bago lang, parang ngayon pa lang siya nao-overwhelm sa mga naglalapitan sa kaniya para magparetrato at magpa-autograph. Wala rin siyang karamutan, dumarating siyang hindi nakasumbrero, walang suot na shades, iyong mismong si Sir Chief sa TV ang dumarating sa area!” kuwento ng aming kausap.

Sino ngayon ang magsasabi na mga bagets at mga guwapong artista lang ang pinagkakaguluhan nang husto, sino rin ang magsasabing kapag may edad na ang isang personalidad ay wala nang espasyo sa lokal na aliwan, winasak iyon ng Sir Chief at Papa Chen ng bayan.

Kris Aquino – Kumusta na ba ang kredibilidad?

Hanggang ngayon ay bidang argumento pa rin kahit saan ang kredibilidad ni Kris Aquino kung mayroon man. May mga nagsasabing hindi na dapat pang paniwalaan ang mga salitang lumalabas sa bibig ng aktres-TV host, pero may mga nagpipilit namang magsabi na anuman ang mangyari, Kris Aquino is Kris Aquino.

Totoo naman iyon. Kesehodang napakaraming nagagalit ngayon kay Kris Aquino ay mas nakararami pa rin ang humahanga at nagtatanggol sa kaniya. Mas malaki ang numero ng mga naniniwala pa rin sa kaniya magpahanggang ngayon.

Komento naman ng anak-anakan-kaibigan naming si SOS, “Para maibalik ang kredibilidad ni Kris Aquino, eh, gayahin na lang dapat niya si Senator Miriam Santiago.

“Just simply say, ‘I lied!” sabay pakawala ng tawa na kaniyang-kaniya lang! Chos!” suhestiyon ni SOS na hindi nakalilimot sa pakikisahog sa mga kuwentong-showbiz.

Charice Pempengco – Bakit hindi pa magpakatotoo at magladlad?

Ang dami-daming nangungulit sa amin, tibo raw ba si Charice Pempengco? Ano raw ba talaga ang kasarian ng magaling na singer? Kung anu-anong manipestasyon na raw kasi ang inilalabas ngayon ni Charice na parang papunta na sa kaniyang paglaladlad bilang isang tomboy.

Natatawa lang kami dahil bago pa ba naman ang ganitong kuwento ngayon? Kahit sa Amerika at sa iba-ibang bansa ay naglalantaran na ng kanilang seksuwalidad ang mga sikat na personalidad sa iba’t ibang larangan.

Taong 1981 nang buksan ng tennis champion na si Martina Navratilova ang libro ng kaniyang buhay, ang kaniyang sabi, iba ang kaniyang nararamdaman, kakaiba sa emosyon ng isang normal na babae, dahil kabaro rin niya ang kaniyang gusto.

Ang paborito naming newscaster ng CNN na si Anderson Cooper na wagas ang kaguwapuhan at super galing sa pagre-report ay umamin na ring bading siya at maligaya siya sa kaniyang buhay ngayon.

At ang pinakahuling umamin ay si Jason Collins. Ilampung taon nang nakikipagbalyahan sa NBA bilang sentro ng koponang Boston Celtics. Ang sabi ng magaling na basketbolista, “I am a 34 year-old NBA center. I am black and I am gay.”

Kung anuman ang kasariang hindi pa ipinagsisigawan ngayon ni Charice ay hindi problema. Kung doon siya komportable at masaya, sino naman tayo para harangan iyon, maibibigay ba natin ang kaniyang kaligayahan?

Umamin mang tibo nga si Charice ay hindi naman iyon makababawas sa ganda ng kaniyang boses. Magaling pa rin siyang singer, dahil may kipkip na siyang talento noon pa man.

Ano nga ang payo ng sikat na NBA player na si Kobe Bryant sa paglalantad ni Jason Collins sa kaniyang tunay na kasarian? Huwag daw magpapadala si Jason sa sinasabi ng ibang tao, “Don’t get suffocated because of the ignorance of others.”

Kuya Germs – Nagdiriwang ng ika-50 taon sa showbiz

Sa panayam namin kay Kuya Germs (German Moreno) para sa Ang Latest Updated kaugnay ng kaniyang ika-50 taong anibersaryo sa showbiz ay napakarami naming nalamang kuwento.

Matagal na panahon siyang naging co-host ng Superstar na si Nora Aunor sa sariling show nito. Ang akala nati’y malaki ang tinatanggap niyang talent fee doon, pero nagulantang kami sa kaniyang mga sinabi.

“Noong mga panahong P40,000 pesos na ang sinasahod ni Guy sa Superstar, ang suweldo ko naman, e, P700 pesos lang. Pero okey lang sa akin iyon, ang makasama lang ako sa isang show ng isang Superstar na katulad niya, e, sobrang kasiyahan na para sa akin,” rebelasyon ni Kuya Germs.

Nagkaroon daw ng problema sa istasyon, maraming tinanggal na programa at mga artista, saludo si Kuya Germs sa ginawang pagtatanggol sa kaniya ni Nora Aunor.

Ipinaglaban daw siya ng actress-singer, kinausap daw nito ang tagapamahala ng kanilang show. Sinabi sa kanila ni Nora na hindi ito magso-show nang wala si German Moreno.

“Iyon naman ang hindi ko makakalimutan kay Guy, iyong ginawa niyang pagdedepensa sa akin, talagang pinanindigan niya na walang Nora sa show kapag walang Kuya Germs.

“Pero ibinaba naman nila ang talent fee ko. Mula sa seven hundred pesos, ginawa na lang nilang P250 pesos. Okey pa rin sa akin iyon, dahil nga si Nora Aunor naman ang katrabaho ko,” pag-alala pa ng star builder.

Limang dekada na siya ngayon sa showbiz, ang dating telonero-janitor sa Clover Theatre ay isa nang pamosong TV host, bukod doon ay itinuturing din siyang star builder-discoverer dahil sa dami ng mga artistang napasikat niya.

May mga personalidad na hindi marunong makaalala nang magkapangalan na, pero ayon kay Kuya Germs ay mas marami pa rin sa kanila ang marunong tumanaw ng utang na loob, maligaya siya sa kaniyang mga ginagawa.

“Fifty years na ako sa showbiz ngayon, limang dekadang punumpuno ng saya na nasasalitan din ng lungkot, pero masaya pa rin ako sa kabuuan ng buhay-showbiz ko,” nakangiting sabi ng nag-iisang Kuya Germs.

John Lloyd Cruz – Napapagod na raw sa pag-aartista

Kahit pala sa kaniyang mga kaibigan at katrabaho ay madalas sinasabi ni John Lloyd Cruz na gusto na niyang magpahinga. Hindi pa naman ngayon ang itinatakda niyang panahon para sa pagtalikod sa pag-aartista, bibilang pa siguro iyon nang ilang taon, pero nakaprograma na talaga sa kaniyang utak ang pamamaalam sa showbiz.

Kuwento ng aming source, “Palagi niyang sinasabi iyon, lalo na kapag gabi-gabi na siyang walang tulog, araw-araw na walang pahinga, kapag halos ninanakaw na pati ang personal time niya.

“Hindi naman natin siya masisisi, mayroon pala kasing pagkakataon na magsisimula siyang magtrabaho nang umaga, matatapos siya, kinabukasan na. Konting pahinga lang, balik na naman siya sa shooting, mabuburyong ka nga talaga kapag ganoon ang schedule mo,” pagkampi ng aming source kay John Lloyd.

Sa maagang panahon ay natuto nang pahalagahan ng magaling at guwapong aktor ang kaniyang mga pinagpapaguran-pinaghihirapan. Nagpatayo na siya agad ng bahay para sa kaniyang mga magulang at kapatid, mayroon din siyang sariling bahay na maituturing na niyang kayamanan sa laki ng inabot na halaga.

Kayang-kaya na niyang magpahinga talaga, mayroon na rin siyang naiipong halaga kapag dumating ang kaniyang pamamahinga. Ganoon kaorganisado sa kaniyang pamumuhay ang pinakamagaling na aktor ng kaniyang panahon.

“Nakakapanghinayang lang talaga dahil maraming malulungkot kung sakaling talikuran na nga niya ang showbiz, pero nandoon ang happiness niya, iyon ang ultimate reason na puwede niyang ibigay na hindi naman kayang punan ng mga sumusuporta sa kaniya,” paninindigan ng aming source.

Claudine at Raymart – Totoong hiwalay na

Wala raw lihim na hindi nabubulgar. Bumilang man nang maraming-maraming taon, lumipas man ang napakahabang panahon ay siguradong malalantad pa rin ang lihim gaano man natin iyon isinelyo, walang amoy na hindi sumisingaw sa takdang panahon.

Ang kuwento ng hiwalayan nina Raymart Santiago at Claudine Barretto ay matagal nang pinagpipistahan sa apat na sulok ng showbiz. Pero may paraan ang mag-asawa para takpan ang kuwento. Namamasyal sila nang magkakasama at agad namang ipino-post iyon ni Claudine sa kaniyang Facebook para patunayan lang niya na walang katotohanan ang isyung hiwalay na sila.

Ang istorya ng pagpapaospital ni Claudine ay matagal na ring sentro ng mga bulung-bulungan. Wala raw katotohanan iyon, depensa uli ng mag-asawa, wala raw kailangang tulong mula sa mga doktor ang aktres.

Ang haka-haka noon ay kumpirmado na ngayon. At ang nakalulungkot pa ay hindi ibang tao ang naglantad ng katotohanan, kundi mismong kapamilya ni Claudine, ang nakatatanda niyang kapatid na si Joaquin (Jay-Jay).

Sa panayam kay Jay-Jay ng PEP ay idinetalye nito kung paanong nanginginig si Mommy Inday sa tuwing tumatawag si Claudine nang dis-oras nang gabi, nang madaling-araw, dahil sa pag-aaway nila ni Raymart Santiago.

Komento ni Jay-Jay sa PEP, “Violent si Claudine. Hindi na naawa sa mommy. Si dad, nag-heart attack. Ang problema kasi, 2 or 3 in the morning, tumatawag si Claudine! Violent na away na naman nila iyon ni Raymart.

“She calls so many times in one day. They pick her up, they go there to see what’s happening. This happened so many times! Claudine needs professional help. Anger management or something.

“Her moods are unstable. One minute, she is so mad, one minute, she is so mabait. Ang sakit niya, I cannot say. Mom says Claudine is bipolar, manic, whatever!” litanya ng nakatatandang kapatid ni Claudine na si Jay-Jay.

Aminado si Jay-Jay na minsan, isang panahon, ay napailalim rin ito sa kaway ng droga. Pero ayon sa kaniya ay pinaglabanan nito ang kaniyang bisyo, nagpa-rehab ito, at ngayon ay malinis na malinis na.

Noong nakaraang Disyembre, ayon kay Joaquin, ay nagkaroon ng pagpupulung-pulong ang kanilang pamilya. Ang kanilang agenda, ang pagpapa-rehab ni Claudine, ayon sa doktor ay isang taon hanggang isang taon at kalahati ang kailangang ipamalagi ng aktres sa rehabilitation center.

Sumang-ayon na ang lahat, mula sa kanilang mga magulang hanggang sa kanilang magkakapatid, hanggang kay Raymart Santiago na nakikipagtulungan sa kanila.

Pero nang magpunta raw sina Daddy Mike at Mommy Inday sa bahay nina Raymart at Claudine, “My parents changed. Everything changed. Mommy is Claudine’s co-dependent, she is an enabler. In rehab, they tell you that an enabler is someone who protects the addict who is both in denial and not normal,” dagdag pa ni Jay-Jay.

Napaniwala raw kasi ni Claudine ang kanilang mga magulang na hindi siya ang problema, maayos na maayos daw siya. Ang problema raw ay si Gretchen dahil palagi siyang tinatakot ng kaniyang kapatid na magsasalita ito on national television para ibulgar ang kaniyang mga lihim.

Ang tanging sinabi ni Jay-Jay sa huling bahagi ng kaniyang panayam sa PEP ay makahulugan, “You want to fix this family, you fix Claudine.”

Gretchen Barretto vs. Mommy Inday – Ladlaran ng maruming labada sa publiko

Hating-hati ang emosyon ngayon ng ating mga kababayan sa nagaganap na kontrobersiya sa pagitan ng mag-inang Inday at Gretchen Barretto.

Ang away ay nag-ugat kay Gretchen at sa kaniyang kapatid na bunso na si Claudine, pero nang magtagal-tagal ay ang mismong mommy na nila ang kalaban ni Gretchen, ito na ang sumalo sa laban ni Claudine.

Sobra-sobrang sakit ang naramdaman ni Gretchen sa mga binitiwang salita ng kaniyang ina, tagos iyon hanggang sa kaniyang kalamnan, dahil literal siyang ipinagbulgaran ng kaniyang nanay sa buong bayan.

Pati ang mga istoryang dapat ay sila-sila na lang ang nakakaalam ay ibinulgar ni Mommy Inday. Si Gretchen ang lumalabas na sinungaling at mapag-imbento. Itinaas ni Mommy Inday ang imahe ni Claudine habang dinadapurak naman niya ang pagkatao ni Gretchen.

Ikinuwento ni Mommy Inday ang pagiging bayolente ni Gretchen at paggawa ng kung anu-anong isyu tungkol sa kanilang pamilya. Kung paano inakusahan ni Gretchen si Claudine na siya mismong gustong sumira ng maningning na career ngayon ni Julia (anak ni Marjorie) sa ABS CBN. Pati ang pamimintas at name-calling ng aktres sa kaniyang mga pamangking Sabina at Santino na mga anak ni Claudine. At pari na rin ang pamimintas sa mister ni Claudine ay ibinuyangyang na rin ni Mommy Inday. Wala raw karapatan si Gretchen na tawaging evil si Claudine dahil ang koronang iyon ay hawak at nakahinang na sa ulo ni Gretchen.

Totoo ang sinabi ni Mrs. Inday Barretto sa kaniyang huling mensahe kay Gretchen, maaga siyang nakipag-live-in kay Joey Loyzaga, pamosong basketbolista noong magkarelasyon sila.

Matagal ding nagsama sa isang bubong sina Joey at Gretchen, kung tutuusin nga ay hindi na-enjoy ng aktres ang kaniyang kabataan, maaga kasi siyang nakipagrelasyon nang seryosohan.

Pagkatapos nila ni Joey Loyzaga ay saka naman pumasok sa kaniyang buhay ang milyonaryong businessman na si Tony “Boy” Cojuangco, nagkaanak sila, dalaga na ngayon si Dominique.

Noong una ay magkasundo pa si Gretchen at ang kaniyang pamilya, pero nagulat na lang kami nang isang araw ay nakarating sa amin ang kuwento na nag-away silang mag-ina, mula noon ay nawalan na ng komunikasyon si Gretchen sa kaniyang mga magulang.

Sabi ng aming source, “Malalim kasi ang pinag-ugatan ng problema nilang mag-ina, kung ite-trace natin iyon, e, napakahaba ng istorya, dahil marami palang sama ng loob si Gretchen sa mommy niya na nag-umpisa pa noong bata siya.”

Ni sa panaginip ay hindi namin inasahang magkakaganito sila, para rin kasing kuyog ang samahan-pagmamahalan ng magkakapatid na Barretto, pitikin mo ang isa sa kanila at parang sinaktan mo na rin silang lahat.

Noong nagsisimula pa lang sa pag-aartista si Gretchen (14 Going Steady ng Regal Films) ay madalas kaming nagpupunta sa kanilang bahay sa London St., Merville, Parañaque.

Buung-buo, masasaya, palaging punumpuno ng halakhakan ang kanilang tahanan. Nakasingkaw sa kusina si Mommy Inday para sa pagluluto ng pork steak na paborito ng kaniyang mga anak. Takbuhan naman nang takbuhan sa kanilang malawak na bakuran sina Marjorie at Claudine, habang kanta nang kanta si Gretchen na bata pa lang ay nangarap nang maging artista.

Nagtatrabaho pa noon si Daddy Mike sa isang mining firm. Maayos ang kanilang kabuhayan. Nag-aaral noon sina Gia, Gretchen, Marjorie at Claudine sa Colegio de San Agustin at sa magagandang eskuwelahan din ang mga kapatid nilang lalaki.

Barya-barya pa lang ang kinikita noon ni Gretchen. Sa mga salita nga ni Mommy Inday ay “kulang pang pangdamit iyon at panggasolina,” tama lang si Gia sa pagsasabing hindi si Gretchen ang nagpaaral sa kanila.

Sa labanang ito, may isang kapatid si Gretchen na bumalanse sa mga atake sa kaniya ni Mommy Inday, ang nakatatanda nilang kapatid na si Joaquin.

Nangungunsensiya ang mga salita nito, tulad ng pagtawag ni Mommy Inday kay Gretchen bilang ST Queen, samantalang si Gretchen pala ang tumayong magulang ng magkakapatid noong kasagsagan ng kaniyang karera.

Wala nang trabaho noon si Daddy Mike, nagkasakit na ito, kaya ayon kay Joaquin ay si Gretchen ang nagbabayad sa renta ng kanilang bahay, ang sumasagot sa kanilang kuryente at pagkain, mga responsibilidad na dapat ay ang kanilang mga magulang ang tumutupad.

Kahit minsan man lang daw ba, tanong ni Joaquin, ay sinabihan ni Mommy Inday si Gretchen na tumigil na sa pagtatrabaho para makapag-aral, tulad ng malasakit at pagmamahal na ipinakikita-ibinibigay niya kay Claudine?

At ang pinakamatindi, ang matagal nang usap-usapan tungkol sa pagpapagamot ni Claudine at pagkakalagak sa basement ng isang ospital ay lumutang na rin nang hindi sinasadya. Ibinulgar ni Joaquin na ang mag-aasawang Barretto ang nagdesisyong ipa-ospital na si Claudine para mapigilan ang pagsira sa kaniyang sarili.

Nakalulungkot ang panghuling pakiusap ni Joaquin sa kaniyang ina, “Please put a stop to this before our family totally falls apart while there is still something to save.”

At ang lahat ng senaryong ito ay nagaganap sa harapan mismo ng publiko, ang pagbabatuhan nila ng putik ay nasasaksihan ng buong bayan, nakalulungkot lang dahil ang mga nagbabangayan sa pagkakataong ito ay mga personalidad na ipinakete noon bilang mga edukado at galing sa buena familia na Inglisan pa nang Inglisan.

Isang source ang nagbulong sa amin na nakikipagkita na ngayon si Gretchen sa kaniyang mga abogado para tilad-tilarin ang mga nilalaman ng opisyal na pahayag ng kaniyang inang si Mommy Inday Barretto kamakailan.

Totoo nga ba ang kuwento na mula nang tumigil si Gretchen sa pagbibigay ng sustento sa kaniyang ina dahil sa mga pangsarili niyang dahilan at nadiskubre ay sobra-sobra na ang naging galit nito sa kaniya?

“It’s not for me to answer that, why don’t you ask Gretchen?” makahulugang tugon ng aming source.

Nagugulat kami sa aming mga naririnig ngayon. Sinosorpresa kami ng mga reaksiyon ng ating mga kababayan tungkol sa ginawang pakikisahog ni Mommy Inday Barretto sa nagaganap na salpukan ng kaniyang mga anak na sina Gretchen at Claudine.

Walo sa bawat sampung makausap namin ay nalulungkot-nanghihinayang, bakit daw kinailangan pang makialam ni Mommy Inday sa isyung kinapapalooban ng kaniyang mga anak ngayon na mayroon siyang kinakampihan? Di raw ba’t tagaapula ng apoy at hindi tagasindi ng ningas ang papel na dapat ginagampanan ng magulang sa mga ganitong pagkakataon?

Malalim pang analisasyon ng isang nakausap namin, “Hindi kaya naisip ni Mrs. Barretto na sa kaniya rin ang balik ng lahat ng basurang itinapon niya laban kay Gretchen? Totoo man o hindi ang mga revelations niya, sa kaniya pa rin ang siguradong balik noon!

“Una, bakit nga ba nagkaganyan ang mga anak niya? Si Gretchen, sa ganda niyang iyon at kasikatan, puwede namang magkaroon ng asawang legal. Pero bakit pumayag siyang maging mistress lang?

“Si Marjorie naman, nahiwalay sa asawa niya, pero laman din ng mga kuwento dahil sa politician-boyfriend niya. Then, si Claudine naman, magulo rin ang buhay!

“Nakanino ba ang mali doon? Bakit nagkaganyan ang mga anak ni Mrs. Barretto? Saan ba siya nagkulang bilang magulang? Talaga bang ganyan ka-loose ang moral values ng mga anak niya?

“Kanino nga kayang mali iyon? Sino ang sumobra at sino ang kinulang? Ano at sino sa palagay mo?” tanong-opinyon ng aming source.

Iniiwanan po namin sa inyo ngayon ang pagbabalanse at sagot.

Have a comment on this article? Send us your feedback

Mayo 16 – 31, 2013

	Jolo Revilla
	Mayor Joseph Ejercito Estrada at Vice-Mayor Isko Moreno
	Governor Vilma Santos
	Grace Poe
	Aga Mulach & Charlene Gonzales
	Charice Pempengco & Ayie

Vice Gov. Jolo Revilla – Isa sa pinakabatang nahalal sa eleksyon

Isa si Vice Governor Jolo Revilla sa mga pinakabatang politikong nagtagumpay ngayong eleksiyon. Napakasuwerteng aktor-politiko dahil sa unang pakikipaglaban niya sa mas mataas na posisyon ay nanalo siya kaagad.

Noong Martes (Mayo 14) nang hapon ay nakapanayam namin ang nagwaging vice-governor ng lalawigan ng Cavite. Ayon kay Jolo ay hindi lang ang kaniyang pagtatagumpay ang pinaghuhugutan niya ng kaligayahan ngayon, kundi pati ang pananalo ng kaniyang inang si Congresswoman Lani Mercado, Mayor Strike Revilla at tiyahing si Rowena Bautista bilang konsehal.

Matamis ang tagumpay na ito para kay Vice-Governor Jolo Revilla dahil kung matatandaan, noong kasagsagan ng kampanya ay umakyat pa sa entablado ng kanilang kalaban si P-Noy para lang sabihing hindi dapat nagpapadala ang mga botante sa papogian lang at mga agimat na hindi naman totoo.

Ano ngayon ang masasabi ng mga nangmaliit noon kay Jolo Revilla? Paano iyan, gumana at nagtrabaho nang husto ang kaguwapuhan at ang makasaysayang agimat ng kaniyang lolo at ama?

“Basta ang sa akin lang po ay ipagpapatuloy ko ang dati ko nang ginagawang sinserong paglilingkod sa aking mga kababayan sa Cavite. Lahat ng aking ipinangako sa kanila ay kailangan kong tuparin.

“Kailangan kong panindigan ang aking mga sinabi dahil alam ko na doon nila ako susukatin. Nasa puso ko po ang paglilingkod, tututukan ko ang mga pangangailangan ng aking mga constituents,” sinserong sabi pa ni Vice-Governor Jolo Revilla.

Pinasalamatan din ng pangalawang tagapamuno ng lalawigan ng Cavite ang nag-iisang babaeng nagmamay-ari ng kaniyang puso ngayon na malaking tulong at suporta rin ang ibinigay sa kaniya sa labang ito - si Jodi Sta. Maria.

“Maraming salamat sa tiwala at suporta niya sa akin, napakalaki ng naitulong niya sa laban kong ito,” naniningkit pa ang mga matang pahayag ng batambatang aktor-politiko.

Mayor Erap at Vice Mayor Isko – Mga bagong lider ng Maynila

Maligayang-maligaya ang industriya ng lokal na aliwan ngayon dahil sa tagumpay ng mga personalidad na pumagitna sa nakaraang halalan. Minaliit sila noong una, ginamitan ng linyang “artista lang,” pero hindi iyon nagpahina ng kanilang mga kalooban para ituloy ang kanilang laban.

Habang sinusulat namin ang kolum na ito ay pormal nang ipinahayag ang bagong punong-lunsod ang Maynila. Proklamado na sina Mayor Joseph Ejercito Estrada at Vice-Mayor Isko Moreno bilang mga bagong lider ng lunsod ng Maynila.

Napakasakit ng mga salitang ipinakain ni Gen. Lim kay Pangulong Erap, masyadong pinersonal nito ang laban. Hindi ito sumentro sa tunay na isyu kundi ibinabalik pa nito ang alaala ng kahapon na kung tutuusin ay ipinanghingi na ng tawad ng simbahan kay dating Pangulong Joseph Estrada.

At gusto naming saluduhan nang malayuan ang bagong tagapamuno ng lunsod ng Maynila sa kalinisan ng kaniyang puso sa hindi pagtatago ng galit o kahit sama ng loob lang sa mga taong nakapananakit sa kaniyang damdamin.

Napatunayan na niya iyon sa pagpapatawad kay Governor Chavit Singson na nagsilbing mitsa sa pagkawala niya sa puwesto. Nakaya niyang alisin ang bara sa kaniyang puso nang magkita sila at magkausap. Ganoon din ang sinasabi niya ngayon sa estado nila ni G. Alfredo Lim.

Si Mayor Joseph Ejercito Estrada ang literal na ehemplo ng taong hinahamon-sinasaktan ng kapalaran pero patuloy na itinatayo ng panahon.

Gov. Vilma Santos – Hindi pa ipinapanganak ang tatalo kay Ate Vi

Sa lalawigan ng Batangas ay walang kahirap-hirap din ang pinagdaanang matagumpay na laban ni Governor Vilma Santos. Hindi naman sa minamaliit namin ang kapasidad ng mga nakaengkuwentro niya sa posisyon pero bago pa nag-eleksiyon ay puwede nang magbakasyon sa ibang bansa ang Star For All Seasons para mamahinga-magbakasyon na lang.

Ayon na rin sa kaniyang mga nasasakupan ay hindi pa ipinanganganak ngayon ang tatalo kay Governor Vima sa kanilang lalawigan. Ga-graduate sa pagiging gobernadora ang aktres na kakambal ang malinis niyang pangalan. Malayong biyahe ng serbisyo talaga ang ibinibigay sa mga pulitiko ng sinseridad at katapatan.

Matagumpay rin sa kaniyang laban bilang kinatawan ng kaniyang distrito sa Ormoc ang aming kasama sa Ang Latest na si Congresswoman Lucy Torres-Gomez, pero hindi naging kasingsuwerte niya ang kaniyang mister na si Richard Gomez. Hindi pa siguro talaga nakadisenyo ang mundo ng pulitika para kay Goma sa mga panahong ito.

Sana nga ay huwag nang magbago pa ang numerong inirerehistro ng unang pagtatangka ni Aga Muhlach sa mundo ng pulitika. Panalo na rin siya sa giyerang ito.

Namamayagpag din siyempre si Vice-Mayor Isko Moreno, si Congresswman Alfred Vargas at si Governor ER Ejercito.

Sen. Grace Poe – Karapatdapat talagang ihalal ang anak ni FPJ at Susan Roces

Walang duda ang kasikatan ng dating MTRCB Chairman na si Grace Poe Llamanzarez na gumawa ng milagro sa labanan ng mga senador.

Gustung-gusto namin ang kababaan ng kalooban ni Senador Grace Poe nang sabihin niya na maraming beses siyang nagdasal at hiniling niya sa Panginoon na sana’y maipanalo niya ang laban at mabigyan siya ng magandang numero para sa katahimikan ng kaniyang kalooban.

“Pero nasorpresa ako. Hindi ko inasahan na ganito pala kagandang numero ang isasagot ng Diyos sa aking hiling. Kahit ako’y hindi makapaniwala sa magandang numerong kinaroroonan ko ngayon,” mapagkumbabang pahayag ng nangungunang pangalan sa hanay ng mga naglaban-laban sa pagka-senador.

Gumagana pa rin ang karisma ng namayapang Hari Ng Aksiyon sa kaniyang mga mahal sa buhay. May kampana pa rin sa tenga ng ating mga kababayan ang pangalang Fernando Poe, Jr. Sabi nga ni Senador Grace Poe ay nasa paligid lang ang kaniyang ama na umaalalay sa kaniyang mga pangarap.

Shalani Soledad – Natalo dahil sa sama ng ugali ng isang campaign staff?

Kung maraming personalidad na nagtagumpay sa kanilang laban noong nakaraang eleksiyon ay mayroon din siyempreng nagtangka pero hindi nakalusot.

Isa sa mga dahilan kung bakit nagdesisyon si Shalani Soledad na maging co-host noon ni Willie Revillame ay para umingay ang kaniyang pangalan. Mayroon na siyang inaasintang posisyon noon, mas mataas kesa sa pagiging konsehal, pinag-usapan noon si Shalani Soledad.

Bago dumating ang halalan ay nagpakasal pa sila ni Congressman Roman Romulo, kaya ang komento ng ating mga kababayan ay bagay na bagay sila, dahil tatakbo ring kinatawan ng Valenzuela City si Shalani.

Noong pumutok ang balitang tatakbo siyang kongresista sa Ikalawang Distrito ng siyudad ay maraming nagkomento, pader ang kaniyang babanggain, pero walang nakapigil sa kaniyang ambisyong maging kinatawan.

Mukhang mali ang hindi niya pakikinig dahil ang matagal niyang pinaghandaang ambisyon ay nauwi sa wala. Natalo si Shalani, hindi niya na makakasama sa Mababang Kapulungan ang kaniyang mister.

Pero gaano katotoo ang mga umiikot na kuwento na kung si Shalani lang ay mayroon pa sana siyang tsansang makasungkit ng posisyon pero may mga tao raw sa kaniyang paligid na hindi nagustuhan ng kaniyang mga kadistrito?

Kuwento ng isang source, “Iyon ang nakasira sa kaniya, hindi naging maganda ang dating niya sa mga kadistrito niya, mukhang nagmalabis ang taong iyon na hindi pa man, eh, ang dami-dami nang ginagawang hindi nakaganda sa pangalan ni Shalani,” sabi nito.

Bata pa naman si Shalani Soledad, mayroon din siyang pusong handang maglingkod. Palaging may lugar kahit saan ang mga taong may sinseridad ang ginagawa.

Julia Barretto – Pinakamaganda sa mga batang artista ngayon

Magaling magdala ng problema ang baguhang youngstar na si Julia Barretto. Napaka-cool ng bagets, hindi siya sagot lang nang sagot. Kung iba-ibang kabataang artista lang si Julia ay siguradong nagamit na ngayon ang situwasyong kinapapalooban ng kaniyang ina at mga tiyahin.

Positibo si Julia. Palagi siyang naniniwala na isang araw ay magkakausap din ang magkakapatid na Barretto at matatapos na rin ang hidwaang namamagitan sa kanila.

Napakagandang bata, magaganda talaga ang naging produkto nina Dennis Padilla at Marjorie Barretto, pero ang angat sa kanilang mga anak ay si Julia talaga.

Sa hanay ng mga baguhang artista ngayon sa Dos ay si Julia ang pinakamaganda at matalino. Sana’y mahasa rin siyang umarte mula sa mga workshops na dinadaluhan niya. Maitayo sana niya uli ang bantayog ng mga Barretto na wala naman sigurong kokontra kung sasabihin naming tumagibang talaga nang dahil sa mga kontrobersiyang kinasangkutan nila.

Barretto family – At last, nanahimik na ang bangayan

Tahimik na ang kapaligiran sa pamilya Barretto. Hindi sila nakipagpaligsahan sa eleksiyon. Wala nang umeksena pa uli para makipagkampihan kina Gretchen at Claudine.

Siguro nga ay pinakinggan ni Mommy Inday ang isang kaibigang nagpayo sa kaniya na tumigil na sa paglalabas ng kaniyang emosyon dahil sa kasasalita niya ay lalo lang lumalaki ang gawak ng kaniyang pamilya.

Nagsimula at natapos ang kaguluhan nila nang walang anumang nanggaling na komento mula sa pamilya ni Raymart Santiago na nakipaghiwalay kay Claudine. Maraming nagtangkang mag-interbyu sa action star pero puro ngiti lang ang isinasagot nito at ang pagpapasa kay Claudine ng pagkakataong magsalita.

Si Claudine naman, buking na buking na ngang wala na si Raymart sa kanilang bahay ay nagpakuha pa ng retratong kunwari’y nililinis ang magarang kotse ng kaniyang mister, mapatunayan lang na hindi sila naghiwalay.

Ano kaya ang saloobin ngayon ni Kuya Ramon Tulfo sa lahat ng mga kaganapang ito? Napapailing na lang siguro nang malakas ang matapang na kolumnista.

Daniel Padilla – Inuuna ang kaligayahan ng kaniyang pamilya

Kundi magbabago ang ugali at propesyonalismo ni Daniel Padilla ay siguradong magtatagal ang bagets na ito sa kaniyang pinasimulang posisyon sa showbiz. Ang anak na may magandang kalooban at marunong tumanaw ng utang na loob ay pinagpapala.

Bago ang kaniyang sariling granatsa sa buhay ay inuuna muna ni DJ ang mga pangangailangan ng kaniyang pamilya. Ngayon ay mayroon na siyang ipinagagawang bahay hindi lang para sa kaniya kundi para sa kaniyang ina at mga kapatid.

“Napakabait na bata. The night before niya pinuno ang Araneta Coliseum, e, magkakasama pa kami sa house nila. Natetensiyon na kasi si Karla, kaya kailangan namin siyang samahan.

“Nandoon lang si Daniel, patakbo-takbo lang sa bahay nila, nakikipaglaro siya sa anak kong si Harvey. Simpleng-simple, walang kaere-ere, kaya noong makita ko nang punumpuno ang Araneta, e, napaluha ako.

“Parang hindi kasi siya iyong bagets na wala lang, nakikipaglaro lang the night before his concert. Noong lumabas na siya at halos wala na kaming marinig na boses niya dahil sa dagundong ng buong Araneta, e, naalala kong bigla ang pagkabata ni DJ.

“Iginapang siya nang husto ni Karla, alam na alam ko ang kuwento kung paano siya nakapag-aral, kung paano siya lumaki, alam ko lahat iyon, kaya napakasaya ko sa success niya ngayon,” puring-puri ni Tates Gana ang kaniyang pamangkin-anak-anakan.

Wala ring kahit sinong nagrereklamo sa ginagawang pakikitungo ng bagets actor sa kaniyang mga kapwa artista, kaibigan at katrabaho. Propesyonal siya, tahimik lang, nagdedeliber ng inaasahan sa kaniya ng network na tumutulong sa kaniya.

“May mga kuwentong lumalabas na kung minsan daw, e, parang may attitude na rin si Daniel. Wala po. Talaga lang ganoon ang tao, may araw na parang pagod na pagod siya, kailangan ng pahinga, pero hindi nangangahulugan iyon na nagbago na siya, na nagsusuplado na siya.

“Unang-una, hindi naman nagpanggap si Daniel kahit kailan na si Superman siya, na wala siyang kakulangan, hindi siya perfect,” pagtatanggol sa batang aktor ng isa niyang katrabahong beteranong aktor.

Charice Pempengco – Ibang-iba na ang image, sayang

Ang mga ispekulasyon at haka-haka tungkol sa kasarian ng international star na si Charice Pempengco ay nagkaroon ng hugis at linaw sa ipinalabas na panayam sa kaniyang Lola Tess at sa isang nagngangalang “Mike” sa Ang Latest Updated kamakailan lamang.

Malinaw ang mensahe. Nagrerebelde ngayon si Charice na nagtangka pa palang ipapulis ang kaniyang inang si Raquel. Diumano’y nagpakasal din salas Vegas ang singer at si Courtney Blooding na tumatayo niyang road manager.

Pero ang pinakahuling balita ay may isa pang babaeng napapabalitang karelasyon ngayon si Charice. Ito ang miyembro ng isang all-female band na sumali sa isang talent search kung saan siya naging hurado kamakailan. Nagsasama na sila sa isang bahay sa Laguna pero kumuha ng mga ahente ng NBI ang ina ng dalaga at binawi ito kay Charice.

Windang na windang ang kalooban ng Nanay Tessie ni Charice na nagpalaki sa kaniya, ito ang ina ni Raquel na inaway-away nito noon, pero silang mag-ina ngayon ang magkakapit-bisig para idiretso ang para sa kanila’y maling daan na tinatalunton ni Charice.

“Nakarating din sa akin na lalaki ka na raw, pero ang masasabi ko lang, may monthly period ka pa rin, anak. Matagal ko nang alam na nagrerebelde ka, pero sana, ang sakit na nararamdaman ngayon ng mommy mo, eh, nararamdaman mo rin.

“Ang sabi nga, blood is thicker than water, pero bakit ganyan, sa nakikita ko sa iyo, eh, parang mas matimbang na ang tubig kesa sa dugo para sa iyo,” mensahe ni Nanay Tessie para sa kaniyang mahal na apo.

Ayon sa kampo ni Raquel ay nauubos daw ang pera ni Charice dahil sa babae at sa mga taong nakapalibot sa kaniya ngayon. Nagkaroon pa pala ng insidenteng iniuuwi ni Raquel ang kaniyang anak, pero tumawag ng mga pulis si Charice, sinasaktan daw siya ng kaniyang ina.

Komento ni Nanay Tess, “Pero ang sinabi mo, eh, pagpapapatayin mo silang lahat o magpapakamatay ka kapag pinilit ka. Mali iyon, bunso, maling-mali, salita ‘yan ng mga nagda-drugs.”

Kay Charice kailangang manggaling ang katotohanan, siya lang ang makapagsasabi kung totoo bang nagpakasal na sila ni Courtney Blooding sa Las Vegas, gaano rin katotoo na mayroon siyang planong kasamahin sa kaniyang bahay sa Laguna pero binawi ng kaniyang ina ang babaeng nagngangalang Ayie.

Kuwentong-Singapore naman ito noong minsang nakita ng mga kababayan nating matagal nang naninirahan-naghahanapbuhay doon si Charice Pempengco na nagsi-shopping kasama ang napabalitang pinakasalan niya salas Vegas na si Courtney Blooding.

Kuwento ng aming kausap, “Grabe pala talagang makaporma si Charice! Lalaking-lalaki siya, machung-macho, kung makaakbay siya sa blonde niyang kasama, eh, parang gusto niyang isigaw sa buong mundo na ang laki-laki ng kargada niya!

“Mhin na mhin siya, talagang girl na girl naman ang drama ng kasama niyang tisay, parang kanila lang ang mundo, may pahalik-halik pa si Charice sa girl habang nag-iikot sila!

“At ang twang ng Charice Pempengco, nakuha na niya ang twang ng Lola Oprah Winfrey niya! Ang bigkas niya sa twenty dollars noong may binibili siya, eh, tuweni! Laban kayo doon?

“Nakakagulat ang Charice na iyon! Noong umalis kasi kami dito ng family ko para mag-stay na sa Singapore, eh, kapapanalo pa lang niya sa Little Big Star. Magaling siya, pero hindi ko talaga akalaing maglaladlad pala siya nang ganyan katindi!” napapailing pang kuwento ng aming source.

Aiza Seguerra – Mas may delikadeza kung ihahambing kay Charice

Labas ang pagkondena sa kanilang lantad nang kasarian ay palaging napagkukumpara sina Aiza Seguerra at Charice Pempengco ngayon. Pareho silang produkto ng talent search, sumikat, parehong naging tomboy.

Pero pagpuna ng mas nakararami, nagbukas man ng kaniyang tunay na damdamin si Aiza ay hindi naman ito kasing-OA ni Charice na kailangan pang magparetrato na machung-macho siya. Pino ang ginawang paglalantad ni Aiza kumpara sa parang ipinagsisigawan pang gender ni Charice.

Discreet si Aiza, tahimik lang. Samantalang si Charice ay masyadong maingay at parang uhaw na uhaw na sabihin sa buong mundo na babae nga siya pero ang kaniyang puso at damdamin ay katulad ng sa isang lalaki.

Sabi ng isang kaibigan namin, “Saka hindi inaway ni Aiza ang parents niya sa pag-aming tibo nga siya. Hindi siya bumukod agad, kasama pa rin niya ang mga magulang niya, hindi tulad ni Charice na ipinapulis pa ang mommy niya dahil sinasaktan daw siya.

“Ano ba naman iyon? Kundi siya matanggap agad ng mommy niya sa inilantad niyang gender, eh, di maghintay siya? Alangan namang asahan niyang maiintindihan agad siya, eh, nakakagulat naman talaga ang transformation niya!” komento ng aming source.

Guy & Pip – Magbabalik ang 1970’s love team sa isang TV5 project

Live naming nakasama Ang Latest Updated ang Supestar na si Nora Aunor. Ibang-iba talaga ang kaniyang karisma. Ang mga dinatnan niya sa dressing room na ipinagamit sa kaniya ay parang pansamantalang nagsihinto ang ikot ng mundo, ang iba pa nga ay naglabasan, saka nila pinagpistahan ang Superstar noong nasa labas na sila.

Kababalik lang nila mula sa Nueva Vizcaya kung saan kinunan ang kabuuan ng ginawa nilang pelikula para sa TV5, ang Kuwento Ni Mabuti, ibinalita ng aktres na purong Ilokano ang mga dayalog niya sa nasabing proyekto.

“Doon na lang sa set ko pinag-aaralan ang mga dialogue, magaling kasi ang Ilokano coach namin, mabilis siyang magturo. Lima lang kaming artista sa indie movie, puro locals na ang mga nakasama namin doon,” balita pa ng magaling na aktres.

Pero ang nakatutuwang balita ay ang muli nilang pagsasama ng orihinal niyang ka-loveteam noong dekada 1970 na si Tirso Cruz III. Isang bagsakan lang iyon, When I Fall In Love ang magiging titulo noon para sa telecine ng TV5, si Direk Joel Lamangan ang mamamahala.

Siguradong ikatutuwa ng kanilang mga tagahanga ni Pip ang proyektong sisimulan na nila ngayong May 25 ang shooting. Aminin natin ang katotohanan na ang kanilang tambalang Guy & Pip ang pinakasikat noong kanilang kapanahunan, mga beterano nang personalidad ang nagsasabi na walang tumalo sa katanyagang iyon ng kanilang loveteam.

“Para sa mga tagahanga namin ni Pip ang project na ito. Nasa iba-ibang bansa na ang marami sa kanila, nagkaedad na sila, pero mas marami pa rin ang nandito at nakasuporta sa amin.

“Isang bigay lang ito para sa TV5, minsanan lang, pero sigurado namang masisiyahan sila dahil parang isang buong pelikula na ang mapapanood nila sa pagbabalik-tambalan namin ni Pipo,” nakangiting balita ng Superstar.

John Lloyd Cruz – Ipinagtanggol si Angel laban sa pananakit ni Diether

“Matindi talagang magalit ang taong pasensiyoso at mabait,” ganoon ang paglalarawan ng aming source tungkol kay John Lloyd Cruz. Totoo iyon. Hindi nga naman kasi basagulero ang sikat at magaling na aktor.

May pinag-ugatan ang komento ng aming impormante. Kamakailan lang kasi ay sinugod ni John Lloyd si Diether Ocampo sa set ng seryeng Apoy Sa Dagat.

Galit na galit si John Lloyd, hinamon niya ng suntukan si Diet. Noon lang nakita ng mga taga-ABS-CBN si John Lloyd na pulang-pula sa galit at nagbibitiw ng mga salitang hindi kinayang sikmurain ni Diether.

Ang walang labis at walang kulang na kuwento ng aming source, “Napasugod si Lloydie sa set dahil kay Angelica (Panganiban). Nagsumbong sa kaniya si Angel tungkol sa ginawa sa kaniya ni Diether.

“Sa isang eksena kasi, eh, babatuhin lang dapat siya ng bag ni Diet, pero isinunod na ibinato sa kaniya ang isang flower vase. Tinamaan si Angelica sa paa, masakit na masakit ang tama, kaya sinabi niya iyon kay John Lloyd.

“Galit na galit si Angelica dahil wala namang ganoong kasama sa scene. Bag lang ang ibabato sa kaniya, walang flower vase, pero ganoon ang ginawa ni Diet. Ang sabi ni Angelica, ayaw na niyang makatrabaho si Diet dahil sa mga ginagawa sa kaniya.

“Matagal na pala iyon, eh! Kahit pala sa Ruby noong magkasama sila, eh, mayroon nang ganoong scenario. Kaya ang sabi ni Angelica, ayaw na niyang makasama sa kahit anong project si Diet, tapusin na raw ang serye, dahil punumpuno na siya!” unang kuwento ng aming source.

Walang ama si Angelica Panganiban, walang kapatid, alangan nga namang ang ina nito ang pagsumbungan ng aktres para kumompronta kay Diet? Noon nito tinawagan si John Lloyd, nagsumbong ito sa kaniyang boyfriend, ipinagtanggol naman ng magaling na aktor ang kaniyang girlfriend.

“Galit na galit si Lloydie, sinugod niya talaga si Diet na napatunganga lang noong makita siyang galit na galit. Pinagmumura niya si Diet, talagang pinagmumura siya ni Lloydie!

“Tumigil na lang si Lloydie noong sumigaw ang executive producer ng serye, ‘Not on my set!’ sabi. Marespeto si John Lloyd, pero minsan pa niyang sinabihan si Diet.

“Ang sabi niya, ‘Okey, hindi dito. Pero ayoko nang marinig pa uli na sinaktan mo ang girlfriend ko! Huwag na huwag ko na uling maririnig iyon, dahil tayong dalawa ang maghaharap! Lalaki sa lalaki!’

“Nag-sorry si Lloydie sa staff and crew, pagkatapos noon, nag-usap lang sila ni Angel, umalis na siya. Sabi na nga ba, ibang klaseng magalit at mapuno ang mabait. Ngayon lang nangyari ang ganyan, masamang magalit si Lloydie!” kuwento uli ng aming source.

Gusto naming maniwala na walang intensiyon si Diether Ocampo na saktan si Angelica Panganiban. Mas gusto naming isipin na siguro’y masyado lang siyang nadala sa eksena. Kaya kasunod ng bag na pinag-usapan, naisunod niya ang pagbabato ng flower vase sa dalaga.

Pero ibang usapan na kung mayroon palang pinanggagalingan si Angelica. Panahon pa diumano ng pinagsamahan nilang serye noon ay ganyan na si Diet. May karapatan nang magreklamo ang aktres kapag ganoon.

Dahil ayaw nang makasama pa sa eksena ni Angelica si Diet ay gumawa ng paraan ang produksiyon. Kapag likod lang naman ng dalaga ang ipakikita sa eksena ay mayroon itong double, kapag walang tutok sa mukha ni Diether ang kinukunang eksena ay mayroon din siyang kadobol. Kapag kailangang-kailangan na lang talaga sa istorya na magkaharap sila ay saka nangyayari ang ganoong eksena.

At gaano katotoo ang umiikot na kuwento na si Diether Ocampo ang palaging dahilan ng pagtatagal ng kanilang taping? Bukod sa napaka-late na niyang dumarating sa set, hindi pa niya maitawid ang maiigsi lang namang dayalog sa eksena. Nakalilimot diumano ang hunk actor sa kaniyang mga linya? Ham actor?

Have a comment on this article? Send us your feedback

Hunyo 16 – 30, 2013

	Ai Ai Delas Alas & Jed Salang – noong maligaya pa
	Charice
	Charice at kaniyang steady girlfriend, Alyssa Quijano
	Aiza Seguerra
	Aga Mulach & Charlene Gonzales
	Kris Aquino

Ai Ai Delas Alas – Gusto pang ipahiya ng abusadong ex

Galit na galit kay Jed Salang ang mga tunay na nagmamalasakit at nagmamahal kay Ai Ai Delas Alas. Sinagot na kasi ng dating karelasyon ng Comedy Concert Queen ang mga ihinain niyang reklamo laban sa lalaking mahigit na isang taon din niyang nakarelasyon at pinakasalan pa nga salas Vegas kamakailan.

Naghain din ng TPO (Temporary Protection Order) si Jed Salang, mayroon pa itong hiling na gag order sa korte. Ibig sabihi’y pinagbabawalan nito ang komedyana na magpainterbyu tungkol sa kanilang umasim na relasyon.

Puwedeng pagbigyan ng korte ang hiling ni Jed, maaaring sabihan si Ai Ai na huwag nang magbibigay pa ng anumang impormasyon tungkol sa kanilang nasirang relasyon. Pero hindi doon nagsisimula at nagtatapos ang lahat.

Kahit pa hindi magsalita ang komedyana ay maraming nagmamahal sa kaniya. Naging mabuti ang pakikitungo ng Comedy Concert Queen hindi lang sa mga manunulat, kundi pati na sa kaniyang mga kapwa artista na aangat at siguradong magsasalita para siya maipagtanggol sa istorya ng pag-iibigan nila ni Jed.

Dapat sana’y paalis ang Comedy Concert Queen para sa isang concert sa ibang bansa, pero hindi niya iyon itinuloy. Gusto niyang dumalo sa unang araw ng pagdinig sa mga kasong isinampa niya laban sa lalaking pinakasalan niya salas Vegas na si Jed Salang.

Kung tutuusin, dahil si Ai Ai delas Alas naman ang nagdemanda ay puwede nang ang kaniyang abogado na lang muna ang dumalo sa hearing, kung kailan na lang siya kailangan ng husgado ay saka siya kailangang pumunta.

Talagang gustong ipahiya ng lalaki si Ai Ai dahil sa sinumpaang salaysay nito ay nakasaad na ang komedyana pa mismo ang lumapit sa kaniya para makipagkilala.

Mabuti na lang at nandiyan pa at buhay at buhay sina Direk GB Sampedro at Erik Santos na kasama ni Ai Ai noong gabing napakalakas ng loob na lumapit sa kanilang mesa si Jed Salang.

Ang lalaki ang lumapit at nakipagkamay kay Ai Ai. Nagulat pa nga ang kaniyang mga kasama kung saan ito humugot ng lakas ng loob na lumapit, dahil hindi naman madalas mangyari ang ganoon.

Noong umalis na sina Direk GB at Erik Santos ay nagpaiwan pa si Ai Ai, pero mayroon siyang kasama. Gusto bang palabasin ni Jed ngayon na sa unang pagkakita pa lang ng komedyana sa kaniya ay ayaw nang humiwalay ng babae?

Ano ba namang klase ng lalaki ang magdidiin pa ng ganoong senaryo? Nakakahiya ang mga gustong palabasin ni Jed. Parang ang gusto nitong palutangin ay patay na patay na agad si Ai Ai sa kaniya sa unang gabi pa lang ng kanilang pagkikilala, kawalan ng respeto ang maitatawag sa ganoong pahayag.

At sabihin na nating ganoon nga ang nangyari. Sakyan na natin ang trip ni Jed Salang na si Ai Ai nga ang nagpaka-trying hard na magkakilala sila. Ano naman ang mga sumunod na pangyayari pagkatapos noon?

Ang kaladkarin si Ai Ai sa casino? Ang hindi man lang bigyan ng pagpapahalaga ang imahe ng kaniyang karelasyon?

Natural, dahil isang bulag na mangingibig si Ai Ai noong mga panahong iyon na puro kaligayahan lang ng lalaki ang gustong ibigay, sumasama naman sa kaniya ang komedyana.

Charice – Diva? Sinayang ang training ni Oprah, David at Ellen

Matinding pang-aabala ang ginawa ni Charice Pempengco noong Miyerkules (June 12) nang gabi sa taping ng Talentadong Pinoy. May kani-kaniyang lakad ang mga hurado, pero hindi makapagsimula ng taping, dahil wala pa si Charice na uupo rin bilang judge sa talent search ng TV5.

Alas sais nang gabi ang calltime, pero alas nuwebe na siyang dumating, nanggaling pa raw kasi siya sa Laguna at nasapul sila sa daan ng malakas na ulan.

Natural, naiinis na ang lahat sa studio habang naghihintay sa kaniya. Hindi nga naman kasi nirespeto ng international singer ang kanilang oras. Alam niya naman na hindi makapagsisimula ang show nang kulang pa ang mga hurado, pero ganoon ang kaniyang ginawa, dumating siya nang gabing-gabi na.

Noong nasa X-Factor pa si Charice bilang hurado ay ganito rin ang mga kuwentong naglabasan tungkol sa kaniya. Masyado raw mapagpaimportante si Charice. Ayaw niyang may kasama siya sa dressing room at napakahirap tawagin kapag kailangan na siya sa stage.

Sayang naman ang training niya kina David Foster, Oprah Winfrey at Ellen DeGeneres kung ganyan ang pinaggagagawa niya. American time dapat ang pinaiiral niya dahil ganoon ang pamamalakad na nagisnan niya sa bansa ni Uncle Sam. Pero bakit kabaligtaran noon ang ipinakikita niya ngayon?

Madiing pinabulaanan ni Aling Raquel Pempengco ang kuwento na ang totoong ikinagagalit niya sa nagaganap ngayong hidwaan nila ni Charice ay ang pagkakatigil ng kaniyang sustento.

Ikinakaila iyon ni Aling Raquel. Mula raw noong 2010 ay mayroon nang humahawak sa kinikita ng kaniyang anak sa Amerika. Ito raw ang kumokontrol sa labas at pasok ng pananalapi ng international singer, kaya walang katotohanan na sustentado pa rin sila hanggang ngayon ng kaniyang anak.

Anuman ang nagaganap sa kanila ngayon ay malinaw ang sinasabi ng pangyayari. Naging mabuting anak si Charice sa kaniyang pamilya, kahit pa hindi niya naman obligasyon ang ganoon.

Mula raw noong 2010 ay hindi na siya umaasa kay Charice, nanggaling daw iyon sa kaniyang anak. Gusto na raw nitong magsolo sa buhay na inunawa niya naman.

Kung totoo raw na hanggang ngayon ay sinusustentuhan pa rin siya ni Charice, bakit daw siya nanghihingi ng tulong sa kanilang mga kamag-anak, talagang pinaninindigan iyon ng ina ng international singer.

Pero kung matatandaan, sa isang panayam ay nabanggit ni Aling Raquel na panay-panay ang pagwi-withdraw ng pera ni Charice, kung saan daw iyon dinadala ng kaniyang anak ay hindi niya alam.

Namo-monitor niya ang labas at pasok ng pera sa bangko ni Charice. Galit na galit siya nang makarating sa kaniya ang impormasyon na naglabas nang milyon ang singer.

“Ang pinagdududahan nilang pinagkakagustusan ni Charice ngayon, eh, si Alyssa Quijano, pati raw ang family ni Alyssa, kay Charice na lang umaasa ngayon. Iyon ang talagang ikinagagalit ngayon ng mommy ni Charice,” sabi ng aming source.

Pero wala na silang magagawa, matindi na ang pagmamahalan nina Charice at Alyssa ngayon. Nakapagbuo na sila ng sariling mundo at sinumang manghimasok at kumontra sa kanilang pag-iibigan ay itinuturing na nilang kalaban.

“Saka pera iyon ni Charice, hindi obligasyon ng anak na buhayin ang pamilya nila. Iyong pagtulong sa ginagawa niya noon, eh, kunsiderasyon na lang, never an obligation!” pagdidiin naman ng isang nakakuwentuhan namin.

Alyssa Quijano – Bakit kaya kinababaliwan ni Charice?

Matindi ang pagkontra ni Aling Raquel at ng ina nitong si Nanay Tessie kay Alyssa Quijano. Ang dahilan, bumiyahe ang mag-ina pabalik sa napakatagal nang panahon noong mga kontesera pa lang sina Charice at Alyssa.

Sinisira-siraan daw kasi ni Alyssa at ng pamilya nito si Charice. Ang mga ito raw ang namimintas-nanglalaglag noon sa batambata pang si Charice, kaya ganoon na lang ang galit ni Nanay Tessie at ni Aling Raquel sa kasalukuyang pag-ibig ng deklaradong tibo na si Charice.

Takang-taka ang mag-ina kung bakit at paanong si Alyssa Quijano ang minahal ni Charice. Napakarami raw namang babae diyan, pero kung bakit si Alyssa pa ang napiling makarelasyon ng international singer?

Ang dalaga ang itinuturing na mundo ngayon ng international singer. Nagsumpaan sila na magmamahalan hanggang sa dulo ng walang hanggan. Iyon ang malinaw na naka-tattoo ngayon sa mismong leeg ni Charice.

Magsisimula raw sila sa forever, kahit pa hindi naman ipinapangako ang bukas para sa mga nagmamahalan. Walang pakikinggang galit, opinyon at katwiran ngayon si Charice dahil lulong na lulong siya sa pagmamahalan nila ni Alyssa Quijano.

Walang ibang dapat gawin ngayon ang lola at ina ni Charice kundi ang maghintay sa takdang panahon na makatatanggap na si Charice ng mga pangaral at suhestiyon.

Aiza Seguerra – Mas may delikadeza kaysa kay Charice

Tama ang obserbasyon ng mga kaibigang nakakausap namin. Ang mga kuwentong nag-uugnay ngayon kay Charice Pempengco at sa kaniyang pamilya ay hindi nangyari kay Aiza Seguerra na aminado ring tibo.

Magkaiba naman kasi ang kanilang istorya. Mula sa pagiging child star ay biglang nawala pansamantala si Aiza. Nang bumalik ito, kakaiba na ang kaniyang dating. Brusko na ang dating batang sumasayaw na parang bibe sa Eat…Bulaga.

Kumbaga ay nagkabiglaan na lang si Aiza at ang publiko. Walang sabi-sabi, basta lalaking-lalaki na ang dating nito nang muling magbalik sa pagkanta.

Ito namang si Charice ay naglantad nang husto. Noon pa napapabalitang pusong-lalaki nga ang international singer, pero wala tayong anumang naririnig mula sa kaniya. Nagulantang na lang ang lahat nang umamin si Charice na totoo ngang babae rin ang hanap niya.

“I find Aiza’s revelation more discreet, iyon ang reason kung bakit wala tayong napanood na negative reaction from her parents. Basta nandiyan na lang siya, tomboy na, walang kung ano-anong kuwento!” pagtatanggol ng aming impormante.

Ang kay Charice kasi ngayon ay naging karnabal. Pinagpipistahan ang kaniyang paglaladlad. Pati ang kaliit-liitang kuwento tungkol sa kanilang pamilya ay bahagi ngayon ng mga kuwentuhan sa bangko, sa palengke, sa talipapa at sa kahit saan.

Mas simple ang pagharap sa katotohanan ni Aiza Seguerra. Ang kay Charice Pempengco naman ay may mga kasamang kuwitis ng pasabog, magkaibang-magkaiba pero iisa lang naman ang rebelasyon.

Vice-Ganda – Binabantayan ng ng MTRCB, dapat noon pa

Binabantayan na ngayon ng MTRCB ang mga programang minamaneho ni Vice Ganda. Iyon ang naging aksiyon ng ahensiya dahil sa dami ng reklamong lumulutang ngayon sa mga social networking sites kontra sa may kagaspangang atake ng komedyante sa kaniyang mga shows.

Kung tutuusin ay huli na ang aksiyong ito dahil matagal nang tinutuligsa ng ating mga kababayan ang hindi napapanahong pagkokomedya ni Vice sa katanghalian. Minantikaan kasi ang kaniyang dila, walang tali, kung ano ang gusto niyang sabihin ay wala siyang pakialam sa kaniyang mga masasagasaan.

Ang mga pagmamaasim kasi ay hinahalakhakan lang sa una, pero sa katagalan ay iniluluwa na rin, tulad ng uri ng pagpapatawa at pagho-host na alam ni Vice Ganda.

Isang gabi ay nag-iiyak daw itong si Vice Ganda sa isa niyang kaibigan. Masakit daw ang hagulgol ng becking komedyante, nagpapalahaw talaga siya.

Tinablan na siguro siya ng super-negatibong komentong nakakalat na parang basura sa halos lahat ng social networking sites. Wala naman kasing pumupuri sa kaniyang ginawa sa respetadong news anchor na si Jessica Soho, puro nega ang inaabot niya ngayon mula sa ating mga kababayan.

Nagmayabang pa kasi siya sa isang interbyu pagkatapos ng ginawa niyang panglalait-paglalaro sa pagkatao ni Ms. Soho. Ang akala raw niya ay mawawasak siya ng mga negatibong komento ng mga kababayan natin, hindi pa rin daw naman pala at mayroon pa siyang ilalakas.

Komento ng isang nakakakilala kay Vice Ganda nang mula ulo hanggang paa, “Kilalang-kilala namin siya. Kahit iyong panghihingi niya ng apology kay Jessica Soho, hindi namin kinakitaan ng sincerity.

“Ginawa niya lang iyon para mabawasan ang mga haters niya, pero hindi iyon galing sa puso, para pa rin sa career niya ang pag-a-apologize na iyon. Si Vice pa? Aysus, kilalang-kilala namin siya,” komento ng aming kausap.

Sa totoo lang. Sobra-sobra na kasi ang paniniwala ni Vice Ganda sa kaniyang sarili, tingin niya ay napakasikat na niya, isang uri ng katanyagan na wala nang katapusan.

Kris Aquino ­– Dapat iwasan ni James Yap ayon sa korte

Kinatigan ng husgado ang hiling ni Kris Aquino na hinding-hindi na siya maaari pang lapitan ngayon ng ama ng kaniyang anak na si James Yap. Kapag nasa paligid-ligid lang si Kris at nalaman iyon ng basketbolista ay ito ang dapat umiwas. Ang ama ni Bimby ang dapat gumawa ng paraan para hindi sila magkaengkuwentro ng aktres-TV host, iyon ang nakasaad sa mga dokumentong legal na kalalabas pa lang mula sa husgado.

Pero sa hiling ni Kris na hindi na puwedeng malapitan ng kanilang anak na si Bimby si James, o ni James si Bimby, ay denied ang kaniyang hinihingi sa korte.

Kunsabagay ay noon pa naman nagsasabi si James na wala na itong pakialam pa kay Kris. May kani-kaniyang buhay na sila ngayon at tanggap na tanggap na ng basketball player nang isandaang porsiyento ang kanilang sitwasyon.

Ang tanging gustong mangyari na lang ni James ay ang makita-makasama ang kanilang anak. Iyon na lang ang inaasahang mangyari ng basketbolista, wala na itong keber kung magkita man sila ni Kris o hindi na habambuhay.

Salamat naman at nasilip ng husgado ang nararapat para sa mag-ama, lalo na para sa lumalaki nang si Bimby. Iyon naman talaga ang ideyal na dapat mangyari sa mag-ama sa pagpapawalang-bisa sa kasal nina James at Kris.

Iyon nga lang lumaki ang isang bata sa isang pamilyang magkahiwalay ang mag-asawa ay napakahirap na. Iyon pa kayang lumaki ang anak na alam niya namang mayroon siyang tatay pero hindi man lang niya makita, dahil ipinagbabawal iyon ng kaniyang ina?

Huwag naman. Mabuti naman at pinahalagahan ng husgado ang pagkakaroon ng isang normal na buhay ni Bimby. Tama na ang mga kapritso. Ang kapakanan na lang ng bata ang kailangang bigyan ng pagpapahalaga sa ganitong sitwasyon.

Have a comment on this article? Send us your feedback

Hulyo 16 – 31, 2013

My Husband’s Lover – Mainit na mainit, paborito ng bayan

	Dennis Trillo, Tom Rodriguez & Carla Abellana
	Jolo Revilla & Jodi Sta. Maria
	Zoren Legaspi & Carmina Villaroel
	Claudine Barretto & Raymart Santiago
	Toni Gonzaga
	Daniel Padilla & mom, Karla Estrada

Ibang klase talaga ang ating lahi. Kung ano ang mainit, iyon ang sinasalat natin, kung ano ang pinipigilan at ipinagbabawal ay iyon ang gusto nating matikman.

Laganap na nga ang lagnat ng bayan ngayon sa seryeng My Husband’s Lover dahil wala nang pinipiling lugar at okasyon ang pagpipista ng ating mga kababayan sa istoryang pinagbibidahan nina Carla Abellana, Tom Rodriguez at Dennis Trillo.

Kuwento ng isang kaibigan naming nagtatrabaho sa isang malaking laboratoryo ng mga gamot, “Naku, bago kami nagtrabaho, mayroon muna kaming chikahan portion ng mga officemates ko. Ang topic namin, ang mga pinakahuling eksenang napanood namin sa My Husband’s Lover. Kawawa ang hindi maka-relate, kilig na kilig kami kina Vincent at Eric, nakakaloka naman kasi ang mga tinginan nila.

“Saka sa opisina namin, mayroon din kaming sariling Vincent at Eric, may girlfriend sa office namin iyong isang kasamahan namin, pero mas madalas niyang kasabay kumain at umuwi iyong isang officemate namin na medyo mahinhing kumilos.

“Sila ang topic namin palagi, ang peg namin, eh, sina Dennis Trillo at Tom, awang-awa kami sa officemate naming girl na mukhang natutulog sa pansitan!” kuwento ng aming kaibigan.

Sa isang lamay na pinuntahan namin ay ang seryeng iyon din ang pinagkukuwentuhan ng mga bagets. Mga Atenista silang naturingan pero ang My Husband’s Lover ang pinagpipistahan nila.

Mayroon pa silang blind item, “Sino naman ang guy na inis na inis kapag matindi ang traffic? So, para mapanood niya ang favourite series niya, bumili siya ng phone with TV, wala na nga namang nakalalampas na eksena sa kaniya!” sabi ng isang napakaguwapong tisoy na bagets.

Sagot ng pinatatamaan nito, “So, is it a crime? Bakit ba, eh, sa ayokong palampasin ang istorya na iyon! Bakit, ako lang? Sino naman ang classmate natin na hindi mo makakausap sa phone habang nanonood ng My Husband’s Lover?

“At mayroon pa siyang text, ‘Don’t call me, guys, I’ll just call you later.’ O, di ba, puwede ka lang kausapin pag tapos na ang My Husband’s Lover?” ganti naman ng pangalawang bagets.

Hindi mo aakalain na pati sila ay na-magnet na rin ng nasabing serye. Iisipin mo kasi na ang mga anak-mayaman ay hindi mag-uubos ng panahon sa panonood ng mga ganoong programa, pero kabisado nila pati ang pagkakahuli ni Carla kina Dennis at Tom na pasimpleng naglalambingan.

Kinabog talaga ng GMA-7 ang ABS-CBN sa pamamagitan ng seryeng iyon na buong-tapang na pinanindigan ng Siyete, bakit nga naman sila magpapaapekto sa mga umeepal na ihinto ang programa dahil hindi magandang panoorin iyon ng mga kabataan? Sa panahon ngayon na dalawa-singko na lang ang tatsulok na relasyon na ang ikatlong parte ay becki?

Kung gusto ng Dos ay sobrang kayang-kaya naman nilang plakaduhin ang My Husband’s Lover ng Siyete. Kesehodang sabihin pa ng ating mga kababayan na manggagaya lang sila, napakarami nilang artistang puwedeng gumanap sa ganoon ding papel na mas kapani-paniwala pa nga.

Jolo Revilla – Ang tunay na “Sir Chief” ni Jodi Sta. Maria

Hindi na sila mga bagets pero kapag magkasama sila ay parang mga teenagers na kinakikiligan sina Vice-Governor Jolo Revilla at Jodi Sta. Maria. Kahit noong magbakasyon sila sa Boracay ay kinikilig ang mga nagkukuwento sa amin habang pinagmamasdan sa di kalayuan ang dalawa.

Sabi ng isang kaibigan naming becki na super-pintasera at parang palaging nakainom ng purong calamansi juice sa pagmamaasim, “Alam mo iyong pagmamahalang mata lang ang nagsasalita? Sila iyon! Sa pagtitinginan pa lang nina Jolo at Jodi, kikiligin ka na!

“Hindi sila iyong tipong nagpi-PDA (public display of affection) na kuyangyangan nang kuyangyangan sa harapan ng mga tao, basta wala lang, nagtitinginan lang sila. Pero from there, eh, mararamdaman mo na lang na kinikilig ka na sa kanila,” paglalarawan pa ng aming kaibigan.

May anak na si Vice-Governor Jolo kay Grace Adriano na anak ni Rosanna Roces. May anak na rin si Jodi kay Pampi Lacson na ama naman ng ipinagdadalantao ngayon ni Iwa Moto. Pero ang mga kuwento ng kanilang nakaraan ay hindi nakaaapekto sa ganda ng kanilang relasyon ngayon.

Kapag pumasok talaga ang respeto sa isang relasyon ay wala nang kakuwestiyun-kuwestiyon ang pagmamahalan. Sa pagrerespetuhan kasi ay sakop na ang nakaraan, ang ngayon at ang bukas ng mga nag-iibigan.

Malaki ang porsiyento na kapag naayos na ang mga dapat ayusin sa poder ni Jodi ay sa kasalan na mauuwi ang relasyong iyo.

Noong una naming makapanayam si Vice-Governor Jolo Revilla sa radyo ay sinabi niya, “Maraming salamat sa nag-iisang babaeng nagmamay-ari ng aking puso. Ako ang tunay na Sir Chief ng kaniyang buhay, si Jodi Sta. Maria.”

Ilang panahon pa mula ngayon ay magiging ama na ng Cavite ang aktor, at kapag gobernador na si Jolo ay napakaganda ng ipakikilala niyang ina ng kaniyang nasasakupan. Parang si Congresswoman Lani Mercado rin noong maging ama ng mga Caviteño si Senador Bong Revilla.

Zoren at Carmina – Isinawalat ng alalay ang pang-aapi

Sa simula pa lang ng isyung ito ay inuuna na namin ang pagsasabi at pang-iimbita kina Zoren Legaspi at Carmina Villaroel na bukas ang kolum na ito para sa kanilang panig. May ilalaan din kaming espasyo para sa kanila bilang sagot sa idinulog na reklamo ng kanilang driver-alalay-boy-yayo na si Moises sa Ang Latest.

Si Moises ay kasa-kasama na ni Zoren mula pa nung 1996, binata pa siya noon. Dating utility sa Regal Films si Moises na kinuhang alalay ng aktor at tumira na rin sa kanilang babay sa Doña Juana Subdivision.

Mula noong 1996 hanggang noong 2012 ay isang libo lang ang suweldo ni Moises kina Zoren at Carmina, pero dahil sa paulit-ulit nitong pakiusap na taasan naman ang kaniyang suweldo. Ngayong 2013 ay apat na libo na ang buwanang suweldo ni Moises mula sa mag-asawa.

“All around po ako sa kanila. Minsan, driver ako, minsan naman, PA. Kapag wala kaming trabaho sa labas, nasa bahay po nila ako, naglilinis. Nasabi ko na po kay Boss Zoren na baka naman puwedeng taasan nila ang suweldo ko, pero ang sagot po niya, eh, wala naman akong pamilyang binubuhay.

“Gusto ko po sana na kapag nagkita kami ng mga magulang ko, ng mga kapatid ko, eh, may maibigay naman ako sa kanila. Pero wala po, hindi pa rin niya tinataasan ang sahod ko.

“Mahal ko po sila, pati ang kambal, mahal ko. Masyado lang po akong nasaktan dahil noong pinagbakasyon nila ako, pagbalik ko po sa Maynila, tsinek ko ang SSS at Philhealth ko, walang laman.

“Wala pong kalaman-laman ang SSS ko, ang Philhealth ko naman, noong February lang nila hinulugan, 1,800 po. Sinabi nga po sa akin ng nakausap kong officer ng SSS na puwede ko raw silang ireklamo dahil hindi nila hinuhulugan ang SSS ko.

“Nag-text po ako kay Boss Zoren, tinanong ko siya kung bakit walang laman ang SSS ko. Ang sabi niya, kausapin ko raw si Karina, iyong secretary nila ni Ma’m Carmina. Ang sabi naman po ng secretary, nanggaling daw siya sa opisina ng SSS, in-update daw po niya ang bayad mula 2011 hanggang ngayong 2013. Pero wala po talagang kalaman-laman. Hawak ko po ang record ko.

“Ilang ulit po akong nag-text kay Boss Zoren, nagmamakaawa po ako sa kaniya, baka puwede akong makahiram ng pera para maipambigay sa magulang ko. Pero wala po siyang reply, kaya nagbaka-sakali akong mag-text kay Ma’m Carmina.

“Pero ang sagot po niya sa akin, ‘Kailan mo kukunin ang mga gamit mo dito, ipamimigay na ba ito o ibebenta, nilinis na kasi ni Z ang kuwarto mo!’ Z po ang tawag niya kay Boss Zoren.

“Hindi po ako galit sa kanila, iyong kambal, napamahal na rin po sa akin. Sinabi ko kay Boss Zoren na kung nilagyan lang nila ang SSS at Philhealth ko, hindi naman ako magkakaganito. Inilabas ko lang po ang nararamdaman ko,” umiiyak na pagtatapat ni Moises sa Ang Latest.

Kinuha ng programa ang panig ni Zoren Legaspi tungkol sa usapin ng SSS at Philhealth na ipinagdaramdam ni Moises, ang kaniyang sagot, “Me laman ang SSS niya, hindi lang nag-reflect. You can verify sa main office. Mayroon din siyang Philhealth.”

Mula 1996 hanggang 2012 ay isang libo kada buwan lang ang naging suweldo ni Moises mula kay Zoren. Ibig sabihi’y labing-anim na taong isang libo lang ang buwanang sahod nito mula sa mag-asawa.

Iiwanan po namin sa inyo ang pagbabalanse kung sino ba sa kanila ang nasa wastong lugar para magreklamo sa ganitong takbo ng kuwento.

Caludine at Raymart – Sala sa lamig, sala sa init

Sala sa init, sala sa lamig. Ganoon kung ilarawan ng mga taong malapit kay Raymart Santiago si Claudine Barretto. Hindi na umaasa ang kampo ng aktor na magkakabalikan pa sila ni Claudine, napakarami na kasing nagaganap na hindi maganda sa kanilang relasyon. Malabo na ang pagbabalikan nila ngayon.

Ang pinakahuling kuwento ay maghahatian na ng kanilang mga properties ang mag-asawa. Mauuna na ang hatian kesa sa petition for annulment na nakatakdang ihain sa husgado ng aktres. Marami nang sikat na personalidad ang gumawa ng ganoon.

“Ang gustong mangyari ni Claudine, e, ang ayusin muna ang hatian nila ng properties, okey naman iyon sa mga abogado niya, kaya tinimbrehan na nila si Raymart na ganoon ang mangyayari.

“Madali lang namang kausap si Raymart, kaya ang sagot niya, e, okey lang, maghihintay na lang siya ng pasabi mula sa kampo ni Claudine kung ano-anong documents ang kailangan niyang pirmahan.

“Sinabihan na si Claudine ng manager niya na huwag na muna siyang magsasalita habang hindi pa nakapipirma si Raymart, pero ano’ng ginawa niya? Inupakan niya si Raymart sa Facebook, galit na galit siya, kung ano-ano na namang paninira ang ibinabato niya sa mister niya!

“Nainsulto siguro siya dahil umoo agad sa hatian ng properties si Raymart. Nainsulto siya, dahil ang akala siguro niya, e, papalag si Raymart, hindi papayag, dahil umaasa pa rin siyang maaayos ang lahat sa pagitan nila ni Claudine.

“E, hindi ganoon ang nangyari, sumagot agad ng oo si Raymart, kaya sobrang insult ang na-feel ni Claudine! Sira na naman ang pangako niya sa manager at mga lawyers niya na mananahimik na siya.

“Ano ba kasi ang gusto niyang mangyari? Sala sa init, sala sa lamig ang babaeng iyon, mahirap siyang ispilengin! Pagod na sa kaniya si Raymart, kaya magiging ilusyon na lang ang pagbabalikan nila!” inis na kuwento ng aming source.

Toni Gonzaga – Suplada na ba ngayon dahil sikat na sikat na?

Bakit kaya palaging laman ng mga blind items at mga kuwentong pabulong si Toni Gonzaga? Napakaraming istoryang nagsasangkot sa singer-actress sa pagsusuplada, sa pagmamaldita, nakararating kaya sa kaniya ang mga ganoong reklamo?

Kapag may mga nakararating na kuwento sa amin tungkol doon ay napapailing na lang kami. Hindi kasi ginagawang biro ang mga ganoong komento, ginagamot ang ganoon para mabura ang hindi kagandahang impresyon tungkol sa kaniya.

Wala kaming ganoong karanasan kay Toni. Ang totoo ay ipinagmamalaki pa nga namin siya dahil sa ganoong estado ay wala naman kaming nararamdamang pagbabago sa kaniyang ugali. Pero bakit kalat na kalat ang mga kuwento ng pagmamaldita ni Toni?

Sabi ng ilang kasamahan namin sa panulat ay kailangan daw bumalik uli sa kolehiyo si Toni Gonzaga para kumuha ng subject tungkol sa tamang pakikitungo sa tao.

Kung kami naman ang tatanungin ay walang eskuwelahang tumututok sa ganoong aspeto, ang naturalesa ng tao ay nagsisimula sa tahanan, sa bahay muna bago sa kalye.

Kris at James – Gag order para sa kabutihan ni Bimby

Nakabuti para kina James Yap at Kris Aquino ang pinairal na gag order ng husgado. Kung tutuusin ay hindi naman kailangang pigilan ng korte sa pagsasalita ang basketball star. Talaga namang wala na itong kibo kahit noon pa, pero nakaganda para kay James ang gag order ng husgado.

Imadyinin natin ngayon kung walang ganoon, ano ang mangyayari kay James? Dahil kapag nagsimula nang magsalita si Kris ay para siyang gripong hindi nauubusan ng tulo.

May mga PRO si Kris. Puwede rin siyang magpainterbyu sa ibang manunulat para lang mailabas ang kaniyang saloobin. Pigang-piga sigurado si James kung walang gag order sa kanila ang korte.

Nang makausap namin si Attorney Lorna Kapunan, abogado ni James, ay sinabi nito sa amin na lahat ng napagkasunduan ng magkabilang panig sa huling pagdinig ng kaso ay para sa kapakanan at kabutihan ni Baby James.

“Everything is for the good of their son,” maigsing komento lang ni Attorney Kapunan. Kahit ang mga abogado nina James at Kris ay kailangang sumunod sa gag order.

May bago nang karelasyon si James ngayon, Italyana ang kaniyang girlfriend. Si Kris naman ay loveless pa rin dahil ayaw raw ng kaniyang mga anak na makipagrelasyon siya.

Si Kris pa? Sinasabi lang niya ngayon ang ganiyan dahil wala pa naman talagang nanliligaw sa kaniya. Sino ba namang lalaki ang maglalakas-loob na manligaw sa aktres-TV host, mayroon ba?

Pero kapag nakakita na siya ng lalaking makikipagtagisan sa kaniyang estado ay siguradong wala nang magagawa ang kaniyang mga anak. Papasok pa rin siya sa relasyon, may karapatan naman kasing lumigaya rin si Kris.

Sana nga ay magkaroon na siya ng lovelife para hindi na niya binubulabog ang nananahimik na si James Yap. Harinawa.

Daniel Padilla – Tapos na ang sakripisyo ng inang si Carla Estrada

Pinakamainit at pinakasikat na young actor ngayon si Daniel Padilla. Kahit saan ay si Daniel ang gustong makuha sa kanilang mga selebrasyon, mabentang-mabenta siya talaga ngayon, kaya unti-unti rin niyang natutupad ang kaniyang mga pangarap para sa pamilya niya.

Nasaksihan naman kasi ni Daniel kung gaano katinding pagsasakripisyo ang pinagdaanan ng mommy niyang si Karla Estrada para lang maitaguyod silang magkakapatid.

Matindi iyon, lahat halos ng mga promoters na nagdadala ng mga artista sa malalayong probinsiya ay tinatawagan ni Karla para lang siya kumita, dahil maraming gastusin ang kaniyang mga anak na nagsisipag-aral na.

Naaalala pa namin ang paglapit noon ni Karla sa kaniyang mga kaibigan, halos lahat yata ay nautangan na nito. Alam iyon ni Daniel kaya noong kumikita na siya nang malaki-laki ay inuna niya ang kanilang pamilya.

Napapanood namin ang TV commercial ng mag-ina ngayon. Bagong pag-ibig ni Daniel si Lily, ang makasaysayang Lily’s Peanut Butter na kinalakihan na ng sambayanang Pinoy ang sarap at ang lasa.

Dahil kay Daniel ay buhay na buhay ngayon ang career ni Karla. Nagkakaroon ito ng mga raket na kasama ang kaniyang anak. Naging mabait ang kapalaran kay Karla Estrada dahil sa ginawa nitong pagsasakripisyo at pagsisikap para sa kapakanan ng kaniyang mga supling.

Masaya kami para kay Karla Estrada. May paraan talaga ang kapalaran para bigyan ng regalo ang mga taong masikap at matiyaga.

Jinkee Pacquiao – Hindi naman suplada, insecure lang

Walang gaanong kuwentong lumalabas ngayon tungkol sa mag-asawang Congressman Manny Pacquiao at sa kaniyang vice-governor na misis na si Jinkee. Bakit kaya?

Kahit noong iniisa-isa na ang mga personalidad na tumakbo noong nakaraang eleksiyon, nanalo man o natalo, ay hindi ganoon kaingay ang pangalan ng mag-asawa.

Kumusta naman kaya ang serbisyong ibinibigay ngayon ng vice-governor ng Saranggani? Pumapasok kaya siya sa kaniyang opisina sa Kapitolyo na dala-dala ang kaniyang mga branded bags? Iyon kasi ang naging isyu kay Jinkee noong panahon ng kampanya.

Sabi ng aming source na may kamag-anak na taga-Saranggani, “Nasusupladahan sila kay Jinkee. Hindi raw kasi approachable ang itsura niya! Mas lumalapit pa sila kay Pacman, ma-PR daw kasi ang congressman nila, unlike Jinkee na palaging nakasimangot!” kuwento ng aming source.

Mukha lang namang maldita ang itsura ng misis ng Pambansang Kamao, pero kapag nakasama mo na siya nang matagal-tagal ay mabubura ang ganoong impresyon. Ang totoo ay matindi ang insekuridad sa katawan ni Vice-Governor Jinkee.

Kapos siya sa tiwala sa kaniyang sarili, parang nalulula pa siya sa mga biyayang dumarating sa kanilang buhay. Mula nga naman kasi sa napakasimpleng buhay ay biglang bumongga ang kanilang kabuhayan.

Matalim lang tumingin ang misis ni Pacman, pero wala sa kaniya iyon. Simpleng-simple pa nga siya kung tutuusin kesa sa ibang personalidad diyan na nagkaroon lang ng kaunting suwerte ay akala mo pag-aari na ang buong mundo.

Have a comment on this article? Send us your feedback

Agosto 1 – 15, 2013

	Marian Rivera
	Zoren Legaspi & Carmina Villaroel
	Xian Lim & Kim Chiu
	Gov. Vilma Santos
	Claudine Barretto & Raymart Santiago
	James Yap

Marian Rivera – lilipat na sa TV5?

Nakapag-iisip nang makaitlo ang mga isinagot ni Marian Rivera sa tanong kung may katotohanan ba ang mga umiikot na kuwentong lilipat na siya sa TV5 pagkatapos ng kaniyang kontrata sa GMA-7 ngayong Agosto.

Napakadaling bitiwan ng salitang hindi, kung totoong iyon ang nasa isip at puso niya, pero paikut-ikot ang ibinibigay na tugon ng magandang aktres. Mahal daw niya ang GMA-7, pero hindi niya masasabi kung sa nasabing bakuran pa rin siya pipirma kapag natapos ang kaniyang kontrata, basta kung saan daw siya mas maaalagaan nang husto ay doon siya.

Lumutang na ang istorya ng pakikipagkita niya kay Mr. Manny V. Pangilinan, ang may-ari ng TV5. Walang gustong maniwala na nagbalitaan at nagkumustahan lang sila ni MVP noong gabing iyon. Siyempre naman ay hindi imposibleng nagkalatagan sila ng mga baraha tungkol sa kaniyang karera habang magkasama sila.

Pero ang bahagi na hindi nagbigay sa amin ng masarap na tulog isang gabi sa kaiisip ay ang sinabi ng isang source sa amin. Ang sabi nito, “Nagpalit na ng manager si Marian, nasa bakuran na siya ni Tony Tuviera. May magandang relasyon ngayon ang TV5 at ang production ni Mr. T.

“At ito ang pinakamatindi. Wilma Galvante baby si Marian. Alam ‘yan ng mga taga-GMA. Anak-anakan ni WVG si Marian, kaya malakas ang possibility na pumirma at lumipat na si Marian sa TV5,” madiing bitiw ng aming impormante.

Mula ngayon hanggang sa magtapos ang kontrata ni Marian Rivera sa Siyete ngayong Agosto ay maraming puwedeng mangyari. Maraming pagbabagong puwedeng maganap sa career ni Marian. Puwede siyang manatili sa GMA-7 at hindi imposibleng maging Kapatid na rin siya tulad ni Ogie Alcasid.

Zoren at Carmina – sinagot ang akusasyon ng driver

Nagbigay ng panig ang kampo nina Zoren Legaspi at Carmina Villaroel tungkol sa reklamong ihinain ng kanilang matagal nang driver-alalay-yayo-boy at kung anu-ano pang si Moises.

Ayon sa kampo ng mag-asawa ay walang katotohanan ang akusasyon ni Moises na walang laman ang SSS at Philhealth nito dahil in-update iyon ng kanilang sekretaryang si Karina. Maaaring hindi lang iyon nag-reflect noong busisiin ni Moises pero mayroon, “mayroon,” ayon sa kampo nina Zoren at Carmina.

“Marami na ring ginagawang kalokohan ‘yang si Moises, pero pinalalampas lang nina Zoren at Carmina, itinatakas niya ang sasakyan ni Zoren, nahuhuli siyang ginagawa iyon!

“Marami rin siyang kuwentong gawa-gawa lang, tulad noong kinuha raw siyang alalay ni Zoren. Hindi totoo iyon, si Moises mismo ang lumapit kay Zoren para sa kaniya na tumira dahil wala siyang pamilya dito sa Manila. Nagmagandang-loob naman si Zoren, wala silang usapang suweldo, allowance basis lang. Hindi siya pinababayaan ng mag-asawa!” pagtutuwid pa ng aming source na malapit kina Zoren at Carmina.

Nalulungkot lang ang kampo ng mag-asawa dahil sa nangyari. Sila na nga raw ang nagkaroon ng pusong tumulong ay sila pa ngayon ang lumalabas na masama.

Xian Lim – mas banidoso pa kay Kim Chiu

Bakit kaya ganoon ang nagiging reaksiyon ng mga kabagang naming becki kapag nakikita nilang naglalambingan sina Xian Lim at Kim Chiu? Hindi naman sila nandidiri, pero talagang nagtataasan ang kanilang mga kilay, ano ba ang problema?

Nang maghiwalay sina Gerald Anderson at Kim ay si Xian Lim na ang ipinareha sa young actress. Noong una’y maraming kontra sa kanilang tambalan. Malinaw na panggagamit lang daw kay Kim ang ginagawa ng aktor.

Kapag ipinakikita ang mga kilig moments ng dalawa ay natural lang na kasabay nilang kinikilig ang kanilang mga tagasuporta. Pero ang tanong: bakit kaya ayaw paniwalaan iyon ng mga becki?

Sabi ng isang becking nakausap namin, “Tantanan nga kami ng Xian Lim na ‘yan? Puwede ba, tigil-tigilan na niya ang pakikipaglambingan kay Kim, dahil naaalibadbaran kami sa kaniya?”

May isang becki namang nagkomento na mas banidoso pa si Xian kaysa kay Kim. Kung ilong lang daw ang palaging pinoproblema ng dalaga, si Xian naman ay lahat-lahat na, mula kuko hanggang ulo kuno ang inaalagaan ng aktor na sobra ang pagka-vain.

“Masyado siyang maalaga sa katawan niya. Naglalagay pa nga siya ng merthiolate sa mga sakong at nipples niya, di ba? Regular din ang pagpapa-manicure-pedicure niya. Ayaw na ayaw niya sa maruruming kuko.

“Sobra ang pagka-vain ni Xian, OA na ang pagiging malinis niya sa katawan. Hindi mo siya makikitang mukhang mabaho. Ang itsura niya, e, parang palagi siyang bagong paligo. Very hygienic talaga ang lalaking iyon!

“Mas mukha pa nga siyang babae kaysa kay Kim kung linis ng katawan ang pagbabasihan, e. Ganoon siya katindi, hindi mo siya matitiyempuhang marumi,” kuwento pa ng aming source.

Iyon kaya ang dahilan kung bakit nagtataasan ang kilay ng mga becki kapag napapanood nilang naglalambingan sina Xian Lim at Kim Chiu?

Gov. Vilma Santos – tagumpay ang indie movie

Nagbubunyi ang mga loyalista ni Governor Vilma Santos dahil sa malaking tagumpay ng Ekstra, ang Indie movie na pinagbibidahan ng Star For All Seasons, bilang pagbibigay-respeto at pagpapahalaga sa mga gumaganap na ekstra sa pelikula at telebisyon.

Agarang nag-text sa amin si Obet Sapin, ang kaniyang kuwento, “Share ko lang po, watch kami ng first indie film ni Ate Vi na Ekstra. Napaka-entertaining po ng movie, talagang nagtatawanan at nagpapalakpakan ang mga manonood dahil sa maraming kuwelang eksena.

“Siyempre po, napakahusay ni Ate Vi, lalo na doon sa eksenang minura siya ng direktor. Talagang ramdam na ramdam mo ang pagkapahiya at pagkaawa ng character ni Ate Vi sa kaniyang sarili, kaya napaluha na lang siya.

“At doon po sa bandang ending kung saan wala siyang dialogue at basta namuo na lang ang luha sa mga mata niya, grabe! Talagang pinalakpakan po nang husto ang eksenang iyon ni Ate Vi.

“Ipinakita po sa movie ang plight ng mga extra sa pelikula sa paraang magaan, pero seryoso ang tema,” masayang mensahe sa amin ni Obet Sapin na isa sa mga tunay na nagmamahal sa Star For All Seasons.

Maligayang bati kay Governor Vilma Santos!

Claudine at Raymart – nakakalungkot ang nangyari

Nakakalungkot ang kinahinatnan ng relasyon nina Raymart Santiago at Claudine Barretto. Maraming umasa na magtatagal sila kundi man magkakasama pa rin sa habampanahon, pero nagsisimula nang gumuho ang pag-asang iyon. Si Claudine ang unang umaksiyon.

Noong nakaraang Lunes (ika-29 ng Hulyo) ay nagsadya siya sa Marikina-RTC para maghain ng Temporary Protection Order (TPO) laban kay Raymart. Natatakot daw siya para sa kaniyang sarili at para sa kaniyang mga anak. Hiling niya sa husgado na mapagbawalan ang kaniyang mister na makalapit sa kanila para makapanggulo.

Sinasaktan daw siya ni Raymart. Taong 2005 pa lang daw ay kung ano-ano nang paraan ng pananakit ang ginagawa sa kaniya ng aktor, kaya hindi na niya matatagalan pa ang mga ginagawa ng kaniyang asawa.

Malaking kasiraan sa pagkatao ni Raymart ang mga akusasyon ni Claudine, kaya sa isang panahong ang inaasahan ng marami ay hindi pa rin magsasalita si Raymart ay nagpadala ito ng kaniyang opisyal na komento tungkol sa mga ibinabatong paghusga sa kaniya ng ina ng kaniyang mga anak. Kumakagat ang mga pahayag ng aktor kahit maigsi lang.

Ayon kay Raymart ay hindi ito gagawa ng anumang negatibong hakbang na makakaapekto sa mga bata. Walang katotohanan daw ang akusasyon ni Claudine na sinasaktan nito nang pisikal ang aktres. At ang pinakamatindi ay ang sinabi ng aktor na kilalang-kilala si Claudine sa kahusayang gumawa ng mga kuwentong wala namang katotohanan.

Iyon ang pinakamatindi doon. Parang kailan lang nang mismong nakatatandang kapatid ni Claudine ang nagpatunay na marami siyang hinahabing mga kuwento na hindi naman totoo. Mukhang madidiin siya nang husto ngayon sa mga pinakawalang salita ni Raymart Santiago.

Labanan na ng kredibilidad ang mangyayari ngayon. Sino ba sa kanilang dalawa ang mas kapani-paniwala? Sino ba sa kanila ang may kapasidad na mag-imbento lang ng mga kuwento. Kani-kaniyang kampo na ang maglalaban-laban ngayon para lang lumutang kung sino sa mag-asawa ang nasa tamang posisyon.

Mas nakalulungkot na senaryo.

James Yap – nilait-lait sa maling Ingles

Pinagpipistahan ngayon ang mali-maling pag-i-Ingles ni James Yap. Ginagawa siyang laruan ngayon ng mga kababayan nating nagpapalitan ng mga komento sa social media. Ingles pa raw kasi nang Ingles ang basketbolista pero mali-mali naman.

Sa positibong pananaw ay walang problema kung magkamali-mali man sa pagsasalita ng Ingles si James dahil hindi naman siya banyaga sa sarili nating bayan. Pilipino siya, kaya kung kumakabyos man ang kaniyang dila sa pagbibitiw ng lengguwahe ni Uncle Sam ay kauna-unawa iyon.

Hindi naman nagpanggap si James na matatas siyang mag-Ingles. Kahit naman noong mga panahong nagsasama pa sila ni Kris Aquino ay hindi rin siya nag-uumingles. Sa lengguwahe natin siya sumasagot sa mga tanong kahit pa sabihing Inglisera ang kaniyang misis.

At hindi nakahihiya kung magkamali man tayo sa pagsasalita ng wikang banyaga. Ang nakakahiya bilang Pilipino ay kapag sa sarili nating lengguwahe tayo nagkakamali-mali. Iyon ang malaking kahihiyan at pretensiyon.

Napanood namin ang panayam na iyon kung saan sinabi ni James na matindi raw ang suportang ibinibigay sa kaniya ni Michaela Acazzola, ang Italyana niyang karelasyon. Wala na raw siyang mahihiling pa.

Ang sabi ni James, “Yes, she’s very support,” sa halip na “supportive.” Doon siya nabutasan ng mga kababayan nating kahit naman noon ay walang nakikitang positibo tungkol sa kaniya.

Pero sa isang banda ay puwede rin naman nating paalalahanan ang basketbolista na huwag na lang kasi siyang nagsasalita sa Ingles. Alam niya namang mahina siya doon. Maging kumportable na lang sana siya sa wikang kabisado niya.

Hindi naman makababawas sa kaniyang talento at pagkatao ang hindi niya pag-i-Ingles. Magaling pa rin naman siyang basketbolista kahit Pilipino ang ginagamit niyang wika. Hindi pa siya nabubutasan at napapahiya.

Nangingiliting tanong ng isa naming kaibigan, “Maitanong ko lang. Paano kaya ang sitwasyon noong nagsasama pa sila ni Kris? Paano sila nag-uusap? Si Kris pa naman, Inglisera siya, samantalang si James, eh, hirap na hirap pa ngang managalog dahil Ilonggo-Bisaya siya?

“Si Kris kaya ang nag-adjust noon o si James ang hirap na hirap sa pakikipag-Inglesan kay Kris? Sa tagal ng panahong magkasama sila, dapat naman siguro, eh, may natutunan na rin si James sa ex niya!” Oo nga naman.

Sabi nga, no talk, no mistake, more talk, more mistake. Makagaganda kung sa Pilipino na lang sasagot si James. Mag-Inglesan na lang sila ni Michaela kung kailangan, tutal naman ay pareho lang silang hindi kagalingan mag-Ingles.

Hindi na pinagtatakahan ni Kris ang ganitong kuwento, kahit noong magkasama pa sila ni James Yap bilang mag-asawa ay mayroon na ring mga reklamo ang aktres-TV host sa ama ni Bimby. Umaandar na kahit noon pa ang kaniyang pagiging taklesa.

Kuwento ni Kris ay nanood daw sila ng sine noon, marami raw silang magkakasama, comedy ang pelikulang pinanonood nila. Tawanan na raw sila nang tawanan ng kaniyang mga pinsan ay tahimik lang si James. Walang kangiti-ngiti, hindi rin siya kumikibo.

Sabi ni Kris sa kaniyang mister noong nagdi-dinner na sila, “Ikaw talaga, you don’t know what humour is! Hindi ka natatawa kanina, we were all laughing na, pero ikaw, parang you don’t understand naman what you’re watching!”

Sabi ng isang kaibigan nilang designer, “Si Kris talaga, napakataklesa! Imagine, sa harapan mismo namin, nilalait niya si James? Naku, gusto ko nang magtago sa ilalim ng mesa habang inookray niya ang mister niya!”

Ha! Ha! Ha! Ha!

Have a comment on this article? Send us your feedback

Agosto 16 – 31, 2013

	Cesar Montano & Sunshine Cruz
	Raymart Santiago
	Claudine Barretto
	Ogie Alcasid
	Raymond Gutierrez

Cesar Montano – Idinemanda na ni Sunshine Cruz

Magandang magbuwena-mano sina Kris Aquino at James Yap dahil pagkatapos nilang mag-file ng Temporary Protection Order (TPO) at nagkasuhan ay sumunod agad ang nagbabangayang mag-asawang Raymart Santiago at Claudine Barretto.

At ngayon, hindi pa man nareresolbahan ang istorya nina Raymart at Claudine ay umalagwa na agad ng atensiyon ang ginawang pagsasampa ng TPO ni Sunshine Cruz. Inaakusahan niya naman ng iba’t ibang uri ng pangmamaltrato sa kaniyang pagkababae si Cesar Montano. Mas detalyado ang asuntong isinampa ni Sunshine dahil pati ang mga text messages sa kaniya ng aktor ay nailahad niya sa korte.

Pagkatapos ibigay ng hukuman ang hinihingi niyang TPO ay PPO (Permanent Protection Order) na ang hinihingi ngayon ni Sunshine bilang proteksiyon nilang mag-iina. Dinagdagan pa niya iyon ng isang kaso, ang paglabag diumano ni Cesar sa R.A. 9262, lalo na ang ginawa nitong panggagahasa sa kaniya noong nakaraang Mayo.

Isa rin itong nakapanghihinayang na relasyon. Napakaganda ng simula pero biglang umasim.

“Ito na ang pagputok ng bulkan!” text sa amin ng isang kaibigang may malalim na kaalaman tungkol sa demandahang nagaganap ngayon sa pagitan nina Cesar at Sunshine.

“Matagal na natulog ang bulkan, pero sa kaniyang pagputok, siguradong aaray nang todo ang tatamaan!” ikalawang mensaheng ipinadala ng aming source.

Labingtatlong taong nagsama sina Cesar at Sunshine, pero sa loob ng mahabang panahong iyon, kung bibilangin ang magagandang alaalang gustong balikan ng aktres ay kaunting-kaunti lang iyon.

Ayon sa aming source ay mas maraming iiyakan ang aktres, marami siyang panghihinayangan, dahil kasagsagan ng kaniyang popularidad nang mas piniling isakripisyo ni Sunshine ang kaniyang karera para sa pagpapakasal kay Cesar Montano.

Patuloy ng aming impormante, “Datna’t panawan ni Cesar si Shine sa bahay. Literal na kung saan niya iniwan ang asawa niya, doon din siya dapat madatnan. Bird in a golden cage si Sunshine.

“Wala siyang karapatang manita kapag mayroon siyang nalalaman, kahit huling-huli na niya ang pambababae ni Cesar, wala siyang karapatang magtanong. Or, kung maglalakas-loob man siyang magtanong at mag-aaway sila, nakakaawa si Shine.

“Sa kinis niyang iyon, sa kaputian niyang iyon, nagmumukhang mapa ang katawan niya. We saw this coming. Ine-expect na namin na one day, kahit walang magsabi sa kaniya, eh, magigising si Sunshine sa katotohanan na sinasayang lang niya ang buhay at career niya sa pakikisama kay Cesar,” kuwento ng aming source.

Sa pagpunta niya sa husgado para isumbong ang mga karanasan niya sa piling ni Cesar ay walang takot na isinalaysay ni Sunshine ang mga senaryong nagtulak sa kaniya para tuluyan nang humiwalay sa aktor.

Binubugbog daw siya ni Cesar, kung minsan ay iniuuntog pa sa pader. Sinabi rin niya ang mga panahong hindi siya makalabas ng bahay kahit pa magsuot siya ng shades na halos magtatakip na sa kaniyang mukha dahil puro pasa iyon. Ang mga gabing masakit na masakit ang buo niyang katawan pero puro iyak lang at tahimik na paghimas sa kaniyang mga pasa ang kaya niyang gawin, dahil itinatago niya sa kanilang mga anak ni Cesar ang totoo.

Ang mga mensahe sa text na halos wala na diumano siyang dignidad na natitira dahil ninakaw na iyon ni Cesar, ang pang-aalipusta nito sa kaniyang pagkababae, ang mga pananakit nang pisikal sa kaniya ng aktor na puwedeng gumaling ang mga pasa at sugat pero hindi niya maaaring kalimutan.

Raymart Santiago – Suportado ng buong pamilya Santiago

Lahat nang maibibigay nilang suporta ay ibinibigay ngayon ng pamilya Santiago para kay Raymart Santiago. Iyon naman ang katangiang mayroon ang pamilya. Ang sakit ng kalingkingan ay sakit ng buong katawan nilang lahat, kaya may umaagapay sa aktor sa kaniyang pinagdadaanan ngayon.

Doon naman kapos si Claudine Barretto. Hindi nito kasundo ang iba nitong kapatid, ngayon mapatutunayan ni Claudine sa kaniyang sarili ang kahalagahan ng pamilya.

Mabilis na makakabangon mula sa paghamong ito si Raymart dahil mula sa kaniyang ina hanggang sa kaniyang mga kapatid ay nakaagapay sa kaniya habang lumalalim ang mga akusasyong ibinabato sa kaniya ni Claudine.

Si Randy Santiago mismo ay sobrang lungkot ngayon sa kaniyang mga nababasa. Hindi makapaniwala ang singer na ganoon na lang ang ginagawang pangwawasak ngayon ni Claudine sa pagkatao ni Raymart.

Tama ang pananaw ni Randy. Hindi bale na sanang iba ang panggalingan ng mga ganoong salita, pero kung magmumula iyon sa babaeng minahal ay napakasakit para sa pinatutungkulan ng mga akusasyon.

Hindi naman sinasabi ng kaniyang mga kaanak na perpekto si Raymart, pero napakalayo naman sa katotohanan ng mga ibinabatong bintang sa kaniya ni Claudine. Ayon sa mga mismong kadugo ni Raymart ay walang katotohanan ang mga pinagsasasabi ngayon ng aktres.

Claudine Barretto – Tanging nanay lang niya ang kakampi

Sinamahan ni Mommy Inday Barretto si Claudine sa huling pagdinig sa kaso nila ni Raymart Santiago. Maaasahan naman iyon dahil mag-ina sila. Kailan lang ay may mga lumutang nang komento na sa susunod na hearing ay sasama si Mommy Inday dahil nagsabi si Raymart na wala itong ikinababahala dahil kasama nito sa laban ang kaniyang pamilya.

At iyon nga ang nangyari. Tinablan si Claudine. Nakaapekto sa kaniya ang sinabi ni Raymart, kaya sa sumunod na hearing ay magkasama na sila ni Mommy Inday.

Mommy Chiling – Nasasaktan sa mga akusasyon kay Raymart

Ang tanong ngayon ng marami, sa susunod na hearing kaya ay sumama naman kay Raymart Santiago ang kaniyang ina, ang maganda pa ring si Mommy Chiling? Kami na ang sasagot. Siguradong hindi, dahil sa kahit anong kontrobersiyang pagitnaan ng kaniyang mga anak ay nasa isang tabi lang ang dakilang ina ng mga Santiago.

Nananatiling tahimik lang si Mommy Chiling. Gawa lang siya nang gawa ng sardinas na kaniyang libangan. Ang magkakapatid ang hindi nakalilimot na dumalaw sa kaniya tuwing Linggo nang tanghali sa kanilang family reunion.

Pero sa mga bintang na ibinabato ngayon ni Claudine sa kaniyang bunso ay siguradong dumudugo ang puso ni Mommy Chiling. Higit kaninuman kasi ay siya ang nakakaalam ng tunay na ugali ni Raymart.

Napakasakit para sa isang inang tulad niya ang mga akusasyong ibinabato sa sarili niyang dugo at laman. Pero maganda ang pagpapalaki ni Mommy Chiling (at ng namayapa niyang mister na si Direktor Pablo Santiago) sa magkakapatid na Santiago. Kung sino ang nangangailangan ng suporta ay bigyan, kung sino ang nalulungkot ay pasayahin, solidung-solido ang samahan ng magkakapatid.

Doon nagkakaiba ang mga Santiago at Barretto. Habang parang walis tingting na magkakabigkis ang mga Santiago ay para namang pudpod na walis tambo ang magkakapatid na Barretto sa paglalaglagan at pag-uupakan.

Habang busog na busog si Raymart sa suportang moral mula sa kaniyang mga kapatid ay huwag naman sana, pero parang ganoon ang nararamdaman ng mas nakararami, ikinatutuwa naman ng kaniyang mga kapatid ang pinagdadaanan ngayon ni Claudine.

Noong minsan ay tinanong kami ni Mama Ana Llaguno, isang lantad na tagasuporta ng lokal na aliwan, “Saan kaya nagkamali ang mga Barretto? Kinulang ba sila sa patnubay ng kanilang mga magulang kaya ganiyan sila kung magbangayan?

“Sino kaya ang tunay na nagkamali sa kanila? Ang mga magulang kaya nila, ang mga anak, sino kaya talaga?”

Nakanino nga kaya?

Ogie Alcasid – Lumipat na sa TV5

Masakit naman pakinggan ang komento ng ilang malabiga diyan na pera lang ang dahilan kung bakit lumipat-pumirma ng kontrata sa TV5 ang magaling na singer-composer-actor na si Ogie Alcasid.

Para namang lumalabas na masyado nang Spell M (read: may matinding pangangailangan) si Ogie. Para namang kaya lang siya kumabilang-bakod ay dahil sa malaking halagang inialok sa kaniya ng network ng kaniyang Ninong Manny V. Pangilinan. Hindi nga naman magandang pakinggan ang mga ganoong komento.

Kumpirmadong Kapatid na nga ngayon si Ogie Alcasid. Tatlong-taong kontrata ang pinirmahan niya sa TV5 at nakalinya na ang mga proyektong gagawin niya sa istasyon.

Mayroon siyang gagawing sitcom. Mayroon din silang pagsasamahang programa ni Sharon Cuneta, isang klase ng proyektong pareho nilang gusto at matagal na nilang gustong gawin bilang mga singers.

Si Ogie rin ang pamamahalain ng TV5 sa anumang transaksiyon na may kinalaman sa musika. Siya ang gagawa ng mga gagamiting theme song ng mga serye ng TV5. Nasa kaniyang mga kamay ang pagdedesisyon tungkol sa aspetong iyon.

Raymond Gutierrez – Kapatid na rin

Pagkatapos pumirma ni Ogie Alcasid na tatlong-taong kontrata sa TV5 ay may isa pang personalidad na galing sa GMA-7 na kumpirmado nang Kapatid ngayon.

Nakasama namin sa isang production meeting ang pinakabagong personalidad na lumipat na rin sa TV5. Si Raymond Gutierrez, isa siya sa mga magiging hosts ng pinakabagong talk show ng Kapatid Network, ang Showbiz Police na mapapanood na sa September 14.

Makakatuwang ni Raymond Gutierrez sa pagtitimon sa programa ay sina Congresswoman Lucy Torres-Gomez, Direk Joey Javier Reyes at ang inyong kolumnista.

Positibong karagdagan si Raymond Gutierrez sa programa dahil aktibo siya sa social media, marami siyang alam na impormasyon sa mga nagaganap sa paligid ng mundo ng mga artista, kayang-kaya niyang mag-interview ng mga personalidad na kontrobersiyal sa paraan at atakeng kaniyang-kaniya lang.

Maraming mabibitbit na kuwento si Raymond Gutierrez para sa Showbiz Police. Ang kasalukuyang kontrobersiya lang tungkol sa kaniyang kakambal na si Richard at sa karelasyon nitong si Sarah Lahbati ay isang makapal na materyal na para sa talk show. Salatin-galawin kaya iyon ni Raymond sa unang gabi ng Showbiz Police sa September 14?

Have a comment on this article? Send us your feedback

Setyembre 1 – 15, 2013

	Gretchen Barretto
	Claudine Barretto
	Gov. Vilma Santos
	Piolo Pascual
	Carlos Agassi
	Kris Aquino
	James Yap

Raymart at Claudine – Child custody na ang pinaglalabanan

Nakikipag-agawan ang mundo ng politika sa ingay ng mundo ng lokal na aliwan. Ang dahilan, ang makasaysayang si Janet Lim Napoles, ang negosyanteng nagdadamay ngayon ng mga kilalang politiko sa napakalaking anomalyang kinapapalooban nito.

Sumuko na sa Malacañang noong isang gabi (Agosto 28) ang pinaghahanap na puganteng may nakapatong na sampung milyong pisong pabuya sa kaniyang ulo, tapos na ang laban, sabi ng ating mga kababayan.

Sa totoo lang, ang ingay ni Napoles ay nakipag-agawan sa mga isyung kinasasangkutan ng nag-aaway na mag-asawang Raymart Santiago at Claudine Barretto, Cesar Montano at Sunshine Cruz at ng iba pang mga pinagpipistahang kontrobersiya sa showbiz.

Muling nagharap sa korte noong Martes (Agosto 27) ng hapon sina Raymart at Claudine. Kasamang dumating ng aktor ang kaniyang mga kapatid. Si Claudine lang at ang kaniyang abogado ang dumating sa Marikina-RTC.

Ang kustodiya ng kanilang mga anak ang sinesentruhan ngayon ng korte. Kanino nga ba mas dapat mapunta ang pangangalaga kina Sabina at Santino? Sino ba sa mag-asawa ang mas karapat-dapat pagtiwalaan sa pagpapalaki sa kanilang mga supling?

Kung ang batas ang susundin, hanggang wala pang pitong taon ang anak ay mananatili ito sa kaniyang ina, maliban na lang kung may malalalim na dahilan para hindi mapunta sa babae ang pangangalaga sa mga bata.

Kung si Gretchen Barretto ang tatanungin ay mas gusto nitong mapunta kay Raymart ang kaniyang mga pamangkin. Hindi na nagdetalye pa ang aktres kung bakit, pero kampi ito kay Raymart kung ang pangangalaga kina Sabina at Santino ang pag-uusapan.

Bakit kaya?

Kampeon ng Wikang Filipino
Salamat sa parangal mula sa Komisyon sa Wikang Filipino

Makulimlim ang paligid, pabugsu-bugso ang ulan. Malakas ang ihip ng hangin nang iabot sa amin ng isang guwardiya ng TV5 ang isang sulat. Pagkatapos naming basahin nang buo ang nilalaman ng liham, pakiramdam namin ay nagpaalam nang wala sa panahon ang bagyo, umaliwalas ang kapaligiran.

Narito po ang liham na tinanggap namin mula sa Komisyon sa Wikang Filipino na pinangunguluhan ng Pambansang Alagad Ng Sining Sa Panitikan na si G. Virgilio S. Almario.

Republika ng Pilipinas
Tanggapan ng Pangulo
KOMISYON SA WIKANG FILIPINO
02 Agosto 2013
Kgg. CRISTY S. FERMIN
TV Host

Mahal na Bb. Fermin:

Magalang na ipinababatid ng Komisyon sa Wikang Filipino (KWF) na ipagdiriwang nito ang Buwan ng Wikang Pambansa sa 1-31 Agosto 2013 alinsunod sa Pampanguluhang Proklamasyon Blg. 1041. Ang tema ng pagdiriwang sa taong ito ay “Wika Natin ang Daang Matuwid.”

Kaugnay po nito, malugod naming ipinababatid na bilang batikang alagad ng media, kayo ay gagawaran ng pagkilala ng KWF bilang Kampeon ng Wikang Filipino dahil sa pagpapamalas ng matalino at mahusay na paggamit ng pambansang wika sa larangan ng pamamahayag. Gaganapin ang paggawad sa pagbubukas ng Pambansang Kongreso sa Wika sa 19 Agosto 2013, 10:00 nang umaga, Leong Hall, Pamantasang Ateneo de Manila, Lungsod Quezon.

Magsisilbing inspirasyon ang pagpaparangal sa nabanggit na gawain na dadaluhan ng mga guro at superbisor sa Filipino, iskolar, manunulat, at kinatawan mula sa iba’t ibang ahensiyang pampamahalaan at pribado upang matalakay at makapaglatag ng kaukulang solusyon sa mga suliraning pangwika sa iba’t ibang larang lalo na sa mga dominyo ng kapangyarihan (power domains).

Inaasahan namin ang inyong pagpapaunlak sa aming hiling at nagpapasalamat kami sa inyong patuloy na pagtangkilik sa wikang Filipino tungo sa bisyong daang matuwid at maunlad para sa kinabukasan ng bansa.

Sumasainyo,
VIRGILIO S. ALMARIO
Pambansang Alagad ng Sining sa Panitikan
Tagapangulo, Komisyon sa Wikang Filipino

Hindi po malululan kahit sa isang malaking kahon ang taos-puso naming pasasalamat sa pamunuan ng Komisyon sa Wikang Filipino sa matinding pagpapahalagang iginawad nila sa pagyakap namin sa wikang Filipino.

Maraming salamat dahil kami’y lumaki sa pusod ng Nueva Ecija. Mas maraming salamat dahil kami’y produkto ng isang mag-asawang guro sa elementarya at maraming-maraming salamat, dahil kami’y isang Pilipino sa isip, sa salita at sa gawa.

Maraming-maraming salamat pong muli sa Komisyon sa Wikang Filipino sa hindi mapapantayang karangalang ito na ipinagkatiwala n’yo sa amin. Mabuhay po kayo!

Gov. Vilma Santos – Pinarangalan bilang isang Kampeon ng Wikang Filipino

Malakas ang buhos ng ulan, humahaginit ang hangin, bahang-baha na sa halos lahat ng lugar pero walang nakapigil sa paghahandog ng parangal ng Komisyon Sa Wikang Filipino noong Lunes nang umaga sa Ateneo de Manila University.

Dumating bilang panauhing-pandangal si Pangulong Benigno Aquino III (na ipinakilala ng Pambansang Alagad Ng Sining Sa Panitikan at tagapangulo ng Komisyon Sa Wikang Filipino na si G. Virgilio Almario bilang “Pangulong Benigno S. Aquino Ikatlo”). May nakabantay na isang baso ng maligamgam na tubig sa tabi ng pangulo dahil sa madalas nitong pag-ubo.

Dumalo rin ang maraming miyembro ng akademya mula sa iba’t ibang rehiyon, ang mga tagapamuno ng kani-kanilang departamento sa Komisyon. Isang umaga iyon na ramdam na ramdam mong Pilipino ka dahil sa lamyos ng mga salitang binibitiwan ng mga tagapagsalita.

Ikasiyam nang umaga ang hiniling na oras ng mga taga-Komisyon Sa Wikang Filipino para sa pagdating ng kanilang mga pararangalan. Alas siyete pa lang nang umaga ay nagpapalitan na kami ng mge mensahe sa text nina Governor Vilma Santos at Tita Aida Fandialan.

Pinaghandaan ni Governor Vilma ang katangi-tanging parangal na ito, kahit napakalakas ng bagyo ay nag-ayos pa rin siya, pero ang problema ay wala siyang makakasamang drayber at security papunta sa pagdarausan ng parangal.

Text ng Star For All Seasons, “Naka-ready na ako, nakaayos na ako, pero ayaw akong patuluyin ni Ralph dahil pati ang mga kasama ko, ang mga security ko, eh, hindi rin makapupunta dito. Nag-flashflood sa Carmona.

“Ayaw akong payagan ni Ralph dahil baka raw ako maipit sa baha. Sayang talaga, pinaghandaan ko na ito, pero nagkabagyo naman. Pakisabi na lang sa lahat na gustung-gusto kong makarating pero bahang-baha dito sa SLEX, wala talagang madaanan pati ang mga kasama kong papunta diyan.”

Ayon sa mga nakausap naming miyembro ng Komisyon ay mahigit na isandaang pangalan ng mga personalidad mula sa iba’t ibang larangan ang pinagtalun-talunan nila sa deliberasyon.

Ilang beses na ginanap ang deliberasyon. Lahat ng mga pangalang pumasok sa pilian ay karapat-dapat, kaya lamang ay tatlong personalidad lamang ang dapat parangalan sa pinakauna nilang pagpapahalaga.

Sabi ni G. Leo Cantillang, miyembro ng Komisyon at propesor sa De La Salle, Arellano University at PUP ay walang tumutol sa Star For All Seasons para gawaran ng parangal bilang Kampeon Ng Wikang Filipino, higit pa sa karapat-dapat siyang pahalagahan dahil sa ginagawa niyang pagsusulong sa wikang Filipino sa mga ginagawa niyang pelikula at sa kaniyang pagtatalumpati bilang pulitiko.

Maligayang bati kay Governor Vilma Santos sa ipinamamalas niyang pagmamahal sa sarili nating wika. Mabuhay ang Kampeon Ng Wikang Filipino!

Piolo Pascual – Kinansel ang lahat ng koneksyon sa social media

Kami agad ang pinuntirya ng marami nang biglang kumalat ang isyu na diumano’y may video scandal din sina Piolo Pascual at Carlos Agassi. Sa gitna ng baha at malakas na ulan at humahaginit na hanging-habagat ay wala pa ring patawad ang mga kababayan nating walang magandang magawa sa buhay. Nakapag-iimbento pa rin sila ng mga nakakaalibadbad na senaryo. Kinakaya pa rin ng kanilang kunsensiya ang mangwasak ng imahe ng mga taong nananahimik.

Tama lang ang desisyon ni Piolo na ihinto na ang lahat ng paraan ng pakikipagkomunikasyon niya sa kaniyang mga kasamahan at kaibigan. Wala na siyang Facebook, Twitter at Instagram account ngayon, isa sa mga pinakatamang desisyong ginawa ng aktor sa buong buhay niya.

Napapanahon ang paglalaglag ni Piolo sa social media. Dapat lang naman siyang magkaroon ng katahimikan ng kalooban. Wala siyang sinasagasaang kahit sino kaya dapat lang siyang maligtas sa mga komentong hindi kanais-nais.

Hindi tayo bumibili ng kalungkutan. Lalong hindi tayo bumibili ng mga taong manghuhusga at maninira sa atin, lalo na kung hindi naman tayo kilala nang lubusan ng mga taong iyon.

Tama lang ang desisyon ni Piolo Pascual.

Kris Aquino ­– Kapuripuri ang pagtulong sa mga nasalanta ng bagyo

Gusto lang naming magbigay ng mula sa pusong opinyon namin tungkol sa mga ginagawang pagtulong ngayon ni Kris Aquino sa mga kababayan nating sinalanta ng bagyo at baha na may nakasunod-nakatutok na mga camera sa kaniyang pagmamagandang-loob.

Una, may mga camera man o wala ay isang kapuri-puring aksiyon ang ginagawa ni Kris para sa mga nagdarahop nating kababayan ngayon. Maraming kababayan din natin ang mayroong sobra-sobrang puwedeng ipamigay pero hindi naman nila ginagawa, kailangan ng isang sinserong puso para gumawa ng mga ipinakikita ngayon ni Kris Aquino.

At mula sa kolum na ito ay maraming-maraming salamat kay Kris Aquino sa ginagawa niyang pagpapatawid sa ating mga kababayan sa busilak niyang puso.

James Yap – Miss na miss si Baby James

Kuwento ng isang kaibigan namin, isang gabi ay nakasabay nilang kumain sa isang simpleng restaurant lang si James Yap na mayroong mga kasama, ipinagpalagay ng mga nandoon na pamilya ng basketbolista ang mga kasama niyang kumakain.

“Parang parents niya at mga kapatid ang kasama ni James. Nagpakasimpleng pamilya. Bisayaan sila nang Bisayaan, tawanan sila nang tawanan. Naisip lang naming magkakasama, parang ngayon lang niya nakakasama ang family niya,” unang kuwento ng aming kaibigan.

Dumating ang Bisayang kaibigan ng grupo. Pinakiusapan nila itong bantayan at isalin sa Tagalog ang pinag-uusapan ni James at ng kaniyang mga kasama. Tuwang-tuwa ang aming kaibigan sa kaniyang nalaman.

Eto ang salin Tagalog ng usapan nila: “Ay, kalaki na ni Baby James, guwapo, saka matalino, English nang English. Nagkukuwento siya tungkol sa mga friends niya sa school, saka sa mga bansang pinupuntahan nila ng mommy niya at ni Kuya Josh niya.”

“Sayang nga, mabilis lang ang oras kapag kasama ko siya, kulang na kulang, miss na miss ko ang anak ko,” si James ang nagkukuwento.

Sabi naman ng Nanay ni James, “Nami-miss na nga namin si Baby James, maliit pa kasi siya noong huli naming makita. Sa mga billboard na lang namin siya nakikita ngayon, saka sa mga TV commercials.

“Basta, aalagaan mo ang sarili mo, huwag kang masyadong magpapagod. Pag may kailangan ka, tawag ka lang sa amin, huwag mong sasarilinin ang mga problema mo na tulad noon,” sabi ng ina ng basketbolista.

Ayon sa aming kaibigan ay wala silang naramdamang kayabangan kay James Yap sa kabila ng pagiging sikat niyang basketbolista. Totoong-totoo ang obserbasyon, ni bahagyang angas ay hindi kakambal ng personalidad ni James Yap, sa hardcourt lang siya nakikipag-upakan dikta ng kayang propesyon.

Have a comment on this article? Send us your feedback

Setyembre 16 – 30, 2013

	Alyssa Quijano & Charice
	Nora Aunor
	Raymond Gutierrez
	Regine, Nate & Ogie Alcasid
	Ogie Alcasid & Sharon Cuneta
	Cristine Reyes & Derek Ramsay Photo courtesy of Showbiz Police

Charice at Alyssa – Nagpapatayo na ng sariling bahay

Malaki ang ipinayat ni Charice Pempengco. Pero pagpayat iyon na bagay na bagay sa kaniya. Nagkita kami noong isang gabi sa taping ng The Mega And The Songwriter kung saan sila nagduweto ng kaniyang pinakamamahal ngayon na si Alyssa Quijano.

Sa spot number pa lang ni Charice ay nakuha na niya ang atensiyon ng lahat ng mga nasa studio.Wala pa ring kakupas-kupas ang galing sa pagkanta ni Charice.

Ayon kay Charice nang makakuwentuhan namin ay masaya rin siya dahil maayos na ang relasyon nila ngayon ng mga magulang ng dalaga. Napabuntong-hininga naman si Charice nang malaman niyang nagnenegosyo na ngayon ang kaniyang inang si Aling Raquel.

Kararating lang niya mula sa Amerika. Marami siyang tinupad na kompromiso doon na ang manager niyang si David Foster ang nagbigay sa kaniya, “Kailangan ko pong magsipag at kumayod, may pinaglalaanan na tayo ngayon.”

Seryosohan na ang kanilang pagmamahalan, dumating na iyon sa puntong nagpapatayo na sila ng bahay ngayon sa Laguna. Hindi na biro-biro ang nakikita naming pagtuturingan ngayon nina Charice at Alyssa. Kung ang kasalukuyan nilang relasyon ang tatanungin ay hindi iyon basta-basta samahan ng nangyayari sa showbiz.

Nora Aunor – Nakaranas ng matinding hirap sa US

Noong ilabas namin ang ilang bahagi ng aming kuwentuhan ni Nora Aunor sa pagtitipong ipinag-imbita ng TV5 ay umani kami ng magagandang komento patungkol sa Superstar.

Ang mensahe sa amin ni Dr. Oliver Pandile, “Indeed, three stages rule the human emotion – denial, grief and acceptance. How long the person stays on each stage depends on his willingness to redeem himself.”

Sabi nga ng aming anak-anakang si Janiz Navida, para sa isang Superstar ay parang mahirap umamin tungkol sa nakaraan niyang masaklap na karanasan sa Amerika nang mahabang panahon. Pero napakatotoo ni Nora Aunor nang sabihin niya na itinutulog na lang nila ni John Rendez ang gutom. Mahirap lang dahil kahit naman namamahinga na ang ating isip ay patuloy pa rin sa paggiling ang malalaki at maliliit nating bituka, pero kailangan nating magtiis, dahil wala tayong maipangpapalaman sa kanila.

Sabi nga ni Nora Aunor, “Ayoko na. Ayoko nang pagdaanan pa uli ang ganoong buhay. Napakahirap. Naranasan ko na ang sukdulan. Hindi pa bumababa ang kinain mo, pinoproblema mo na agad kung saan ka hahanap ng kakainin mo uli. Napakahirap.”

At ang mga salitang iyon ay nagmumula sa isang taong dating literal na nahihiga sa salapi at nakikipagsayaw sa kasikatan. Aminado ang Superstar na marami siyang nagawang maling desisyon, pero hindi pa naman huli ang lahat, ang bawat tao ay nireregaluhan ng kapalaran ng pangalawang pagkakataon.

At mahalagang malaman natin na hindi ito usapin ng kung gaano kalakas ang ating paglagapak, usapin ito ng kung paano tayo babalikwas, para huwag nang lingunin pa ang mga dati nating pagkukulang at pagkakamali.

Raymond Gutierrez – Isinasangkot ang pangalan kay Napoles

Bukod sa mga kilalang pulitiko ay kinakaladkad din ngayon sa isyung may kaugnayan kay Janet Napoles ang ilang artista. Nagkawing-kawing na ang mga kuwento, pati yata mga aso at pusa ni Napoles ay sangkot na sa isyu. Masyadong tutok ang mga taong-gobyerno ngayon sa tinatawag na ina ng mga katiwalian sa pamahalaan.

Isa si Raymond Gutierrez sa mga artistang idinadamay sa kuwentong-Napoles. Kaibigan-kasosyo raw kasi niya ang isang anak ni Janet, kaya mayroon siyang nalalaman tungkol sa mga transaksiyong pinasukan nito.

Habang nagkukuwentuhan kami nina Direk Joey Reyes, Congresswoman Lucy Torres at Raymond Gutierrez sa pagitan ng aming OBB shoot para sa Showbiz Police ay nagkuwento ang TV host.

Totoo raw na minsan ay may tumawag sa kaniya para kunin ang kaniyang serbisyo para sa promosyon ng isang proyekto ng kumpanya ni Janet Napoles. Trabaho iyon, bakit ang hindi, kaya sumama si Raymond sa kumukuha sa kaniya bilang PR man.

Board meeting daw iyon, sabi ng kaniyang kausap, pero nagulat si Raymond. Pagpasok niya sa isang pribadong kuwarto ay nakakita siya ng isang babaeng nagpapa-foot spa habang ginaganap ang board meeting.

Board meeting, pero may nagpapa-foot spa? Masyadong inabala ng tanong na iyon ang utak ni Raymond. Nalaman niya na ang babae palang nagpapa-foot spa habang tumatakbo ang pagpupulung-pulong ay si Janet Napoles.

“That transaction did not materialize. Hindi natuloy. Walang nangyari. But I really saw that woman having foot spa while the meeting was going on,” natatawang kuwento ni Raymond Gutierrez.

Sunshine at Cesar – Nagkasundo na sa korte

Sa pinakahuling pagdinig sa kasong ihinain ni Sunshine Cruz tungkol sa child custody ng kanilang mga anak ni Cesar Montano ay naging maganda ang ihip ng hangin. Tapos ang giyera sa korte nang magkasundo silang paghatian ang mga araw sa isang buong linggo para sa kanilang mga anak.

Mula Lunes hanggang Miyerkules ay nasa poder ng aktor ang mga bata at mula naman Huwebes hanggang Linggo nang gabi ay mananatili-makakasama ni Sunshine ang kanilang mga anak.

Ibig sabihi’y nagbukas ng mga isip at puso sina Cesar at Sunshine para sa kapakanan ng kanilang mga anak, mas naisip nila ang kinabukasan ng mga bata. Tanggap nila ang katotohanan na walang sinuman sa kanilang dalawa na nagmamay-ari sa mga bata nang mag-isa lang dahil naging tao ang kanilang mga anak na silang dalawa rin ang dahilan.

Ogie at Regine – Sinasanay muna sa wikang Tagalog ang anak

Kasalu-saludo ang ginagawang pagpapalaki ng magaling na singer-composer na si Ogie Alcasid sa anak nila ni Regine Velasquez na si Nate. Sa isang panahon na ang gusto ng mga magulang ay ang magsalita ang kanilang mga anak sa diretsong Ingles ay kabaligtaran naman noon ang ginagawang paggabay in Ogie sa kaniyang anak.

Mas gusto niyang masanay sa matatas na pagsasalita ng Tagalog si Nate, dahil ang kaniyang katwiran, “Napag-aaralan sa school ang pagsasalita ng English.”

Hindi na nakapagtataka kung bakit ganoon ang pamantayan ni Ogie sa pagpapalaki kay Nate. Maraming piyesang siya ang gumawa ng mga liriko at tono ang niyakap ng ating mga kababayan. Hindi kumpleto ang pabi-videoke ng mga Pinoy nang hindi kinakanta ang mga awiting utak at tenga ng isang Ogie Alcasid ang naghandog sa atin.

Poste ng musikang Pilipino si Ogie Alcasid. Henyo ang singer at kompositor na ito sa paglikha ng mga piyesang dumaan man ang dantaon ay nananatili nang nakatatak sa utak at tenga ng mga Pinoy.

Sharon Cuneta – May dalawang shows sa TV5

Masayang-masaya ngayon si Sharon Cuneta. Dalawang bagong shows ang pagbibidahan ng Megastar sa TV5. Una munang mapapanood ang kanilang musical show ng bagong kapatid na si Ogie Alcasid, ang The Mega And The Songwriter. Sa susunod na buwan naman ay magsisimula na ang kaniyang tawa-seryeng Madame Chairman, kakaiba ang atake ng programang ito ni Sharon.

Kapansin-pansin din na nabawasan na siya ng timbang, malaki na ang nailaglag niya. Aminado si Sharon Cuneta na konting disiplina pa at makukuha rin niya ang matagal na niyang gustong mangyari.

Derek Ramsay – Sobrang in love kay Cristine Reyes

Walang kasingligaya ngayon si Derek Ramsay. Sa kahit anong anggulo ay nakarehistro ang pagiging masaya ni Derek, lumulundag ang kaniyang puso. Ang nagagawa nga naman ng pag-ibig.

Sariwa pa ang kanilang relasyon ni Cristine Reyes, bubot na bubot pa kung tutuusin, pero bentahe ng kanilang relasyon ang pagiging magkaibigan muna nila bago nabuo ang relasyong pinanghahawakan nila ngayon.

Samantala habang nilalanggam sa kaswitan sina Derek at Cristine patuloy naman ang pananahimik nina John Lloyd Cruz at Angelica Panganiban.

Have a comment on this article? Send us your feedback

Oktubre 1 – 15, 2013

	Megan Young
	Maja Salvador & Kim Chiu
	Rosanna Roces
	Marian Rivera

Miss World Megan Young – Lalong kahangahanga sa paggamit ng sariling wika

“Megan Young nailed it!” Ganoon ang isa sa mga mensaheng tinanggap namin noong Sabado ng gabi nang masungkit ng ating kinatawan sa Miss World na si Megan Young ang titulo sa pinakaunang pagkakataon.

Napakaganda naman kasi ng dalaga noong gabing iyon. Sumusubo ang kaniyang kagandahan. Bukod pa sa matalino siyang sumagot at kung makarampa ay akala mo wala nang bukas pang susunod.

Sa mahigit na isandaang kandidata sa Miss World ay ang ganda at talino ni Megan ang naglampaso sa kanilang lahat. Ganoon na lang ang pagbubunyi sa kaniya ng mga kababayan nating matagal nang nagtatrabaho sa Indonesia. Ibang klase talagang sumuporta ang mga Pinoy sa kanilang mga kababayan.

Sa umpisa pa lang ng labanan ay alam mo nang makakakuha ng posisyon si Megan. Isa kasi siya sa mga nangunguna sa botohan. Pumuwesto rin siya sa mga challenges sa pre-pageant.

Tingnan mo nga naman ang buhay. Parang kailan lang ay nakikita lang namin si Megan Young sa bakuran ng TV5 na kumokolekta ng kaniyang talent fee. Huli siyang napanood bilang kontrabida sa Misibis Bay na pinagbidahan ni Ritz Azul. Ngayon ay mayroon na siyang maipagmamalaking titulo sa kumpetisyong pambuong mundo. Sa labanan na ngayon pa lang tunay na pinagreynahan ng isang Pilipina.

Sa isang pagkakataong sikat na sikat ang Pilipinas sa kung ano-anong katiwalian ay may isang pangsalit na magandang balita tungkol sa ating bayan; ang pagiging Miss World ni Megan Young, isang dalagang mula sa isang mahirap na bansa na tulad ng Pilipinas.

Isang malaking karangalan para sa ating bansa ang bitbit ni Megan Young sa kaniyang pagbabalik. Nagpunta siya sa Indonesia na nangangarap lang, pero ngayon ay isang reyna na siya sa kaniyang larangan.

Gusto namin siyang palakpakan dahil sa kaniyang tagumpay ay hindi niya kinaligtaan ang pagiging Pinoy. Nagpasalamat siya sa ating mga kababayan sa sarili nating wika. Kahanga-hanga si Megan Young. Minsan pa ay mabuhay ang lahing Pinoy!

Sen. Jinggoy at Sen. Bong – Kinukutya ng mga bashers sa social media

Masyadong malupit ang social media. Mula nang lumaganap na ang Twitter, Facebook at Instagram at iba pang porma ng malayang pag-oopinyon ay wala nang kalaban-laban ang mga personalidad na napagtitripang ilampaso ng mga walang habas sa pagkokomento.

At maaasahan nang hindi makalulusot ang pamilya nina Senador Jinggoy Estrada at Senador Bong Revilla sa mga bashers na ginagawa silang almusal, pananghalian at hapunan sa social media dahil sa pagkasangkot ng kanilang mga pangalan sa Pork Barrel Scam.

Hindi pa man nagsisimulang rumolyo ang imbestigasyon kung totoo bang may dapat silang panagutan ay tinitilad-tilad na ang kanilang imahe at pagkatao sa social media. Pati ang kanilang mga anak ay pinupuntriya rin. Walang pinatatawad ang mga bashers.

Napakiusapan naming maupo para sa isang panayam ang panganay na anak nina Senador Jinggoy Estrada at Precy Ejercito, ang konsehal na rin ngayon ng San Juan na si Janella. Ang kabuuan ng aming interbyu sa kaniya ay mapapanood sa Showbiz Police ng TV5.

Hindi na bago kung tutuusin para kay Janella ang ganito dahil noong makulong ang kaniyang lolo at ama ay nakaranas din siya ng mga karanasang gustung-gusto na niyang kalimutan pero bumabalik-balik pa rin.

Pero iba ang noon sa ngayon dahil nasa wastong gulang na siya. Ramdam na ramdam na niya ang masasakit na komentong ipinatutungkol sa kanilang pamilya, pati nga ang bunso niyang kapatid na pitong taong gulang pa lamang ay hindi rin nakaligtas sa social media.

May nag-imbento ng kuwento na may hawak daw na cellphone ang bunsong si Jill. Mayroon daw humihiram ng phone ng bata na tinanggihan naman nito, kaya ang sabi ng humihiram ay bahagi ng ipinambili noon ang pera ng kaniyang mga magulang.

Paliwanag ni Janella, “Tinanong po agad ng mommy ko ang kapatid ko kung may ganoong nangyari, pero ang sabi ni Jill, wala raw. Saka seven years old pa lang po siya. Hindi sila allowed na magdala ng phone sa school. Wala rin pong nangyaring ganoong scenario.

“Nakakalungkot lang dahil napakabata ng kapatid ko, pero iginawa na rin siya ng kuwento. Sabi niya sa mom ko, ‘It’s not true po, I’m not lying. Di ba po, sabi n’yo, masamang mag-lie?’

“Marami pang kuwentong hindi naman totoo, pero pinalalabas nilang nangyari talaga, kaya galit na galit ang mommy ko,” pahayag ng magandang panganay nina Senador Jinggoy at Precy.

Noong araw ng Lunes, nang ihayag na kung sinu-sino ang mga mambabatas na idinadamay sa kasong plunder ay tinawagan ni Precy Ejercito ang kaniyang mga anak, sabay-sabay silang magsisimba.

Malayo sa altar ang napuwestuhan nila, sa may gilid ng simbahan, pero dinig na dinig mula doon ang mga sinasabi ng pari. Pagkatapos lang nang ilang minuto ay narinig nilang mag-iina, may kulay-pulitika na ang mga pananalita ng pari, tungkol na Pork Barrel Scam ang sermon ng alagad ng simbahan.

Sabi ng pari, “Ang mga pulitikong sangkot ngayon sa Pork Barrel Scam, may nagdarasal pa kaya para sa kanila? Mayroon kayang nag-aalay ng panalangin para sa mga ganoong klase ng tao?”

Dinig na dinig iyon ng mag-iina ni Senador Jinggoy. Ang pakay nila sa pagpunta roon ay ang ipagdasal ang kanilang padre de pamilyang iniuugnay sa kaso, pero ang mismong pari pa pala ng simbahan ang mariringgan nila ng ganoon kasasakit na pananalita. Nasaan na nga naman ang separasyon ng estado at ng simbahan?

Sa kabila ng mga ganoong karanasan ay pilit pa rin nilang inuunawa ang mga taong kung makapaglampaso sa kanilang imahe ay parang wala nang bukas pa.

At kahit matitinding pangungutya na ang ipinakakain sa kanilang pamilya ng mga taong hindi naman sila kilala nang personal ay matindi pa rin ang paninindigan ni Precy Ejercito.

Totoo, kaibigan niya si Janet Napoles. Matagal na niyang kaibigan ang naging ugat ng kasong hinaharap ngayon ng kaniyang asawa. Ang bintang na kaso sa kaniyang mister ay hindi sapat na dahilan para talikuran niya ang kanilang pagkakaibigan ni Ginang Napoles.

Paninindigan ang tawag doon.

Kim Chiu at Maja Salvador – Patuloy pa rin ang giyera dahil kay Gerald

Hanggang ngayon pala ay hindi pa rin nagagamot ang hidwaan nina Kim Chiu at Maja Salvador. Wala tayong nababasang pagpaparinigan nila. Hindi na sila nag-aaway nang lantaran, pero ang tensiyon ay nandoon pa rin sa mga pagkakataong nagkakasama sila.

Kuwento ng aming source mula sa ABS-CBN ay alam na ng kanilang staff ang gagawin kapag nagkasama sa isang show ang dalawang young stars na dating magkaibigan pero pinaghiwalay ng pakikipagmahalan.

Dating karelasyon ni Gerald Anderson si Kim, pero minahal ni Maja, talagang biniro ng kapalaran ang magkaibigang ito. Minasama ng kampo ni Kim ang pakikipagrelasyon ni Maja kay Gerald. Katwiran naman ng mga kakampi ni Maja ay kailan pa naging krimen ang magmahal, kaya tumagal ang kanilang alitan ni Kim.

“Kapag magkasama sila sa isang okasyon o sa isang show, kailangang magkalayo ang mga dressing room nila, saka hanggang maaari, e, hindi sila dapat magkasama sa isang production number.

“Or kung talagang hindi na maiwasang magkasama sila sa isang prod number, e, kailangang magkalayo sila, mayroong nakapagitna sa kanilang dalawa. Nakakaloka, hanggang sa trabaho, kailangang ingatan ang dalawang babaeng iyon!” kuwento ng aming source.

Pero isang araw ay siguradong maaayos din ang lahat para kina Kim at Maja. Imposible namang hindi lumambot ang puso nila sa bawat isa dahil dati silang magkaibigan.

Hindi pa lang siguro panahon, pero pasasaan ba’t magkakasundo rin sila. Hindi pa siguro handang magbaba ng pride sina Kim at Maja sa mga panahong ito.

Nang dahil sa pag-ibig. Nakakalungkot.

Raymart Santiago ­– Naglahad na ng mga kapintasan ni Claudine sa korte

Siguradong nawindang ang kampo ni Claudine Barretto nang ihain na ni Raymart Santiago ang kaniyang mga depensa at ebidensiya bilang pagtatanggol sa kaniyang sarili sa mga ibinabatong akusasyon laban sa kaniya ng aktres.

Kung noon ay si Claudine ang sugod nang sugod at nananatiling tahimik lang ang kaniyang mister, nang mapuno na si Raymart at sa kaniyang pakiramdam ay parang nawawala na sa tamang huwisyo ang ina ng kaniyang mga anak ay kinailangan na niyang kumilos. Isinumite niya sa korte ang mga larawan at iba pang ebidensiyang magdidiin kay Claudine.

Ang sabi noon ni Claudine ay mabigat daw ang mga kamay ni Raymart. Binubugbog daw ito ng aktres. Mayroon pa ngang mga larawang ipinakita si Claudine na magpapatotoo sa kaniyang mga sinasabi.

Pero sa resbak ni Raymart ay nagulat ang mas nakararami. Si Claudine pala ang mahilig manakit kapag nagtatalo silang mag-asawa. Naging ebidensiya ang mga retrato ng aktor na puro kalmot at sugat ang iba’t ibang bahagi ng kaniyang katawan.

Inilabas na rin ni Raymart ang kuwento na nagdodroga si Claudine kahit sa harap ng kanilang mga anak. Pati ang pagkakaospital noon ni Claudine nang dahil sa droga ay naisumite ng actor. Mayroon pang retrato si Claudine na nagsasaksak ng ipinagbabawal na substance.

Ngayon na ang pinakamatinding anggulo ng away ng mag-asawa, napaluha si Raymart pagkatapos niyang ipagtanggol ang kaniyang sarili, hindi kasi niya inasahan na hahantong sa ganito katinding punto ang dating maayos nilang relasyon.

Rosanna Roces – Laos na’y bastos pa rin, wala talagang breeding

Sa halip na makakuha ng simpatya dahil pawala na nga ang kaniyang karera ay mas dumami pang naiinis ngayon kay Rosanna Roces dahil sa kaniyang pagtatapang-tapangan.

Sa pinakahuling panayam namin kay Osang sa Showbiz Police ay itinanong namin sa kaniya kung bakit nag-post siya sa Facebook na kay Senator Bong Revilla dapat kolektahin ng GMA-7 ang pambayad niya sa danyos dahil natalo nga siya sa kasong breach of contract na isinampa laban sa kaniya ng network.

Marami kasing naasiman sa kaniya sa ipinost niyang iyon. Maraming nagalit sa aktres, lalo na ang mga taong malapit sa aktor-politiko na tulad ni Manay Lolit Solis.

Ang sabi ni Osang ay biro lang daw naman ang ginawa niya. Wala raw siyang planong insultuhin o husgahan ang balae niyang hilaw. Nagbibiro lang daw talaga siya.

Dahil doon ay umani ng kaliwa’t kanang pagbatikos si Rosanna. Maraming nagdiin na hanggang ngayon daw ay wala pa rin siyang ipinagbabago, mayabang pa rin siya na tulad nang dati noong sikat pa siya.

Sabi ni Sonia Francisco, kaibigan naming designer, “Wala pa rin siyang pagbabago. Bastos pa rin siya at alam mong nagkapangalan lang, pero huwag mo siyang hahanapan ng breeding dahil wala ka talagang matatagpuan sa kaniya.

“Di ba naman napakasarap niyang tuktukan sa ulo? Gawin bang biro ang isang senaryong halos ikapugto na ng hininga ng mga nagmamahal kay Senador Bong? Mayabang pa rin si Osang, kaya sa halip na maawa ka sa kaniya dahil waley na ang career niya, e, maiisip mo pa tuloy na mabuti nga sa kaniya ang mga nangyayari ngayon!” naiinis na komento ng aming kaibigan.

Sa totoo lang, sana nga ay magkaroon ng isang magandang paggising si Rosanna Roces para mauntog siya sa katotohanan na sayang na sayang siya at ang kaniyang karerang basta na lang niya pinabayaan.

Marian Rivera – Maganda na’y masinop pa sa pera

Dalawang beses na naming nadadatnan sa shop ni Bambbi Fuentes si Marian Rivera. Noong una ay walang-wala siyang make-up, pero nagmumura pa rin ang kaniyang ganda. Habang nagpapaayos siya ay nasa kaniyang tabi lang si Dingdong Dantes at matiyagang naghihintay na matapos siya.

Ang ikalawa ay noong Linggo ng tanghali, naka-make-up si Marian, lalong nagsusumigaw ang kaniyang kagandahan na iilan lang ang mayroon. Payat na payat siya ngayon. Ayon sa dalaga ay nineteen inches na lang daw yata ang baywang niya. Kinailangang daw niyang magdiyeta dahil kinunan siya nang naka-two piece lang sa isang magazine.

Pag-alis ni Marian ay may nagbulong sa amin. Napakasinop daw sa pananalapi ng dalaga. Huminto man siya sa pag-aartista isang araw ay hindi na siya maghihirap dahil sa dami ng kaniyang naipundar ngayon mula sa kaniyang pagsusumikap.

“Para siyang si Willie Revillame, may pinupuntahan ang mga pinaghihirapan niya. Dati na siyang maraming lote dahil sa laki sa lola si Marian, siya ang nagmana noon. Pinatayuan niya iyon ng mga apartment na kumikita na noon pa, pero nagdadagdag pa siya.

“Kung lahat ng artista, eh, kapareho nina Marian at Willie, wala tayong makikitang mga artistang dating nahihiga sa salapi, pero nang lubugan ng araw, eh, ni walang naitago para sa future nila,” pahayag ng aming kausap.

Napakaliit ng mukha ni Marian. Parang sa isang suntok lang ay makakatulog agad siya. Mayroon o walang make-up ay lutang ang kagandahan ng dalagang ito na alam mong maligayang-maligaya dahil maayos at marespeto ang relasyong namamagitan sa kanila ni Dingdong Dantes. – CSF

Have a comment on this article? Send us your feedback

Oktubre 16 – 31, 2013

	Alyssa Quijano & Charice Pempengco
	Vice Ganda
	Sharon Cuneta
	Derek Ramsay & Cristine Reyes
	Willie Revillame
	Chito Miranda & Neri Naig

Charice at Alyssa – Mahal ng mga bagong kapitbahay

Kuwento ng mga kaibigan naming malapit lang ang tinitirhan sa ipinatatayong bahay nina Charice Pempengco at Alyssa Quijano sa Laguna ay punumpuno raw ng pakikisama sa kanilang mga kapitbahay ang magkarelasyon.

“Walang angas si Charice, kapag may dumadaan sa kanila, ready na agad ang smile niya. Kahit si Alyssa, mabait ang bata, kaya love sila sa community nila,” kuwento ng aming kaibigan.

Nakalipat na pala sila sa bagong bahay at garden na lang daw ang pinagkakaabalahan pa ng dalawa. Para silang nagbabahay-bahayan ayon sa aming kaibigan.

Sa nakaraan nilang concert ni Aiza Seguerra ay diretsong sinabi ni Charice na kung siya ang tatanungin ay gusto na niyang maging maayos ang relasyon nila ng kaniyang pamilya.

Naniniwala siyang isang araw ay darating din ang masarap na pagkakataong iyon. Magkakasundo rin silang mag-ina, matatanggap na rin ng kaniyang pamilya si Alyssa Quijano.

Iyon lang naman ang kinokontra ng kaniyang ina, ang pakikipagrelasyon niya kay Alyssa na ayaw na ayaw nito. Ipinaglalaban naman ni Charice ang kanilang pagmamahalan.

“Opo naman, miss ko na ang mommy at kapatid ko, gusto ko na silang makasama uli. Pero right now, mayroon pa kasi silang gustong gawin ko na hindi ko naman magagawa.

“I love Alyssa, I care for her, hindi ko siya puwedeng talikuran just because iyon ang gustong mangyari ng ibang tao,” madiing paninindigan pa ni Charice Pempengco.

Vice Ganda – Nagwala dahil pinakain ng dalawang dulo ng “tasty”

Sa kalye kung saan nakatira si Vice Ganda ay pinagpipistahan ang kuwento tungkol sa kaniyang mga kasambahay. Kalat na kalat na sa kahabaan ng kalyeng iyon ang istorya kung paano bumibili na lang araw-araw ng mga lutong pagkain ang mga kasambahay ng pamosong komedyante.

Ang dahilan, isang araw ay nagwala sa sobrang galit si Vice Ganda, bilang parusa ay nagdeklara siya na mula sa araw na iyon ay bibili na ng sariling pagkain ang kaniyang mga kasambahay.

Ang kasahog lang niya sa pagkain ay ang kaniyang lolo na sa kaniya nakapisan, pero ang kaniyang mga kasambahay pati ang kaniyang driver, kailangang magkani-kaniya na ng bili ng pagkain mula sa kanilang mga suweldo mula kay Vice Ganda.

May nagtitinda ng mga luto nang pagkain sa kanilang kalye. Doon bumibili ang mga kasambahay ni Vice Ganda. Tipid na tipid ang mga ito sa pagbili dahil napakaliit lang ng kanilang suweldo mula sa komedyante.

Ang bawat kasambahay ni Vice Ganda ay sumusuweldo lang nang two thousand five hundred pesos buwan-buwan. Biyayang matatawag iyon, pero napakaliit pa rin kung tutuusin sa itinatadhana ng batas para sa mga kasambahay.

Sa maliit nilang suweldo pa nila kinukuha ang pambili nila ng pagkain mula nang magalit nang todo si Vice Ganda. May mga pagkakataong bumibili na lang ng sardinas ang mga kasambahay niya. Kung iluluto pa nila ang sardinas ay sila rin ang bibili ng sangkap dahil hindi naman nagbibigay ng pamalengke ang kanilang boss kaya iniuulam na lang nila iyon nang hilaw at diretso mula sa lata.

Natural lang na makisimpatya sa mga kasambahay ang mga tagaroon. Napapailing na lang ang mga ito sa mga ginagawa ni Vice Ganda sa kaniyang mga kasambahay, samantalang milyon ang kinikita niya kada buwan.

Subalit palaging may tatlong panig ang bawat pangyayari. Ang panig ng inirereklamo, ng nagrereklamo, at ng katotohanan.

Inimbestigahan namin ang kuwentong nakarating sa amin. Kumampi naman sa amin ang panahon, nalaman namin ang buong kuwento kung bakit humantong ang pangyayari sa pagkakani-kaniya na nila ng pagkain sa bahay.

Isang raw pala ay nagbilin si Vice sa kaniyang mga kasambahay na magbabaon siya ng sandwich sa studio. Sinunod naman iyon ng kaniyang pinagbilinan, pinabaunan siya nito ng sandwich na gusto niya, pero biglang uminit ang tuktok ng becki sa kaniyang nakita.

Sagana sa palaman ang sandwich, pero ang ginamit na tinapay ay ang magkabilang dulo ng tasty, iyong karaniwang piraso na hindi na natin kinakain at naiiwanan lang sa supot nito.

Pagdating ni Vice Ganda sa kaniyang bahay ay parang kumukulong tubig pa rin ang kaniyang temperament. Tinawag niya ang kaniyang mga kasambahay. Nang tanungin ay nagtuturu-turuan naman ang mga ito kung sino ang naghanda ng sandwich na ang tinapay na ginamit ay ang magkabilang dulo ng tasty.

“Ako ang nagpapakamatay sa pagtatrabaho, ako ang nagpapakahirap maghanapbuhay, ako pa ang pakakainin ninyo ng ganitong klase ng tinapay? Ano kayo, mga amo?

“Puwes, mula sa araw na ito, hindi na ako magbibigay sa inyo ng pamalengke, magkakani-kaniya na tayo ng pagkain, kayo na ang bibili ng pagkain ninyo mula sa inyong mga suweldo! Ang lolo ko lang ang responsibilidad kong pakainin!” Bumubula ang bibig na pagtalak ni Vice Ganda sa kaniyang mga kasambahay.

Nauunawaan namin ang sentimyento ni Vice Ganda, totoo namang siya ang naghahanapbuhay para sila kumain nang maayos at disente. Pero bakit kailangang ang mga gitnang hiwa ng tasty ay ang mga kasambahay pa niya ang nagpista at ang ibinigay sa kaniya ay ang magkabilang dulong panaklob sa sliced bread?

Respeto lang naman ang idinidiin ng komedyante, dahil sabi nga, kung sino ang mayhawak ng pitaka ay iyon ang hari. Sa kaniya dapat ihinahain ang pinakamasarap na bahagi, hindi ang mga tira-tira, dahil siya ang humahanap ng ilalaman sa buslo ng kanilang kabuhayan.

Pero sana rin ay matuto si Vice Ganda na alagaan ang kaniyang emosyon. Hindi niya dapat tinikis sa pagkain ang kaniyang mga kasambahay. Ang biyaya ay hindi matatawag na biyaya hanggang hindi natin ibinabahagi sa ating kapuwa.

Ang biyaya, habang binabawasan natin para ibigay sa mga mas nangangailangan ay mas dumadami. Parang kamote na habang tinatalbusan ay mas yumayabong at nagsasanga-sanga.

At ngayon lang naging malinaw sa amin ang sitwasyon ni Vice Ganda sa ABS-CBN. Maraming staff pala niya ang galit sa kaniya, hindi lang makapagreklamo ang mga ito dahil siguradong mawawalan sila ng trabaho.

Pero may ibang staff si Vice na hindi natatakot. Madulas ang kanilang dila sa pagsasabi na power tripper talaga ang becking komedyante. Ang akala raw siguro ni Vice ay panghabambuhay na ang popularidad na tinatamasa niya ngayon.

Sabi ng isang source, “Noong nag-sorry siya kay Ms. Jessica Sojo, may paiyak-iyak pa siya, kung anu-anong kadramahan ang sinabi niya para makuha ang sympathy ng televiewers.

“Sana, kinunan din ng director ang reaction shot ng mga staff habang nagdadrama si Vice. Nakita rin sana ng manonood na nagtitinginan lang sila, ni walang lungkot sa mukha, dahil hindi sila naniniwala sa mga sinasabi ng host nila.

Hindi na raw bago para sa kanila ang kuwento tungkol sa mga kasambahay ni Vice. Kahit walang paliwanag ay paniniwalaan daw agad nila ang kuwento, dahil kilalang-kilala nga nila ang pagiging power tripper ng kanilang host.

Sharon Cuneta – Wagi ang bagong show ni Mega

Prangkahang sinabi ni Sharon Cuneta na kung siya lang ang bibirahin ay walang problema. Ilang dekada na siya sa showbiz, nakilala na raw niya ang lahat ng klase ng tao sa mundong ito. Hindi na bago sa kaniya ang pagkakagatan nang talikuran.

Pagbibigay pa niya ng ehemplo, “Totoo naman kasing may mga taong makikipagkaibigan ka lang dahil gagamitin ka, mayroon namang makikipag-close lang sa iyo para masabing close kayo.

“But there are people who are good to you because they love you. Iilan lang sila. Mabibilang mo lang sa mga fingers mo, and for me, hindi bale nang iilan lang, basta alam mong totoo sa iyo,” pagdidiin ng Megastar.

Iyon din pala ang palagi niyang ipinaaalala sa kaniyang mga anak, ang pamimili ng mga kaibigang totoo, hindi mga kaibigang putik lang. Ilang beses na kasi siyang namuhunan ng puso, pero sa bandang huli ay siya lang naman pala ang sinsero. Paninira pa ang naging premyo sa kaniya sa bandang huli.

“Ako na lang sanang saktan nila, wala silang maririnig. Pero kapag mga mahal ko na sa buhay ang sinaktan, naku, they will never hear the end ot it. Talagang ipagtatanggol ko ang mahal ko!” sabi pa ni Sharon.

Hindi na raw nagtatapat ngayon si KC Concepcion sa kaniya tungkol sa lovelife nito. Hindi na nila iyon pinag-uusapan, dahil baka natatakot na ang anak niya sa puwedeng mangyari kapag nasaktan na naman ang kaniyang dalaga.

“Mabait ang anak ko, pasensiyosa, pero napuno rin. Hindi puwedeng basta pabayaan ko na lang siyang umiiyak at masaktan. I will really make that person na nanakit sa kaniya know that I’m hurt for my daughter.

Sa isang banda, panalo ang bagong programa ng Megastar na si Sharon Cuneta sa TV5, ang Madam Chairman, nakakaaliw ang mga komentong tinanggap namin mula sa mga hindi Sharonians.

Derek Ramsay – Tinapos na ang relasyon kay Cristine Reyes

Malinaw ang kuwento. Si Derek Ramsay ang nagdesisyong makipaghiwalay na kay Cristine Reyes. Pero dahil maginoo ang hunk actor ay hindi siya nagdesisyon nang mag-isa, kinausap niya nang personal si Cristine. Nagulantang man ang dalaga ay wala itong nagawa kundi ang sumang-ayon na lang sa gustong mangyari ni Derek.

Nakapag-iisip ang ganoong senaryo. Napakabukas ng bibig ni Derek noong mga unang araw ng kanilang relasyon kung gaano siya kaligaya. Mahal na mahal daw niya si Cristine. Masayang-masaya raw siya, dahil ang karelasyon niya ay isang dating kaibigan na kilalang-kilala na niya.

Pero pagkatapos lang ng isang buwan ay iba na ang tugtog. Hiwalay na sila, at kay Derek Ramsay pa nagmula ang aksiyon ng kanilang paghihiwalay.

Bakit kaya? Sa ganoon kaaga kayang panahon ay may nadiskubre si Derek tungkol sa tunay na pagkatao ng dalaga?

Nakausap na namin nang personal si Derek. Nakiusap siya na sana’y maintindihan namin kung hindi man siya magpapainterbyu tungkol sa break-up nila ng dalaga, dahil nangako nga siya sa mommy nito na hindi siya magsasalita.

Basta ang malinaw lang na sinabi ni Derek ay walang may kasalanan sa kanilang dalawa. Maayos daw ang kanilang paghihiwalay, magkaibigan pa rin daw sila hanggang ngayon.

Pero malakas ang kutob namin na habang maaga pa ay nakipaghiwalay na si Derek kay Cristine para hindi masyadong magtagal ang kaniyang pagsasakripisyo.

Noong una pa lang kasi ay marami nang nagpayo kay Derek na paglabanan ang nararamdaman niya para sa dalaga dahil kung maldita raw si Angelica Panganiban ay mas matindi si Cristine.

Nahalata rin ni Derek na kakaunti lang ang maligaya para sa kanila ng dalaga. Kulang na lang na tanungin pa siya ng kaniyang mga kaibigan at kakilala kung bakit si Cristine, samantalang napakarami namang ibang babae diyan?

Willie Revillame – Nagpaalam na sa showbiz

October 12, sa kasagsagan ng bagyo, ay tuluyan nang nagpaalam sa himpapawid ang noontime show ni Willie Revillame. Sa ayaw at sa gusto ng kaniyang mga tagahanga ay kailangan nang kumaway ng pamamaalam ni Willie at ng buong produksiyon. Tapos na ang Wowowillie. Kung saan siya muling mapapanood ng kaniyang mga tagasuporta ay wala pang nakakaalam ngayon.

Pagkatapos ng kaniyang show ay naka-text namin si Willie. Ibinalita niya na naging malungkot nga ang kapaligiran sa studio ng Wowowillie – hindi na raw kasi napigilan ang pagluha ng matatanda niyang tagasuporta.

“Nakakalungkot, talagang hindi na sila nakapagpigil, nag-iiyakan na sa studio kanina. Alam naman kasi ng mga mahal naming lola kung paano namin sila pahalagahan. Ang feeling nila, wala nang magmamahal pa sa kanila nang ganoon katindi,” balita sa amin ni Willie.

Maging si Willie Revillame ay maninibago sa bagong ikot ng kaniyang buhay. Hindi biro-biro ang pagso-show sa loob nang siyam na taon, siguradong hahanapin din iyon ng sistema ng kaniyang katawan.

Ang sabi niya sa isang bahagi ng kaniyang pamamaalam, “Huling araw na po ito ng ating programa, ngayon na lang po tayo magkakasama-sama, iba na nga po ang title ng show natin ngayon, Wawawillie na,” na sinabayan naman ng tawanan ng mga nasa studio.

Pero gaano man ang gawing pagpapanggap ni Willie ay lumalabas pa rin ang matindi niyang lungkot sa pagtatapos ng kaniyang show. Lumantad iyon habang kumakanta siya, dahil nakitang lumuluha ang payaso.

Chito at Neri – May bagong sex video na kumakalat na naman

Nagpipista na naman ang buong bayan ngayon sa ikalawang sultada ng sex video nina Chito Miranda at Neri Naig. Magkaiba ang pag-iilaw ng una at nitong pangalawa. Sa kasalukuyang palabas na tinututukan na ng ating mga kababayan ay mas malinaw silang nakikita. May mga bago rin silang atake sa ikalawa nilang sex video.

Tulad ng dati ay “alipin” pa rin ni Chito si Neri. Siya ang pagod na pagod, siya ang hinete ng isang kabayong napakatamad dahil palaging nakahiga lang.

Ang una ay nasundan na, ang ikalawa ay puwedeng masundan pa uli. Ilang sex video nga kaya nila ang laman ng nawalang laptop ng soloista ng Parokya ni Edgar? Ilang pa kaya ang susunod pagkatapos ng dalawang naunang ito? Matumbok na kaya ngayon ng NBI kung sino ang mayhawak ng laptop ni Chito?

Ang malinaw ngayon ay hindi lang minsan nilang ginawa ang pagbibidyo sa kanilang pagniniig, maraming beses iyon, at kung ano ang dahilan nila sa pagre-record ng pag-akyat nila sa langit-langitan ng kaligayahang pisikal ay tanging sila lang ang nakakaalam.

Basta, isa lang ang sigaw ni Mommy Dionisia Pacquiao tungkol sa sex video nina Chito Miranda at Neri Naig, “Malaswa!”

Raymart Santiago – Matagal nang nagtiis kay Claudine

Naiisip lang namin. Ano kaya ang maghapon ngayon para kay Claudine Barretto? Paano kaya niya pinalilipas ang buong araw ngayong napakagulo ng kaniyang personal na buhay?

Madalas siyang magpunta sa korte ngayon para sa pagdinig sa mga kasong pinaglalabanan nila ni Raymart Santiago. Palagi rin siyang nakikipag-meeting sa kaniyang mga abogado. Ano pa ang naiiwanang oras ngayon para sa kaniyang mga anak?

Kahit siguro sa panaginip lang ay hindi inasahan ni Claudine na mangyayari ang ganito sa kaniyang buhay. Natural lang na puro magaganda ang pinangarap niya para sa relasyon nila ni Raymart bilang mag-asawa, pero bakit nga ba sila nagkaganito?

Kung paniniwalaan natin ang mga nakasaad sa depensa ni Raymart sa mga sinumpaang salaysay ng aktres nang maghain siya ng demanda laban sa kaniyang mister ay matagal na panahon na itong nagtitiis lang.

Ang totoo, noong nakaraang taon pa pala ay hindi na kagandahan ang takbo ng kanilang relasyon. Nagtiis lang daw nang nagtiis si Raymart, hanggang sa pumutok na nga ang balita, hanggang sa humantong iyon sa korte dahil sa pagdedemanda ni Claudine sa kaniyang mister.

Nakakalungkot lang dahil pati ang kaniyang mga kapatid ay kaengkuwentro rin ngayon ni Claudine. Kalaban niya na nga ang asawa niya, wala pa siyang kakamping kapatid at ang tanging nakaalalay sa kaniya sa lahat ng kaguluhang ito ay ang kanilang mga magulang.

Komento ng isang kaibigan nina Raymart at Claudine, “Nasubaybayan namin ang relasyon nila, parang napaka-ideal nila noong una, hanggang sa nabarkada si Claudine sa kung sino-sino. Doon na nag-umpisa ang gulo sa relasyon nila.”

Kung paniniwalaan natin ang mga ganoong kuwento ay hindi na pala nakapagtataka kung bakit nauwi sa wala ang relasyon nina Raymart at Claudine. May pinag-ugatan pala naman iyon. Mayroon palang unang bumitiw sa kanilang sumpaan sa harap ng altar.

Have a comment on this article? Send us your feedback

Nobyembre 1-15, 2013

	Enchong Dee
	Sebastian Castro
	Piolo Pascual
	Luis Manzano
	Kim Chiu
	Ai Ai delas Alas
	Meryll Soriano
	Sharon Cuneta

Enchong Dee – Hindi totoong may sex video with Sebastian Castro

Diretsong sinagot ni Sebastian Castro sa panayam ni Direk Joey Reyes sa Showbiz Police na walang katotohanan ang kuwentong kumakalat na mayroon silang sex video ni Enchong Dee. Sumumpa pa ang baguhang personalidad, wala raw talaga, dahil hindi pa sila personal na magkakilala ng guwapong hunk actor.

Si Sebastian Castro ang itinuturong nakaulayaw ni Enchong sa isang sex video. Pinagpistahan agad ang kuwento kahit wala pa namang nakapanonood noon. Ipinalagay na agad ng mga nakarinig ng istorya na totoo ngang nagromansahan na sila ni Enchong Dee at ini-record pa raw nila iyon!

Takang-taka ang lumantad nang becki kung paano at sino ang nagpasimuno sa pagpapakalat ng kuwento tungkol sa kanila ni Enchong, samantalang minsan lang daw niyang nakita ang aktor sa isang premiere night, pero pagkatapos noon ay ni hindi na sila nagkita pa uli kahit sa panaginip lang.

Nakakaawa naman si Enchong Dee. Nalalagay ang young hunk actor sa isang alanganing posisyon, samantalang wala namang katotohanan ang balitang kumakalat na nakipag-ulayaw ito sa baguhang si Sebastian Castro.

Si Sebastian Castro ay isang Peruvian na lumaki at nag-aral sa Amerika. Maraming kababaihan ang kinikilig sa kaniyang kaguwapuhan, pero sorry na lang, nag-out na si Sebastian Castro bilang isang becki.

Magaling din siyang pintor, ipinakita na niya sa amin ang kaniyang mga piyesa, ang paborito niyang medium ay oil pastel at ang pinakagusto niyang iginuguhit ay mga hubad na katawan ng lalaki.

Piolo Pascual – Bakit laging si Iñigo ang idinadahilan sa hindi paglagay sa tahimik?

Rebelasyon ni Piolo Pascual, dalawang taon pa mula ngayon ay nagpaplano na siyang mag-asawa. Disiotso anyos na raw kasi ngayon ang kaniyang anak na si Iñigo at gusto raw muna niyang magabayan ang binata sa paglaki nito.

May sampung taon na ang nakararaan ngayon ay ganoon na rin naman ang deklarasyon ng papa ng bayan, dalawang taon pa at mag-aasawa na siya, gusto raw niyang magkaanak habang bata pa siya para sabay lang silang lumaki.

Pero 2013 na ngayon, ganoon pa rin ang madalas sabihin ni Piolo. Palaging future tense ang kaniyang isinasagot. Kaya ang tanong ng ating mga kababayan ay kung kailan ba talaga siya mag-aasawa?

Kapansin-pansin din na palagi niyang ginagamit na dahilan si Iñigo. Ayaw raw kasi niyang masaktan ang kaniyang anak, sobra raw kasi ang pagiging seloso nito.

Bakit hindi niya maipaliwanag sa kaniyang anak na magkaiba naman ang klase ng pagmamahal na maibibigay ng lalaki sa kaniyang asawa at anak? Bakit hindi niya masabi kay Iñigo na gusto na niyang magkapamilya, dahil hindi na siya bumabata?

Bakit palaging si Iñigo ang isinasangkalan niya? Bakit hindi niya na lang kausapin ang kaniyang anak na gusto na niyang magpamilya? Napakaramot ba naman ng anak niya para hindi maintindihan ang kaniyang gusto?

At bago siguro magsabi si Piolo na dalawang taon pa mula ngayon ay gusto na niyang mag-asawa ay kailangan muna niyang makilala ang babaeng pakakasalan niya.

Wala naman kasi siyang karelasyon. Palagi niyang ibinibitin ang kuwento tungkol sa kanila ni Shaina Magdayao. Samantalang nagpainterbyu na nga ang dalaga na wala namang namamagitang kung ano sa kanila at magkaibigan lang talaga sila?

Luis Manzano – Perfect gentleman pa rin sa break-up nila ni Jen

Napakamaginoo ni Luis Manzano, siya ang mas nakababatang bersiyon ng maginoo ring si Derek Ramsay, hindi sila ang tipo ng mga lalaking unang magsasalita tungkol sa pagkawasak ng kanilang pakikipagrelasyon.

Medyo nakauusad na ngayon mula sa paghihiwalay nila ni Cristine Reyes si Derek, pero si Luis ay hindi pa. Kailan lang kasi sila naghiwalay ni Jennylyn Mercado.

Marami nang nagtangkang magtanong kay Lucky kung ano ang mga naging dahilan ng break-up nila ni Jennylyn, pero bigo ang lahat, pagdating sa kaniyang lovelife ay pribado ang guwapong aktor-TV host.

Pero dahil ayaw niyang magsalita ay maraming haka-haka ang naglalabasan tungkol sa kanilang break-up. Kesyo nahuli raw kasi ni Luis na nakikipagkita pa rin si Jen kay Dennis Trillo na dating karelasyon nito.

Masyadong mabenta si Dennis. Palaging nasasangkot ang pangalan ng aktor sa mga hiwalayan. Ganiyan din kasi ang umikot na kuwento nang maghiwalay sina Derek at Cristine.

May mga nagpapalagay naman na hindi rin tumagal si Luis sa kakaibang ugali ni Jen. Kalat na kalat na kasi na may sariling mundo ang aktres, napakayaman daw sa pagiging sumpungera ni Jen na ikinaiinis ng kaniyang mga nakakarelasyon.

Mas gusto naming maniwala sa ikalawang bersiyon. Dati na kasing reklamo iyon ng mga nakakarelasyon ni Jen. Mahirap daw pakibagayan ang kaniyang ugali na kung minsan ay maayos ang kaniyang mood, pero kadalasan ay may sarili itong mundo.

Kim Chiu – Ayaw tantanan ng walang kaluluwang basher

Mabait si Kim Chiu. Edukada pa siya. Lumalagay pa sa tamang lugar ang batang aktres. Pasalamat ang kaniyang basher dahil mas ginagamit ng dalaga ang kaniyang edukasyon at hindi nalalambungan iyon ng emosyon.

Dumudugo ang aming puso para kay Kim Chiu dahil sa ubod nang bastos at walang urbanidad niyang hater. Bilang isang manunulat at bilang isang ina ay gusto naming yakapin nang mahigpit ngayon ang isang anak na nagdurugo pa ang emosyon dahil sa pagkawala ng kaniyang ina.

Sa panahong hinihilot pa ni Kim ang kaniyang puso ay heto ang isang halang ang kaluluwa (kung mayroon pa nga ito) na nagsabing baliw ang kaniyang namayapang ina at salot silang magkakapatid.

Isa sa mga palatandaan ng kababuyan-kabastusan ng isang tao ang pangungutya at paglapastangan sa isang namayapa na. Wala nang laban ang isang patay, walang-wala nang kapasidad na maipagtanggol ng isang namayapa na ang kaniyang sarili. Kaya ang kawalan ng respeto sa isang patay na ay senyal ng kawalan ng kunsensiya at kaluluwa ng isang nilalang.

Pero sa kabila ng paglapastangan sa kaniyang namayapa nang ina ay nagpakaedukado pa rin si Kim Chiu. Inako na lang niya ang kung anumang galit na mayroon ang bastos niyang basher, siya na lang sana ang babuyin nito, huwag ang kaniyang inang nasa kabilang buhay na.

Walang dapat ikatakot kay Kim Chiu ang kaniyang bastos na basher, sa Diyos ito dapat magkaroon ng takot, dahil anumang masamang gawain ay mayroong kaparusahan sa dakong huli.

Ai Ai at Marian – Nilangaw sa takilya ang pelikula

Kung totoo ang mga numerong nakarating sa amin ay nakapanghihinayang naman ang ibinigay na effort nina Ai-Ai delas Alas at Marian Rivera sa nakaraan nilang pelikula.

Matindi na ang napatunayan sa box-office ng Comedy Concert Queen, billion star nga ang tawag sa kaniya sa Star Cinema dahil sa laki ng biyayang naiakyat na niya sa produksiyon. Pero ano’ng nangyari at naging malagihay lang ang kinita ng pelikula nila ni Marian?

May nagkuwento pa nga sa amin na sobrang lungkot ni Ai-Ai nang malaman niya ang kinita ng kanilang pelikula. Napakababa kasi noon sa inaasahan ng marami, ano nga ba ang naganap at hindi kinagat sa takilya ang kanilang proyekto ni Marian Rivera?

Sabi ng isang nakausap namin, “May hatid talaga si Marian, pati tuloy si Ai-Ai, naapektuhan ang lakas sa box-office. Hindi talaga siya pampelikula, hanggang sa TV lang talaga si Marian, bilang na bilang ang mga pelikula niyang kumikita!”

Sayang naman ang kanilang effort, hindi sila gaanong niregaluhan ng suporta ng ating mga kababayan, pero hindi pa naman ito ang katapusan ng karera ni Marian Rivera. Marami pang araw.

Ramon Tulfo – Batas ng karma ang naghiganti para sa kaniya

Noong maging panauhin namin sa Showbiz Police ang matapang na komentarista at kolumnistang si Mr. Ramon Tulfo ay diretso namin siyang tinanong kung ano ang damdamin niya ngayon sa kaguluhang nagaganap sa pagitan ng mag-asawang nanakit sa kaniya nang literal noong nakaraang taon.

Naiisip din ba niya na bendikasyon para sa kaniya ang mga pagbabatuhan ng putik ngayon sa harapan ng publiko ng mag-asawa? Simple lang ang kaniyang sagot sa aming tanong.

“If I will say that, it’s too self-serving. Pero alam mo, totoong-totoo na kung ano ang ginawa mo sa kapuwa mo, babalik din sa iyo,” banayad pero madiing tugon ng palabang kolumnista at mamamahayag sa radyo at telebisyon.

Hindi na pala niya ipinagpatuloy ang mga kasong isinampa niya laban sa mag-asawa, wala na raw kasing saysay ang hustisya sa bansang ito, bukod pa sa isang malaking abala lang ang pagdalu-dalo sa pagdinig ng kaso.

Hindi man niya ginusto ay ano pa ba naman ang hihilingin pa ngayon ni Kuya Ramon, ano pa bang tagumpay ang gugustuhin niyang makamit, samantalang ang mismong mga kalaban na niyang sina Raymart at Claudine ang nagkakasuhan at nagbabatuhan ng akusasyon ngayon?

Noong pagtulungan siyang saktan ng mag-asawa at ng mga kaibigan nito noong Mayo nang nakaraang taon ay isang payo ang minarkahan niya, mula iyon sa isang taong nagmamahal at nagmamalasakit sa kaniya, “Huwag mo na silang kasuhan. Gagaling din ang mga pasa mo at mawawala rin ang sakit ng katawan mo.

“Wait for the retribution, siguradong may balik ‘yan sa kanila. Always remember, digital na ang karma ngayon, it will surely come. Just wait. Darating iyon sa isang panahong hindi mo inaasahan.”

Meryll Soriano – Masama ang loob sa amang si Willie Revillame

Hindi namin natutukan ang panayam kay Meryll Soriano, pero ayon sa mga nakapanood ay may tulis daw ang dila ng aktres patungkol sa kaniyang ama, may namamagitan daw bang tampuhan sa kanila ngayon ni Willie Revillame?

Ang huli naming pagkikita ni Meme (palayaw ng atkres) ay noong imbitahan kami ni Wilie na silipin naman ang kaniyang mall. Sinabi sa amin ni Meryll na tinanggihan niya ang pamamahala sa mga negosyo ng kaniyang ama, pero wala naman siyang ipinahiwatig sa amin na mayroon silang hindi pagkakaintindihan.

Basta ang sabi lang niya ay ihininto na raw ni Willie ang pagbibigay ng pang-tuition fee niya sa London, iba na raw ang sumasagot noon, pero hanggang doon lang ang impormasyong nakuha namin kay Meme.

Kuwento ng aming kausap, “May inis kay Willie ang anak niya, ramdam na ramdam iyon sa pagsasalita ni Meryll, hindi maikakaila iyon! Parang gusto niyang sabihin na natutulungan ni Willie ang ibang tao, pero siyang mismong anak, eh, hindi. Pakitanong nga kung may away ang mag-ama?” pang-uusisa pa ng aming kakuwentuhan.

Sa pagkakaalam namin ay si Willie ang sumagot-gumastos sa pag-aaral ni Meryll sa London, pero kung ang aktor-TV host ang tatanungin, mas gusto nitong pamahalaan na lang ng kaniyang panganay na anak ang mga negosyong ipinupundar nito.

“Noon ko pa sinasabi kay Meryll na siya na ang mag-supervise ng mga investment ko. Para naman sa kanilang magkakapatid ang lahat ng ito, kanino ko pa ba naman ipamamana ang mga pinagpapaguran at ipinupundar ko?” natatandaan pa naming sabi noon ni Willie.

Hindi lang namin alam kung pagkatapos noon ay nagkaroon sila ng argumento, puwedeng gusto nang bumalik ni Meryll sa London pero ayaw siyang payagan ni Willie, kaya lumapit na siya sa ibang tao para maipagpatuloy ang kaniyang pag-aaral.

Ka Freddie Aguilar – Kontrobersyal ang relasyon sa 16-anyos na dalagita

Sa hindi inaasahang pagkakataon ay muling nasa gitna ng usapan si Kaka Freddie Aguilar. Palagi siyang laman ng mga pahayagan ngayon, laging bida sa mga talk shows. Libreng publisidad ang nakukuha ngayon ng magaling na singer dahil sa sinasabi ng DSWD na maling pakikipagrelasyon niya.

Pero kung bilangan ng ulo ang gagawing botohan ay panalong-panalo si Ka Freddie. Kakampi niya ang husgado ng bayan, katwiran ng mas nakararami ay sinusunod lang niya ang sinasabi ng kaniyang puso.

Ganoon din ang aming pananaw sa senaryong kinapapalooban ni Ka Freddie ngayon. Kung may kalayaan tayo sa pamamahayag at sa pagsamba, mayroon din tayong kalayaang magmahal at mahalin.

Hanggang wala silang sinasaktan at sinasagasaan ay walang mali sa kanilang ginagawa, silang dalawa lang ang makapagbibigay sa isa’t isa ng uri ng kaligayahang hinahanap nila. Walang ibang makapaghahandog noon sa kanila kundi silang dalawa lang.

At nasaan ba ang problema? Kinausap na ng DSWD ang mga magulang ng disisais anyos niyang karelasyon. Sinabi ng mga ito na hindi sila kontra sa pakikipagrelasyon ng dalagita kay Ka Freddie. Nasaan ngayon ang anggulo ng problema doon?

Ang mga anak din ng singer ay boto sa babae at sa kanilang relasyon. Labingdalawang taon nang hiwalay si Ka Freddie sa kaniyang huling pakikipagrelasyon, nasaan uli ang anggulo ng problema doon?

Kung may asawa si Ka Freddie at kung may karelasyon din ang babae ay may problema sa kanilang relasyon, pero dahil pareho naman silang malaya, sa ikatlong pagkakataon ay gusto uli naming itanong kung nasaan ang anggulo ng problema doon?

Kung minsan ay masyadong nagiging abala ang mga ahensiya ng gobyerno sa pagbibigay ng panahon sa mga problemang hindi naman sila dapat ang manghimasok. Napapabayaan tuloy nila ang mga mas mahahalagang aspeto ng kanilang trabaho, at doon sila napapansin ng sambayanan.

James Yap – Masaya sa kaniyang Italian girl friend

Masayang-masaya si James Yap dahil binigyan siya ng pagpapahalaga ng kaniyang Italian girlfriend na si Michaela Cazzola. Pansamantalang lumiban ang dalaga sa kaniyang trabaho bilang bank teller at lumipad papunta sa Pilipinas para lang suportahan ang kaniyang karelasyon sa paglalaro ng basketball.

Gustong-gusto ng pamilya ni James si Michaela. Naipakilala na ito ng basketbolista sa kaniyang mga magulang at kapatid. Masaya ang mag-anak dahil maligaya na uli ngayon ang kanilang kapamilya.

Noong maayos pa ang samahan nina James at Kris Aquino ay nanonood din ang aktres-TV host ng mga laro ng ama ni Bimby. Ang kaniyang mga kapatid naman ang kasa-kasama ni Kris sa panonood, malaking suporta rin ang ibinigay ng namayapang si Tita Cory sa propesyon ni James noon.

Pero umasim nga ang kanilang relasyon, naghiwalay sila at nagkademandahan pa. Ngayon ay may bago nang nanonood kay James Yap sa kaniyang pakikipagbalyahan sa hardcourt.

Puring-puri ng mga tagasuporta ng San Mig Coffee ang girlfriend ngayon ni James Yap na si Michaela Cazzola. Wala raw kasing kaere-ere ang Italyana, saka hindi rin maepal, lumalagay raw sa lugar ang karelasyon ngayon ng pambatong basketbolista ng kaniyang team.

Napakasimpleng babae rin daw ni Michaela, palangiti pa, maganda raw ang PR ng inspirasyon ngayon ni James Yap. Iyon daw ang dahilan kung bakit gustong-gusto ng mga tagasuporta ni James ang Italyana. Pati kasi ang mga ito ay pinahahagalahan ng dalaga, wala itong pinipili.

Ayon kay Michaela ay isang magandang kinabukasan daw ang pinaghahandaan nila ni James, may plano raw silang magpakasal, pero hindi pa sa ngayon.

Kuwento ng isang basketbolistang anak-anakan namin, “Masaya palagi ngayon si bro (James), mayroon na kasi siyang inspiration. Panahon na naman talaga para sumaya si bro, matindi ang pinagdaanan niya, kailangang may inspirasyon na siya ngayon.”

Tama. Kung may karapatang lumigaya si Kris ay ganoon din si James, total naman ay tapos na ang lahat-lahat sa kanila, maayos naman ang usapan nila tungkol sa kustodiya kay Bimby.

Sharon Cuneta – Waging-wagi ang role sa Madam Chairman

Sa wakas, natumbok din ng TV5 ang isang proyektong huhuli sa manonood para kay Sharon Cuneta. Kahit mga bata ay hawak na ngayon sa leeg ng kaniyang Madam Chairman. Aliw na aliw ang mga bagets kay Sharon, ngayon nga lang naman siya gumawa ng ganoong palabas na komedyang-komedya mula umpisa hanggang sa huli ng episode.

Ito ang klase ng panooring hindi niya ginagawa palagi, puro drama ang napupuntang proyekto sa kaniya, bibihira ang katulad ng Crying Ladies noon sa nagustuhan ng ating mga kababayan.

“Ito iyong matagal ko nang gustong gawin, nakakaaliw kasi, walang work kapag ganito, ine-enjoy ko ang taping, masasaya kaming lahat,” kuwento ng Megastar.

Pagkatapos ng kaniyang trabaho ay diretso na agad siya sa bahay. Walang hilig ang Megastar sa pag-istasyon muna sa kung saan-saang lugar kapag tapos na siya, iyon naman ang kaniyang panahon para sa mag-aama niya.

Kapag mahaba-haba ang pahinga ay nagpupunta sila ni Senador Kiko sa kanilang farm, pampaalis niya naman iyon ng stress, nahihilig na rin ngayon ang Megastar sa paghahayupan at paghahalaman.

Hindi raw siya masaya, ayon sa Megastar, maligaya raw siya sa takbo ng kaniyang personal na buhay at karera ngayon. At nakikita naman iyon ng kaniyang mga katrabaho, bumalik na uli ang bungisngis na si Sharon, ang babaeng napakababaw lang ng kaligayahan kung tutuusin sa kabila ng kaniyang yaman at tagumpay.

Have a comment on this article? Send us your feedback

Nobyembre 16 - 30, 2013

	Sharon Cuneta
	Kris Aquino
	Daniel Padilla & Karla Estrada
	Janet Napoles
	KC Concepcion

Typhoon Yolanda – Matinding rehabilitasyon ang ating hinaharap

Bukod sa pagtutok sa mga network dito sa atin kaugnay ng matinding pag-atake ni bagyong Yolanda sa ating bansa ay madalas din kaming tumutok sa CNN.

Sa unang pagkakataon ay napansin namin na bago pa nag-landfall ang bagyo sa Tacloban City, sa Bicol at sa iba pang mga kalapit na probinsiya ay tutok na tutok na ang CNN sa mga pangyayari dito sa ating bayan.

Tuwing ilang minuto ay mayroon silang blow-by-blow update tungkol sa Pilipinas. Sila mismo ay naniniwalang matindi ang magiging pinsala ni Yolanda dito sa atin dahil ito ayon sa CNN, ang pinakamalakas at pinakamatinding bagyong naitala sa ating planeta sa taong ito.

Tatlong news reporters din ang ipinadala dito ng CNN, hali-halili silang nagbabalita tungkol sa nagaganap sa ating mga kababayan sa Visayas. Grabe talaga, nakapanglulumong tingnan ang mga batang nagkamatayan nang walang kalaban-laban dahil sa humahaginit na hangin at malakas na ulan.

May mga footage ang CNN na hindi namin napapanood dito sa atin. Nakapangingilabot ang mga naganap noong kasagsagan ng bagyo; nag-iiyakan ang mga bata, nagdarasal na lang ang matatanda, sigawan nang sigawan ang mga kalalakihan na nagtutulong-tulong para mailigtas sa matinding hampas ng hangin ang kanilang mga pamilya.

Marami nang bagyong dumaan sa ating bayan, pero itong si Yolanda ang nasubaybayan namin ang pananalanta, kapag talaga kalikasan na ang gumanti ay walang-walang magagawa ang sinuman sa atin.

Ang tanong ngayon ay isa lang kung paano makababalik sa kanilang mga lugar ang mga kababayan nating naglikasan noong kasalukuyang nananalanta ang bagyo. Mayroon pa ba silang babalikan?

Nakita namin sa telebisyon ang matinding pangwawasak na iniwanan ni Yolanda sa Kabisayaan, lalo na sa Leyte. Ngayon pa lang ay matinding rehabilitasyon na ang nakikita naming kailangang gawin ng ating pamahalaan para muling makita ang mga Leyteño na nagbalik na ang tiwala sa kanilang mga sarili.

Sharon Cuneta – Bukas ang palad tumulong

Sa mga personalidad na sikat, sa mga artistang pinalad na magkaroon ng magandang karera, ay si Sharon Cuneta ang masasabi naming kumikilos sa mga ganitong klase ng kalamidad na walang mga camerang nakatutok sa kaniya.

Hindi lang dahil sa bilyonarya na si Mega, hindi lang dahil punumpuno na kasi ang kaniyang kaban ng yaman, napakaraming personalidad na umaawas na rin ang bulsa sa kayamanan pero ayaw mabawasan iyon sa pamamagitan ng pamamahagi ng kanilang mga biyaya sa ating mga kababayang mas nangangailangan.

Sa ginanap na telethon ng TV5 sa ngalan ng mga sinalanta ng bagyo sa Kabisayaan ay nanguna sa paghahandog ng suporta at ayuda (palagi naman, walang mauuna sa kabutihan ng kaniyang puso) si Mr. Manny V. Pangilinan.

Ang lahat ng kaniyang kompanya ay nagbahagi ng kani-kanilang tulong. Bukod pa iyon sa mas maaga nitong pagpapadala ng mga relief sa mga kababayan natin sa Visayas. Milyon-milyon ang ibinabahagi ng pilantropo sa mga ganitong pagkakataon.

Ang Megastar naman ay nagbahagi ng kaniyang mga tinatanggap na biyaya sa araw-araw. Limang milyong piso ang ibinigay niyang donasyon para sa mga sinalatan sa Kabisayaan. Limang milyong piso rin ang ibinigay niya sa Aboitiz Group na matagal na niyang katrabaho sa pag-eendorso niya ng Super Ferry.

Iyak nang iyak si Sharon dahil sa mga batang kinukuha-binubuhat ng kanilang mga magulang mula sa putikan. Doon talaga nawawasak ang kaniyang puso dahil ano nga ba naman ang kalaban-laban ng mga ganoong edad para iligtas ang kanilang mga sarili sa ganitong uri ng kalamidad?

Kaya nakalulungkot kapag may mga nangba-bash kay Sharon Cuneta. Iniinsulto pa siya sa Twitter ng ilang kababayan nating walang pagpapahalaga. Hindi alam ng mga taong iyon kung gaano kaganda ang puso ng Megastar sa mga ganitong panahong nangangapa sa dilim ang marami nating kababayang inaatake ng kalamidad.

Kris Aquino – Tumulong na nga ay pinipintasan pa

Kahit talaga sa isang panahong dapat ay nakikisimpatya na lang tayo sa mga kapatid nating nagdarahop ngayon at ibinagsak ng kalamidad ang estado ng buhay ay mayroon pa ring intrigang naglalabasan kaugnay ng bagsik ni Yolanda sa Kabisayaan.

Isang pampublikong dokumento nang maituturing ang apat na raang libong pisong tulong na ipinadala ni Kris Aquino para sa mga nasasakupan ni Congresswoman Lucy Torres-Gomez sa Ormoc, Leyte.

Dahil sa matinding pasasalamat sa ginawa ni Kris ay ipinost nina Richard Gomez at Cong. Lucy ang tsekeng ipinadala ng aktres, isang aksiyon na pinasalamatan ng marami at minasama rin ng marami nating kababayan. Bakit daw kailangang ipagbanduhan pa iyon sa publiko?

Susmaryosep! Ke piso o apat na raang libong piso man ang iniabot na suporta ni Kris ay hindi na ang halaga ng tulong ang pinag-uusapan doon. Ang importante ay ang dikta ng puso na dumamay, iyon ang mayroon si Kris Aquino na hindi nama lahat ng sikat na personalidad ay mayroon.

At walang kinalaman doon ang pagiging kapatid niya ng pangulo, perang pinaghirapang pagtrabahuhan ni Kris ang ipinagtulong niya. Hindi niya ninakaw sa kaban ng yaman ng bayan ang ibinigay niyang donasyon sa mga nagugutom sa Kabisayaan.

Sa eport na eport na lang ni Kris, na kakambal pa ang kaniyang puso sa wagas na pagtulong, sana naman ay huwag na siyang silipan pa ng kung anu-anong butas sa kaniyang ginawa.

Tumulong siya sa kaniyang kapasidad bilang isang Pilipinong nakikisimpatya sa pagdarahop ng ating mga kababayan sa Visayas, nagbigay siya ng donasyon bilang kaibigan ni Congresswoman Lucy Torres-Gomez. At ang pinakamahalaga ay may butas ang kaniyang mga palad sa pagbabahagi ng mga biyaya at hindi niya sinosolo lang ang mga suwerteng dumarating at darating pa sa kaniyang karera at buhay.

Karla Estrada – Nasa Palo, Leyte ang pamilya

Tubong-Leyte si Karla Estrada, ina ng sikat na heartthrob na si Daniel Padilla. Nasa Palo ang kaniyang pamilya at mga kamag-anak. Nang daluyungin ng kalamidad ang kanilang probinsiya ay hindi na nakatulog pa si Karla. Gustung-gusto na niyang umuwi sa Leyte, pero walang paraan para makarating siya doon.

Isang kaibigan ang nagsabi sa kaniya na matagal lang, pero puwede siyang bumiyahe. Kailangan muna niyang magpunta sa Bicol at saka siya tatawid sa Leyte sa pamamagitan ng roro. Ganoon mismo ang ginawa ni Karla. Pero noong nasa Bicol na siya ay may mga nagpayo sa kaniya na bumalik na lang siya uli sa Maynila, dahil hindi magiging ligtas ang kalagayan niya sa Leyte.

“Iyak nang iyak si Karla, noong makita niya ang sitwasyon ng lugar nila (Palo, Leyte), hindi na siya natahimik. Wipe out ang Palo, walang natira, pero ang pinakamahirap, eh, wala siyang communication sa pamilya niya.

“Nandoon ang mama niya, ang mga kapatid niya at pamangkin, kaya talagang alalang-alala siya. Nakakatakot naman kasi talaga ang mga footage na ipinalalabas sa TV, nasa kalye na ang mga bangkay, iyon ang tumortyur nang husto kay Karla,” kuwento sa amin ng kaibigan ni Karla na si Mayora Tates Gana.

Umuwing bigo si Karla. Mas madalas siyang gising kaysa sa tulog. Naghihintay siya ng tawag o pasabi man lang kung buhay pa ba o wala na ang kaniyang pamilya sa Palo, Leyte.

Para makatulong sa kaniyang mga kababayan ay personal na nanawagan si Karla sa mga tagasuporta ng kaniyang anak na si Daniel at ng kapareha nitong si Kathryn Bernardo. Anumang maaaring ipadala ng mga ito para sa kaniyang mga kababayan ay mula sa puso niyang pasasalamatan. Napakabilis namang tumugon ng tropa ng Kathniel.

Sa Biyernes nang umaga ay bibiyahe na ang nirentahang truck ni Karla Estrada para maghatid ng relief para sa mga taga-Palo, Leyte, sa kaniyang mga kababayang nagugutom ngayon at walang matirhan dahil sa malakas na hagupit ni Yolanda. Si Mayora Tates Gana ang katuwang niya sa magandang adhikaing ito para sa kaniyang mga kababayan.

Janet Lim Napoles – Star ng “My Amnesia Girl”

Tinutukan namin nang buung-buo ang panggigiling-pang-iihaw ng mga senador sa pinakakontrobersiyal na babae ng kaniyang panahon na si Janet Lim-Napoles. Nakakatawang-nakakainis ang naging proseso ng tanungan-sagutan, pero sa bandang huli ay maiisip mo na lang, walang nahita ang mga nagpapaurag na mambabatas kay Aling Janet.

Sa isang panahong ang akala ng ilang senador ay maaagaw nila ang atensiyon ng publiko sa kanilang galing sa pagpapaamin kay Aling Janet ay nadaot sila. Kahit ang sarkastikong si Senadora Miriam Santiago ay walang nagawa kundi ang tumigil na lang, dahil baka kung ano pa ang mangyayari sa kaniya.

Si Aling Janet ang pinakabagong pinutungan ng korona bilang bida sa pelikulang My Amnesia Girl dahil parang tinakasan siya ng pag-alala sa lahat-lahat ng mga naganap sa kaniyang buhay. May isang kaibigan kaming mabilisang nagpaimprenta ng t-shirt na malalaking letra ng “Hindi ko po alam” ang nakasulat. Ang daming nanghihingi sa kaniya!

At kung si Aling Janet ang mabilisang naging bida ng My Amnesia Girl ay mayroon namang bagong sitcom na pinagbibidahan ang mga nabigong pulitiko, ang Beh, Buti Nga!

Sino ngayon ang magsasabing ang mundo ng showbiz ay pukyutan ng mga Denial King at Queen?

Arnold Clavio – Nakatanggap ng bashing mula sa publiko ang news anchor

Ang inabot na pamba-bash ng ating mga kababayan kay Arnold Clavio nitong mga huling araw ay isang malaking paalala sa mga kahanay niyang news anchor na mikropono lang ang kanilang hawak at hindi kapangyarihan.

Oo nga’t sila ang tumitimon sa programa. Oo nga’t sila ang mayhawak ng mikropono. Oo nga’t sila ang tinatawag na kapitan ng barko ng show ay hindi nangangahulugang mayroon silang pasaporteng magpairal ng magaspang na ugali sa himpapawid.

Maraming beses nang ganiyan ang inuugali ni Arnold Clavio sa kaniyang mga panauhin, pero ngayon lang siya natutukan ng mga kababayan natin, sa ginawang pabarubal na pakikipag-usap ng newsman sa abogado ni Janet Napoles ay pinakain talaga ng apdong pagkapait-pait si Arnold Clavio ng ating mga kababayan.

Mayroon pang nagkomentong ginagaya raw niya ang Tulfo Brothers na sina Ramon, Raffy, Ben at Erwin, pero hindi naman bagay sa kaniya, dahil ang layo-layo ng kaniyang atake at itsura sa magkakapatid.

Mababait pa nga ang mga kababayan natin na nang-bash kay Arnold Clavio dahil hindi pinersonal ng mga ito ang kaniyang itsura. Tanging ang pambabastos lang niya sa abogadong iniinterbyu niya ang pinagtuunan ng pansin ng mga bashers niya, samantalang ang dami-daming puwedeng sabihin tungkol doon.

Isang markadong leksiyon na ito ngayon para kay Arnold Clavio. Sa susunod ay siguradong mag-iingat na siya sa pagbibitiw ng mga salita, dahil talagang hindi na naman siya tatantanan ng mga kababayan natin.

Nagpapatawa naman ang mga nakausap namin na nagsabing sana raw ay si Arn-Arn na lang ang nag-interbyu sa abogado at hindi mismong si Arnold. Baka raw sakaling naging maganda pa ang pag-uusap nila ng abogado.

KC Concepcion – Parehong-pareho ng ina sa kabaitan

Nakasabay ng mga kaibigan namin sa eroplano si KC Concepcion. Natural, ang unang pumasok sa kanilang isip, ang magpa-picture taking sa anak ni Sharon Cuneta, dahil sayang nga naman ang pagkakataong iyon na nakasubo na nang malapitan sa kanila.

Pero hindi naman sila nagpaka-excited. Nagpalipas muna sila ng tamang oras. Noong magbigay ng hudyat ang stewardess na puwede na silang mag-alis ng seatbelt dahil payapa na ang kanilang lipad ay lumapit na agad ang isa sa kanila kay KC.

Sabi ng aming source, “Medyo hesitant pa ang friend ko dahil baka maabala niya si KC, pero sobrang bait noong bata. Siya pa ang nagyaya at nagsabing walang problema.

“That was our cue, lumapit na rin kami sa kaniya. Walang arte sa katawan si KC. Napaka-approachable niya. Alam mong sincere siya at pinahahalagahan niya ang mga lumalapit sa kaniya,” kuwento ng aming kaibigan.

Isang stewardess daw ang nagkomento na palaging ganoon si KC. Mamahalin mo talaga, hindi raw nag-uutos ang young actress dahil palaging may please sa pagsasalita ang dalaga.

Isa rin si Enchong Dee sa mahal ng ating mga kababayan. Marespeto raw ang hunk actor, saka madaling pakiusapan para sa picture taking.

Dahil doon ay naging tagadepensa tuloy ni Enchong ang mga taong pinasaya niya. Kapag may nagsasabing becki si Enchong ay agad na silang nakaangil sa pagtatanggol, “Hooooyyyy! Mabait si Enchong Dee, ‘no!”

Sen. Jinggoy – Hindi totoong na-detain sa LAX

Ang mga kuwentong-kutsero nga naman. Siguradong walang magawang maganda sa buhay ang nagpakalat ng kuwento na noong dumating si Senator Jinggoy Estrada sa LAX (Los Angeles Airport) ay hinuli siya ng mga otoridad at ilang oras na kinuwestiyon bago siya nakalabas sa Immigration.

Walang basehan iyon, walang katotohanan, dahil ang mga sumundo sa aktor-pulitiko sa airport ay mismong mga kaibigan din namin. Mula sa airport ay dumiretso na sila sa bahay ng mga Estrada. Naghapunan sila, pagkatapos ay nagpahinga na si Senador Jinggoy.

Ngayon naman ang alis ng kaniyang maybahay na si Precy Ejercito para sa isang mahalagang check-up. Noong huli naming makasama ang mag-inang Precy at Janella ay binabanggit-banggit na sa amin ng misis ng senador ang kakaiba nitong nararamdamang pananakit sa bandang dibdib.

Pagkatapos ng gamutan ay babalik din silang mag-asawa sa bansa. Walang planong tumakas ang aktor-pulitiko sa pagdinig sa mga kasong ibinabato laban sa kaniya ngayon. Haharapin ni Senador Jinggoy Estrada ang mga naturang akusasyon sa marespeto at harap-harapang proseso.

James Yap – Patuloy ang kalbaryo kay Kris Aquino

Sinasabi na nga ba at hindi basta-basta uupuan lang ni Kris Aquino ang mga naging pahayag ng abogado ni James Yap na si Attorney Lorna Kapunan sa Good Morning Club tungkol sa napagkasunduan nila sa hukuman kaugnay sa karapatang mahiram-makasama ng basketbolista ang kanilang anak na si Bimby.

Madiin kasing sinabi ng abogado na mula nang mapag-usapan ang visitation rights ni James sa bata ay hindi naman iyon nangyari, kaya ang sabi ni Attorney Kapunan, “Sana naman, sa mga ganiyang usapin, no one is above the law.”

Siyempre, naalarma si Kris sa pangyayari. Sinabihan niya agad ang kaniyang abogado na sagutin ang mga naging pahayag ni Attorney Kapunan. At lumalabas nga ngayon na si James Yap ang nagkukulang para makasama nito ang kaniyang anak kay Kris Aquino.

Si James daw ang ni hindi tumatawag, ang ni hindi nagpapasabi kung kailan nito kukunin ang kaniyang anak, naghihintay lang daw naman ang kampo ng aktres para doon.

Ano naman kaya ang masasabi ng basketball player tungkol sa depensa ni Kris? Mananahimik na lang kaya ito? Tatanggapin na lang ang mga sagot ni Kris para matapos na ang kanilang argumento?

Dahil doon ay siguradong may mag-iisip na kaya hindi nasusundo ni James ang kaniyang anak ay dahil sa sobrang atensiyong ibinibigay nito sa kaniyang girlfriend na Italyana.

Kaya siguro nawawalan ng panahong makasama ni James ang bata ay dahil nandiyan ang kaniyang karelasyon na minsan-minsan lang namang nandito kaya kailangang samantalahin na nila ang pagkakataong palaging maging magkasama.

May alam kaming kuwento na noong minsang sunduin ni James si Bimby ay wala naman pala sa condo unit ng aktres ang kaniyang anak. Umalis daw ang mag-iina at nagbakasyon sa kung saan, kaya malungkot na lang na umalis si James.

Anuman at sinuman ang nagsasabi ng totoo sa magkabilang panig ay ang kapakanan pa rin ni Bimby ang pinakamahalaga, kung ano ang makabubuti para sa bata habang lumalaki ito, iyon ang dapat bigyan ng atensiyon nina James Yap at Kris Aquino.

Manny V. Pangilinan – Malapit nang makita ang TV5 sa Canada

Kamakailan ay nagkatipun-tipon sa Reliance Studios ng TV5 ang kanilang mga artista para sa Christmas Station ID. Kasabay iyon ng kampanya ng network na pangangalap ng mga biyayang maaaring ipadala sa mga biktima ng bagyo sa Kabisayaan.

Nauna nang kumilos ang chariman ng network na si Mr. Manny V. Pangilinan sa pagbibigay ng suporta. Sa ngayon ay nasa tatlumpu’t limang milyong piso na ang napaiikot ng Alagang Kapatid Foundation para sa pagpapadala ng mga relief goods, tuwing madaling-araw ay apat na truck ang nagtatawid ng suporta ng TV5 sa Bicol, Leyte, Mindoro at Palawan.

Nakatutuwang malaman na ibayong paghahanda na ang ginagawa ng network para palaganapin ang mga programa ng istasyon sa buong Canada. Siguradong ikaliligaya ito ng mga Pinoy sa Ontario, Edmonton, Calgary, Vancouver, Saskatchewan at siyempre, sa itinuturing na naming pangalawang bansa ng aming buhay, ang Winnipeg, Manitoba.

Ginanap ang pinaka-Christmas Special ng TV5 sa The Mega and The Song Writer nina Sharon Cuneta at Ogie Alcasid. Nakikanta ang Superstar na si Nora Aunor. Nandoon din ang mga bagets stars ng Artista Academy, pati ang mga kasamahan namin sa News 5 ay nandoon din.

Sa kabuuan ng programa ay isa lang ang mensaheng gustong itawid ng TV5: maraming-maraming salamat sa mga kababayan nating sumusuporta sa mga programa ng istasyon. Maraming salamat sa tiwala at malasakit sa network na ngayon pa lang pumapasok sa tunay na laban.

Maraming-maraming salamat po talaga.

Have a comment on this article? Send us your feedback